| Library / Tipiṭaka / তিপিটক • Tipiṭaka / সুত্তনিপাতপাল়ি • Suttanipātapāḷi |
৮. পসূরসুত্তং
8. Pasūrasuttaṃ
৮৩০.
830.
ইধেৰ সুদ্ধি ইতি ৰাদযন্তি 1, নাঞ্ঞেসু ধম্মেসু ৰিসুদ্ধিমাহু।
Idheva suddhi iti vādayanti 2, nāññesu dhammesu visuddhimāhu;
যং নিস্সিতা তত্থ সুভং ৰদানা, পচ্চেকসচ্চেসু পুথূ নিৰিট্ঠা॥
Yaṃ nissitā tattha subhaṃ vadānā, paccekasaccesu puthū niviṭṭhā.
৮৩১.
831.
তে ৰাদকামা পরিসং ৰিগয্হ, বালং দহন্তী মিথু অঞ্ঞমঞ্ঞং।
Te vādakāmā parisaṃ vigayha, bālaṃ dahantī mithu aññamaññaṃ;
ৰদন্তি তে অঞ্ঞসিতা কথোজ্জং, পসংসকামা কুসলা ৰদানা॥
Vadanti te aññasitā kathojjaṃ, pasaṃsakāmā kusalā vadānā.
৮৩২.
832.
যুত্তো কথাযং পরিসায মজ্ঝে, পসংসমিচ্ছং ৰিনিঘাতি হোতি।
Yutto kathāyaṃ parisāya majjhe, pasaṃsamicchaṃ vinighāti hoti;
অপাহতস্মিং পন মঙ্কু হোতি, নিন্দায সো কুপ্পতি রন্ধমেসী॥
Apāhatasmiṃ pana maṅku hoti, nindāya so kuppati randhamesī.
৮৩৩.
833.
যমস্স ৰাদং পরিহীনমাহু, অপাহতং পঞ্হৰিমংসকাসে।
Yamassa vādaṃ parihīnamāhu, apāhataṃ pañhavimaṃsakāse;
পরিদেৰতি সোচতি হীনৰাদো, উপচ্চগা মন্তি অনুত্থুনাতি॥
Paridevati socati hīnavādo, upaccagā manti anutthunāti.
৮৩৪.
834.
এতে ৰিৰাদা সমণেসু জাতা, এতেসু উগ্ঘাতি নিঘাতি হোতি।
Ete vivādā samaṇesu jātā, etesu ugghāti nighāti hoti;
এতম্পি দিস্ৰা ৰিরমে কথোজ্জং, ন হঞ্ঞদত্থত্থিপসংসলাভা॥
Etampi disvā virame kathojjaṃ, na haññadatthatthipasaṃsalābhā.
৮৩৫.
835.
পসংসিতো ৰা পন তত্থ হোতি, অক্খায ৰাদং পরিসায মজ্ঝে।
Pasaṃsito vā pana tattha hoti, akkhāya vādaṃ parisāya majjhe;
সো হস্সতী উণ্ণমতী 3 চ তেন, পপ্পুয্য তমত্থং যথা মনো অহু॥
So hassatī uṇṇamatī 4 ca tena, pappuyya tamatthaṃ yathā mano ahu.
৮৩৬.
836.
যা উণ্ণতী 5 সাস্স ৰিঘাতভূমি, মানাতিমানং ৰদতে পনেসো।
Yā uṇṇatī 6 sāssa vighātabhūmi, mānātimānaṃ vadate paneso;
এতম্পি দিস্ৰা ন ৰিৰাদযেথ, ন হি তেন সুদ্ধিং কুসলা ৰদন্তি॥
Etampi disvā na vivādayetha, na hi tena suddhiṃ kusalā vadanti.
৮৩৭.
837.
সূরো যথা রাজখাদায পুট্ঠো, অভিগজ্জমেতি পটিসূরমিচ্ছং।
Sūro yathā rājakhādāya puṭṭho, abhigajjameti paṭisūramicchaṃ;
যেনেৰ সো তেন পলেহি সূর, পুব্বেৰ নত্থি যদিদং যুধায॥
Yeneva so tena palehi sūra, pubbeva natthi yadidaṃ yudhāya.
৮৩৮.
838.
যে দিট্ঠিমুগ্গয্হ ৰিৰাদযন্তি 7, ইদমেৰ সচ্চন্তি চ ৰাদযন্তি।
Ye diṭṭhimuggayha vivādayanti 8, idameva saccanti ca vādayanti;
তে ত্ৰং ৰদস্সূ ন হি তেধ অত্থি, ৰাদম্হি জাতে পটিসেনিকত্তা॥
Te tvaṃ vadassū na hi tedha atthi, vādamhi jāte paṭisenikattā.
৮৩৯.
839.
ৰিসেনিকত্ৰা পন যে চরন্তি, দিট্ঠীহি দিট্ঠিং অৰিরুজ্ঝমানা।
Visenikatvā pana ye caranti, diṭṭhīhi diṭṭhiṃ avirujjhamānā;
তেসু ত্ৰং কিং লভেথো পসূর, যেসীধ নত্থী পরমুগ্গহীতং॥
Tesu tvaṃ kiṃ labhetho pasūra, yesīdha natthī paramuggahītaṃ.
৮৪০.
840.
অথ ত্ৰং পৰিতক্কমাগমা, মনসা দিট্ঠিগতানি চিন্তযন্তো।
Atha tvaṃ pavitakkamāgamā, manasā diṭṭhigatāni cintayanto;
ধোনেন যুগং সমাগমা, ন হি ত্ৰং সক্খসি সম্পযাতৰেতি॥
Dhonena yugaṃ samāgamā, na hi tvaṃ sakkhasi sampayātaveti.
পসূরসুত্তং অট্ঠমং নিট্ঠিতং।
Pasūrasuttaṃ aṭṭhamaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / সুত্তনিপাত-অট্ঠকথা • Suttanipāta-aṭṭhakathā / ৮. পসূরসুত্তৰণ্ণনা • 8. Pasūrasuttavaṇṇanā
