| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
៩. បរិបាចិតសិក្ខាបទំ
9. Paripācitasikkhāpadaṃ
១៩២. នវមេ មហានាគេសូតិ មហាអរហន្តេសុ តិដ្ឋមានេសុ សន្តេសុ, ចេតកេ បេស្សភូតេ នវកេ ភិក្ខូ និមន្តេតីតិ អធិប្បាយោ។ ឥតរថាតិ វិភត្តិវិបល្លាសតោ វា បាឋសេសតោ វា អញ្ញេន បការេន។ អន្តរំ មជ្ឈំ បត្តា កថា អន្តរកថាតិ ទស្សេន្តោ អាហ ‘‘អវសាន’’ន្តិអាទិ។ បកិរីយិត្ថាតិ បកតា, ន បកតា វិប្បកតាតិ វុត្តេ ករិយមានកថាវាតិ អាហ ‘‘ករិយមានា ហោតី’’តិ។ អទ្ធច្ឆិកេនាតិ ឧបឌ្ឍចក្ខុនា។ តេហីតិ ថេរេហិ។
192. Navame mahānāgesūti mahāarahantesu tiṭṭhamānesu santesu, cetake pessabhūte navake bhikkhū nimantetīti adhippāyo. Itarathāti vibhattivipallāsato vā pāṭhasesato vā aññena pakārena. Antaraṃ majjhaṃ pattā kathā antarakathāti dassento āha ‘‘avasāna’’ntiādi. Pakirīyitthāti pakatā, na pakatā vippakatāti vutte kariyamānakathāvāti āha ‘‘kariyamānā hotī’’ti. Addhacchikenāti upaḍḍhacakkhunā. Tehīti therehi.
១៩៤. លទ្ធព្ពន្តិ លទ្ធារហំ។ អស្សាតិ ‘‘ភិក្ខុនិបរិបាចិត’’ន្តិបទស្ស។ សម្មា អារភិតព្ពោតិ សមារម្ភោតិ ទស្សេន្តោ អាហ ‘‘សមារទ្ធំ វុច្ចតី’’តិ។ បដិយាទិតស្សាតិ បរិបាចិតស្ស ភត្តស្ស។ គិហីនំ សមារម្ភោតិ គិហិសមារម្ភោ, កត្វត្ថេ ចេតំ សាមិវចនំ។ តតោតិ តតោ ភត្តតោ។ អញ្ញត្រាតិ វិនា។ តមត្ថំ វិវរន្តោ អាហ ‘‘តំ បិណ្ឌបាតំ ឋបេត្វា’’តិ។ បទភាជនេ បន វុត្តន្តិ សម្ពន្ធោ។ ‘‘ញាតកបវារិតេហី’’តិបទំ ‘‘អសមារទ្ធោ’’តិបទេ កត្តា។ អត្ថតោតិ ភិក្ខុនិអបរិបាចិតអត្ថតោ។ តស្មាតិ យស្មា អត្ថតោ សមារទ្ធោវ ហោតិ, តស្មា។
194.Laddhabbanti laddhārahaṃ. Assāti ‘‘bhikkhuniparipācita’’ntipadassa. Sammā ārabhitabboti samārambhoti dassento āha ‘‘samāraddhaṃ vuccatī’’ti. Paṭiyāditassāti paripācitassa bhattassa. Gihīnaṃ samārambhoti gihisamārambho, katvatthe cetaṃ sāmivacanaṃ. Tatoti tato bhattato. Aññatrāti vinā. Tamatthaṃ vivaranto āha ‘‘taṃ piṇḍapātaṃ ṭhapetvā’’ti. Padabhājane pana vuttanti sambandho. ‘‘Ñātakapavāritehī’’tipadaṃ ‘‘asamāraddho’’tipade kattā. Atthatoti bhikkhuniaparipācitaatthato. Tasmāti yasmā atthato samāraddhova hoti, tasmā.
១៩៥. បដិយាទិតន្តិ បដិយត្តំ។ បកតិយា បដិយត្តំ បកតិបដិយត្តន្តិ ទស្សេន្តោ អាហ ‘‘បកតិយា’’តិអាទិ។ មហាបច្ចរិយំ បន វុត្តន្តិ សម្ពន្ធោ។ តស្សាតិ តស្សេវ ភិក្ខុនោ។ អញ្ញស្សាតិ តតោ អញ្ញស្ស ភិក្ខុនោ។
195.Paṭiyāditanti paṭiyattaṃ. Pakatiyā paṭiyattaṃ pakatipaṭiyattanti dassento āha ‘‘pakatiyā’’tiādi. Mahāpaccariyaṃ pana vuttanti sambandho. Tassāti tasseva bhikkhuno. Aññassāti tato aññassa bhikkhuno.
១៩៧. ភិក្ខុនិបរិបាចិតេបីតិ បិសទ្ទោ ភិក្ខុនិអបរិបាចិតេ កា នាម កថាតិ ទស្សេតីតិ។ នវមំ។
197.Bhikkhuniparipācitepīti pisaddo bhikkhuniaparipācite kā nāma kathāti dassetīti. Navamaṃ.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវិភង្គ • Mahāvibhaṅga / ៣. ឱវាទវគ្គោ • 3. Ovādavaggo
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវិភង្គ-អដ្ឋកថា • Mahāvibhaṅga-aṭṭhakathā / ៩. បរិបាចិតសិក្ខាបទវណ្ណនា • 9. Paripācitasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / ៩. បរិបាចិតសិក្ខាបទវណ្ណនា • 9. Paripācitasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / ៩. បរិបាចិតសិក្ខាបទវណ្ណនា • 9. Paripācitasikkhāpadavaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វិមតិវិនោទនី-ដីកា • Vimativinodanī-ṭīkā / ៩. បរិបាចិតសិក្ខាបទវណ្ណនា • 9. Paripācitasikkhāpadavaṇṇanā
