| Library / Tipiṭaka / திபிடக • Tipiṭaka / ஸுத்தனிபாதபாளி • Suttanipātapāḷi |
8. பஸூரஸுத்தங்
8. Pasūrasuttaṃ
830.
830.
இதே⁴வ ஸுத்³தி⁴ இதி வாத³யந்தி 1, நாஞ்ஞேஸு த⁴ம்மேஸு விஸுத்³தி⁴மாஹு;
Idheva suddhi iti vādayanti 2, nāññesu dhammesu visuddhimāhu;
யங் நிஸ்ஸிதா தத்த² ஸுப⁴ங் வதா³னா, பச்சேகஸச்சேஸு புதூ² நிவிட்டா².
Yaṃ nissitā tattha subhaṃ vadānā, paccekasaccesu puthū niviṭṭhā.
831.
831.
தே வாத³காமா பரிஸங் விக³ய்ஹ, பா³லங் த³ஹந்தீ மிது² அஞ்ஞமஞ்ஞங்;
Te vādakāmā parisaṃ vigayha, bālaṃ dahantī mithu aññamaññaṃ;
வத³ந்தி தே அஞ்ஞஸிதா கதோ²ஜ்ஜங், பஸங்ஸகாமா குஸலா வதா³னா.
Vadanti te aññasitā kathojjaṃ, pasaṃsakāmā kusalā vadānā.
832.
832.
யுத்தோ கதா²யங் பரிஸாய மஜ்ஜே², பஸங்ஸமிச்ச²ங் வினிகா⁴தி ஹோதி;
Yutto kathāyaṃ parisāya majjhe, pasaṃsamicchaṃ vinighāti hoti;
அபாஹதஸ்மிங் பன மங்கு ஹோதி, நிந்தா³ய ஸோ குப்பதி ரந்த⁴மேஸீ.
Apāhatasmiṃ pana maṅku hoti, nindāya so kuppati randhamesī.
833.
833.
யமஸ்ஸ வாத³ங் பரிஹீனமாஹு, அபாஹதங் பஞ்ஹவிமங்ஸகாஸே;
Yamassa vādaṃ parihīnamāhu, apāhataṃ pañhavimaṃsakāse;
பரிதே³வதி ஸோசதி ஹீனவாதோ³, உபச்சகா³ மந்தி அனுத்து²னாதி.
Paridevati socati hīnavādo, upaccagā manti anutthunāti.
834.
834.
ஏதே விவாதா³ ஸமணேஸு ஜாதா, ஏதேஸு உக்³கா⁴தி நிகா⁴தி ஹோதி;
Ete vivādā samaṇesu jātā, etesu ugghāti nighāti hoti;
ஏதம்பி தி³ஸ்வா விரமே கதோ²ஜ்ஜங், ந ஹஞ்ஞத³த்த²த்தி²பஸங்ஸலாபா⁴.
Etampi disvā virame kathojjaṃ, na haññadatthatthipasaṃsalābhā.
835.
835.
பஸங்ஸிதோ வா பன தத்த² ஹோதி, அக்கா²ய வாத³ங் பரிஸாய மஜ்ஜே²;
Pasaṃsito vā pana tattha hoti, akkhāya vādaṃ parisāya majjhe;
ஸோ ஹஸ்ஸதீ உண்ணமதீ 3 ச தேன, பப்புய்ய தமத்த²ங் யதா² மனோ அஹு.
So hassatī uṇṇamatī 4 ca tena, pappuyya tamatthaṃ yathā mano ahu.
836.
836.
யா உண்ணதீ 5 ஸாஸ்ஸ விகா⁴தபூ⁴மி, மானாதிமானங் வத³தே பனேஸோ;
Yā uṇṇatī 6 sāssa vighātabhūmi, mānātimānaṃ vadate paneso;
ஏதம்பி தி³ஸ்வா ந விவாத³யேத², ந ஹி தேன ஸுத்³தி⁴ங் குஸலா வத³ந்தி.
Etampi disvā na vivādayetha, na hi tena suddhiṃ kusalā vadanti.
837.
837.
ஸூரோ யதா² ராஜகா²தா³ய புட்டோ², அபி⁴க³ஜ்ஜமேதி படிஸூரமிச்ச²ங்;
Sūro yathā rājakhādāya puṭṭho, abhigajjameti paṭisūramicchaṃ;
யேனேவ ஸோ தேன பலேஹி ஸூர, புப்³பே³வ நத்தி² யதி³த³ங் யுதா⁴ய.
Yeneva so tena palehi sūra, pubbeva natthi yadidaṃ yudhāya.
838.
838.
யே தி³ட்டி²முக்³க³ய்ஹ விவாத³யந்தி 7, இத³மேவ ஸச்சந்தி ச வாத³யந்தி;
Ye diṭṭhimuggayha vivādayanti 8, idameva saccanti ca vādayanti;
தே த்வங் வத³ஸ்ஸூ ந ஹி தேத⁴ அத்தி², வாத³ம்ஹி ஜாதே படிஸேனிகத்தா.
Te tvaṃ vadassū na hi tedha atthi, vādamhi jāte paṭisenikattā.
839.
839.
விஸேனிகத்வா பன யே சரந்தி, தி³ட்டீ²ஹி தி³ட்டி²ங் அவிருஜ்ஜ²மானா;
Visenikatvā pana ye caranti, diṭṭhīhi diṭṭhiṃ avirujjhamānā;
தேஸு த்வங் கிங் லபே⁴தோ² பஸூர, யேஸீத⁴ நத்தீ² பரமுக்³க³ஹீதங்.
Tesu tvaṃ kiṃ labhetho pasūra, yesīdha natthī paramuggahītaṃ.
840.
840.
அத² த்வங் பவிதக்கமாக³மா, மனஸா தி³ட்டி²க³தானி சிந்தயந்தோ;
Atha tvaṃ pavitakkamāgamā, manasā diṭṭhigatāni cintayanto;
தோ⁴னேன யுக³ங் ஸமாக³மா, ந ஹி த்வங் ஸக்க²ஸி ஸம்பயாதவேதி.
Dhonena yugaṃ samāgamā, na hi tvaṃ sakkhasi sampayātaveti.
பஸூரஸுத்தங் அட்ட²மங் நிட்டி²தங்.
Pasūrasuttaṃ aṭṭhamaṃ niṭṭhitaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / ஸுத்தனிபாத-அட்ட²கதா² • Suttanipāta-aṭṭhakathā / 8. பஸூரஸுத்தவண்ணனா • 8. Pasūrasuttavaṇṇanā
