| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
35. පරික්ඛාරනිද්දෙසවණ්ණනා
35. Parikkhāraniddesavaṇṇanā
259-260. ගිරිකූටන්ති මකරදන්තකං. සිබ්බිතුඤ්ච ඡින්දිතුඤ්ච න වට්ටතීති සබ්බත්ථ යොජනා. දණ්ඩෙති ඡත්තදණ්ඩෙ.
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
261. සිබ්බිතුං වා පඤ්ජරං විනන්ධිතුං වා ථිරත්ථං ඡත්තෙ බන්ධිතුං දණ්ඩෙ ලෙඛා වට්ටතීති සම්බන්ධො. සචෙ වුත්තප්පකාරං අකප්පියඡත්තං ලභති, ඝටකම්පි වාළරූපම්පි ඡින්දිත්වා ධාරෙතබ්බං, ලෙඛාපි ඝංසෙත්වා අපනෙතබ්බා, සුත්තකෙන වා දණ්ඩො වෙඨෙතබ්බො.
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
262. අනුවාතං සන්ධාය ‘‘අන්තෙ වා’’ති වුත්තං. ද්වින්නං පට්ටානං සඞ්ඝටිතට්ඨානං සන්ධාය ‘‘පට්ටමුඛෙ වාපී’’ති වුත්තං. වරකසීසාකාරෙන සිබ්බනං සන්ධාය ‘‘වෙණිකා’’ති ච සතපදාකාරෙන සිබ්බනං සන්ධාය ‘‘සඞ්ඛලිකාපි වා’’ති ච වුත්තං. සතපදිසදිසං අඤ්ඤං වා සූචිවිකාරං න කප්පති, පකතිසූචිකම්මමෙව වට්ටතීති අත්ථො. පාළිකණ්ණිකආදිකං චීවරෙ න ච කප්පතීති සම්බන්ධො.
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
263-4. චතුකොණාව (පාරා. අට්ඨ. 1.85) කප්පරෙති සම්බන්ධො. අග්ඝිකන්ති අග්ඝියං චෙතියසදිසං. එත්ථාති ගණ්ඨිපාසකපට්ටෙ. කොණසුත්තා ච පීළකාති න කෙවලං චතුකොණා ගණ්ඨිකපාසකපට්ටාව කප්පන්ති, අථ ඛො දුවිඤ්ඤෙය්යා කොණසුත්තපීළකා ච කප්පරෙති අත්ථො. ගන්ධං තෙලං වාති ගන්ධං වා තෙලං වා.
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
265. රත්තන්ති (පාරා. අට්ඨ. 1.85) රජිතං. අඤ්ඤෙන වාති මුග්ගරාදිනා වා. කත්වාති ඨපෙත්වා. පහාරෙ න ච මුට්ඨිනාති මුට්ඨිනා න පහාරෙය්යාති අත්ථො.
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
266-7. ඡත්තවට්ටියං (පාරා. අට්ඨ. 1.85) ලෙඛං ඨපෙත්වා ධම්මකරණෙ ලෙඛා න වට්ටතීති සම්බන්ධො. කුඤ්චිකාය ච පිප්ඵලෙ ච මණිකා ච පීළකා ච න වට්ටතීති සම්බන්ධො. තත්ථ මණිකාති එකා එව වට්ටමණිකා. පීළකා මුත්තරාජිසදිසා බහූ.
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
268-9. මාලාද්යරණියන්ති (පාරා. අට්ඨ. 1.85) අරණියං මාලාදි වණ්ණමට්ඨං න වට්ටතීති සම්බන්ධො. එවං සබ්බත්ථ. තිපුසීසමයෙ පත්තමණ්ඩලෙ භිත්තිකම්මඤ්ච න වට්ටතීති අත්ථො. හිත්වාති ඨපෙත්වා. සූචිසණ්ඩාසකො (පාරා. අට්ඨ. 1.85) නාම සූචිං ඩංසාපෙත්වා ඝංසිතුං කතො දාරුමයො. ‘‘අනුජානාමි, භික්ඛවෙ, මකරදන්තකං ඡින්දිතු’’න්ති (චූළව. 253) වුත්තත්තා පත්තමණ්ඩලෙ මකරදන්තකං වට්ටති, අඤ්ඤං භිත්තිකම්මාදිවිකාරමෙව න වට්ටති, තස්මා ගිරිකූටං පත්තමණ්ඩලෙ ඨපෙත්වා අවසෙසෙ න වට්ටතීති වෙදිතබ්බං.
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
272. සෙනාසනෙති (පාරා. අට්ඨ. 1.85) පාසාදාදිසෙනාසනෙති අත්ථො.
272.Senāsaneti (pārā. aṭṭha. 1.85) pāsādādisenāsaneti attho.
273. පුමිත්ථිරූපරහිතන්ති පුරිසරූපඉත්ථිරූපරහිතන්ති අත්ථො. පරික්ඛාරවිනිච්ඡයො.
273.Pumitthirūparahitanti purisarūpaitthirūparahitanti attho. Parikkhāravinicchayo.
පරික්ඛාරනිද්දෙසවණ්ණනා නිට්ඨිතා.
Parikkhāraniddesavaṇṇanā niṭṭhitā.
