| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៨. បាដលិបុប្ផិយត្ថេរអបទានវណ្ណនា
8. Pāṭalipupphiyattheraapadānavaṇṇanā
សុវណ្ណវណ្ណំ សម្ពុទ្ធន្តិអាទិកំ អាយស្មតោ បាដលិបុប្ផិយត្ថេរស្ស អបទានំ។ អយម្បិ បុរិមជិនវរេសុ កតាធិការោ តត្ថ តត្ថ ភវេ វិវដ្ដូបនិស្សយានិ បុញ្ញានិ ឧបចិនន្តោ តិស្សស្ស ភគវតោ កាលេ ឯកស្មិំ កុលគេហេ សេដ្ឋិបុត្តោ ហុត្វា និព្ពត្តោ វុទ្ធិប្បត្តោ កុសលាកុសលញ្ញូ សត្ថរិ បសីទិត្វា បាដលិបុប្ផំ គហេត្វា សត្ថុ បូជេសិ។ សោ តេន បុញ្ញេន ពហុធា សុខសម្បត្តិយោ អនុភវន្តោ ទេវមនុស្សេសុ សំសរន្តោ ឥមស្មិំ ពុទ្ធុប្បាទេ កុលគេហេ និព្ពត្តោ វុទ្ធិមន្វាយ សត្ថរិ បសន្នោ បព្ពជិត្វា នចិរស្សេវ អរហា អហោសិ។
Suvaṇṇavaṇṇaṃ sambuddhantiādikaṃ āyasmato pāṭalipupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe seṭṭhiputto hutvā nibbatto vuddhippatto kusalākusalaññū satthari pasīditvā pāṭalipupphaṃ gahetvā satthu pūjesi. So tena puññena bahudhā sukhasampattiyo anubhavanto devamanussesu saṃsaranto imasmiṃ buddhuppāde kulagehe nibbatto vuddhimanvāya satthari pasanno pabbajitvā nacirasseva arahā ahosi.
៣៦. សោ អបរភាគេ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ សុវណ្ណវណ្ណំ សម្ពុទ្ធន្តិអាទិមាហ។ តត្ថ អន្តរាបណេតិ អា សមន្តតោ ហិរញ្ញសុវណ្ណាទិកំ ភណ្ឌំ បណេន្តិ វិក្កិណន្តិ បត្ថរន្តិ ឯត្ថាតិ អាបណំ, អាបណស្ស អន្តរំ វីថីតិ អន្តរាបណំ, តស្មិំ អន្តរាបណេ។ សុវណ្ណវណ្ណំ កញ្ចនគ្ឃិយសំកាសំ ទ្វត្តិំសវរលក្ខណំ សម្ពុទ្ធំ ទិស្វា បាដលិបុប្ផំ បូជេសិន្តិ អត្ថោ។ សេសំ សព្ពត្ថ ឧត្តានត្ថមេវាតិ។
36. So aparabhāge attano pubbakammaṃ saritvā somanassajāto pubbacaritāpadānaṃ pakāsento suvaṇṇavaṇṇaṃ sambuddhantiādimāha. Tattha antarāpaṇeti ā samantato hiraññasuvaṇṇādikaṃ bhaṇḍaṃ paṇenti vikkiṇanti pattharanti etthāti āpaṇaṃ, āpaṇassa antaraṃ vīthīti antarāpaṇaṃ, tasmiṃ antarāpaṇe. Suvaṇṇavaṇṇaṃ kañcanagghiyasaṃkāsaṃ dvattiṃsavaralakkhaṇaṃ sambuddhaṃ disvā pāṭalipupphaṃ pūjesinti attho. Sesaṃ sabbattha uttānatthamevāti.
បាដលិបុប្ផិយត្ថេរអបទានវណ្ណនា សមត្តា។
Pāṭalipupphiyattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៨. បាដលិបុប្ផិយត្ថេរអបទានំ • 8. Pāṭalipupphiyattheraapadānaṃ
