| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၂၂. ဗာဝီသတိမဝဂ္ဂော
22. Bāvīsatimavaggo
(၂၀၈) ၁. ပရိနိဗ္ဗာနကထာ
(208) 1. Parinibbānakathā
၈၉၂. အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ? အာမန္တာ။ အတ္ထိ ကိဉ္စိ သက္ကာယဒိဋ္ဌိံ အပ္ပဟာယ။ပေ.။ အနောတ္တပ္ပံ အပ္ပဟာယ ပရိနိဗ္ဗာနန္တိ? န ဟေဝံ ဝတ္တဗ္ဗေ။ပေ.။။
892. Atthi kiñci saṃyojanaṃ appahāya parinibbānanti? Āmantā. Atthi kiñci sakkāyadiṭṭhiṃ appahāya…pe… anottappaṃ appahāya parinibbānanti? Na hevaṃ vattabbe…pe….
အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ? အာမန္တာ။ အရဟာ သရာဂော။ပေ.။ သကိလေသောတိ? န ဟေဝံ ဝတ္တဗ္ဗေ။ပေ.။ နနု အရဟာ နိရာဂော။ပေ.။ နိက္ကိလေသောတိ? အာမန္တာ။ ဟဉ္စိ အရဟာ နိရာဂော။ပေ.။ နိက္ကိလေသော, နော စ ဝတ ရေ ဝတ္တဗ္ဗေ – ‘‘အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာန’’န္တိ။
Atthi kiñci saṃyojanaṃ appahāya parinibbānanti? Āmantā. Arahā sarāgo…pe… sakilesoti? Na hevaṃ vattabbe…pe… nanu arahā nirāgo…pe… nikkilesoti? Āmantā. Hañci arahā nirāgo…pe… nikkileso, no ca vata re vattabbe – ‘‘atthi kiñci saṃyojanaṃ appahāya parinibbāna’’nti.
၈၉၃. န ဝတ္တဗ္ဗံ – ‘‘အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာန’’န္တိ? အာမန္တာ ။ အရဟာ သဗ္ဗံ ဗုဒ္ဓဝိသယံ ဇာနာတီတိ? န ဟေဝံ ဝတ္တဗ္ဗေ။ တေန ဟိ အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနန္တိ။
893. Na vattabbaṃ – ‘‘atthi kiñci saṃyojanaṃ appahāya parinibbāna’’nti? Āmantā . Arahā sabbaṃ buddhavisayaṃ jānātīti? Na hevaṃ vattabbe. Tena hi atthi kiñci saṃyojanaṃ appahāya parinibbānanti.
ပရိနိဗ္ဗာနကထာ နိဋ္ဌိတာ။
Parinibbānakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁. ပရိနိဗ္ဗာနကထာဝဏ္ဏနာ • 1. Parinibbānakathāvaṇṇanā
