| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
៣៥. បរិក្ខារនិទ្ទេសវណ្ណនា
35. Parikkhāraniddesavaṇṇanā
២៥៩-២៦០. គិរិកូដន្តិ មករទន្តកំ។ សិព្ពិតុញ្ច ឆិន្ទិតុញ្ច ន វដ្ដតីតិ សព្ពត្ថ យោជនា។ ទណ្ឌេតិ ឆត្តទណ្ឌេ។
259-260.Girikūṭanti makaradantakaṃ. Sibbituñca chindituñca na vaṭṭatīti sabbattha yojanā. Daṇḍeti chattadaṇḍe.
២៦១. សិព្ពិតុំ វា បញ្ជរំ វិនន្ធិតុំ វា ថិរត្ថំ ឆត្តេ ពន្ធិតុំ ទណ្ឌេ លេខា វដ្ដតីតិ សម្ពន្ធោ។ សចេ វុត្តប្បការំ អកប្បិយឆត្តំ លភតិ, ឃដកម្បិ វាឡរូបម្បិ ឆិន្ទិត្វា ធារេតព្ពំ, លេខាបិ ឃំសេត្វា អបនេតព្ពា, សុត្តកេន វា ទណ្ឌោ វេឋេតព្ពោ។
261. Sibbituṃ vā pañjaraṃ vinandhituṃ vā thiratthaṃ chatte bandhituṃ daṇḍe lekhā vaṭṭatīti sambandho. Sace vuttappakāraṃ akappiyachattaṃ labhati, ghaṭakampi vāḷarūpampi chinditvā dhāretabbaṃ, lekhāpi ghaṃsetvā apanetabbā, suttakena vā daṇḍo veṭhetabbo.
២៦២. អនុវាតំ សន្ធាយ ‘‘អន្តេ វា’’តិ វុត្តំ។ ទ្វិន្នំ បដ្ដានំ សង្ឃដិតដ្ឋានំ សន្ធាយ ‘‘បដ្ដមុខេ វាបី’’តិ វុត្តំ។ វរកសីសាការេន សិព្ពនំ សន្ធាយ ‘‘វេណិកា’’តិ ច សតបទាការេន សិព្ពនំ សន្ធាយ ‘‘សង្ខលិកាបិ វា’’តិ ច វុត្តំ។ សតបទិសទិសំ អញ្ញំ វា សូចិវិការំ ន កប្បតិ, បកតិសូចិកម្មមេវ វដ្ដតីតិ អត្ថោ។ បាឡិកណ្ណិកអាទិកំ ចីវរេ ន ច កប្បតីតិ សម្ពន្ធោ។
262. Anuvātaṃ sandhāya ‘‘ante vā’’ti vuttaṃ. Dvinnaṃ paṭṭānaṃ saṅghaṭitaṭṭhānaṃ sandhāya ‘‘paṭṭamukhe vāpī’’ti vuttaṃ. Varakasīsākārena sibbanaṃ sandhāya ‘‘veṇikā’’ti ca satapadākārena sibbanaṃ sandhāya ‘‘saṅkhalikāpi vā’’ti ca vuttaṃ. Satapadisadisaṃ aññaṃ vā sūcivikāraṃ na kappati, pakatisūcikammameva vaṭṭatīti attho. Pāḷikaṇṇikaādikaṃ cīvare na ca kappatīti sambandho.
២៦៣-៤. ចតុកោណាវ (បារា. អដ្ឋ. ១.៨៥) កប្បរេតិ សម្ពន្ធោ។ អគ្ឃិកន្តិ អគ្ឃិយំ ចេតិយសទិសំ។ ឯត្ថាតិ គណ្ឋិបាសកបដ្ដេ។ កោណសុត្តា ច បីឡកាតិ ន កេវលំ ចតុកោណា គណ្ឋិកបាសកបដ្ដាវ កប្បន្តិ, អថ ខោ ទុវិញ្ញេយ្យា កោណសុត្តបីឡកា ច កប្បរេតិ អត្ថោ។ គន្ធំ តេលំ វាតិ គន្ធំ វា តេលំ វា។
263-4. Catukoṇāva (pārā. aṭṭha. 1.85) kappareti sambandho. Agghikanti agghiyaṃ cetiyasadisaṃ. Etthāti gaṇṭhipāsakapaṭṭe. Koṇasuttā ca pīḷakāti na kevalaṃ catukoṇā gaṇṭhikapāsakapaṭṭāva kappanti, atha kho duviññeyyā koṇasuttapīḷakā ca kappareti attho. Gandhaṃ telaṃ vāti gandhaṃ vā telaṃ vā.
២៦៥. រត្តន្តិ (បារា. អដ្ឋ. ១.៨៥) រជិតំ។ អញ្ញេន វាតិ មុគ្គរាទិនា វា។ កត្វាតិ ឋបេត្វា។ បហារេ ន ច មុដ្ឋិនាតិ មុដ្ឋិនា ន បហារេយ្យាតិ អត្ថោ។
265.Rattanti (pārā. aṭṭha. 1.85) rajitaṃ. Aññena vāti muggarādinā vā. Katvāti ṭhapetvā. Pahāre na ca muṭṭhināti muṭṭhinā na pahāreyyāti attho.
២៦៦-៧. ឆត្តវដ្ដិយំ (បារា. អដ្ឋ. ១.៨៥) លេខំ ឋបេត្វា ធម្មករណេ លេខា ន វដ្ដតីតិ សម្ពន្ធោ។ កុញ្ចិកាយ ច បិប្ផលេ ច មណិកា ច បីឡកា ច ន វដ្ដតីតិ សម្ពន្ធោ។ តត្ថ មណិកាតិ ឯកា ឯវ វដ្ដមណិកា។ បីឡកា មុត្តរាជិសទិសា ពហូ។
266-7. Chattavaṭṭiyaṃ (pārā. aṭṭha. 1.85) lekhaṃ ṭhapetvā dhammakaraṇe lekhā na vaṭṭatīti sambandho. Kuñcikāya ca pipphale ca maṇikā ca pīḷakā ca na vaṭṭatīti sambandho. Tattha maṇikāti ekā eva vaṭṭamaṇikā. Pīḷakā muttarājisadisā bahū.
២៦៨-៩. មាលាទ្យរណិយន្តិ (បារា. អដ្ឋ. ១.៨៥) អរណិយំ មាលាទិ វណ្ណមដ្ឋំ ន វដ្ដតីតិ សម្ពន្ធោ។ ឯវំ សព្ពត្ថ។ តិបុសីសមយេ បត្តមណ្ឌលេ ភិត្តិកម្មញ្ច ន វដ្ដតីតិ អត្ថោ។ ហិត្វាតិ ឋបេត្វា។ សូចិសណ្ឌាសកោ (បារា. អដ្ឋ. ១.៨៥) នាម សូចិំ ឌំសាបេត្វា ឃំសិតុំ កតោ ទារុមយោ។ ‘‘អនុជានាមិ, ភិក្ខវេ, មករទន្តកំ ឆិន្ទិតុ’’ន្តិ (ចូឡវ. ២៥៣) វុត្តត្តា បត្តមណ្ឌលេ មករទន្តកំ វដ្ដតិ, អញ្ញំ ភិត្តិកម្មាទិវិការមេវ ន វដ្ដតិ, តស្មា គិរិកូដំ បត្តមណ្ឌលេ ឋបេត្វា អវសេសេ ន វដ្ដតីតិ វេទិតព្ពំ។
268-9.Mālādyaraṇiyanti (pārā. aṭṭha. 1.85) araṇiyaṃ mālādi vaṇṇamaṭṭhaṃ na vaṭṭatīti sambandho. Evaṃ sabbattha. Tipusīsamaye pattamaṇḍale bhittikammañca na vaṭṭatīti attho. Hitvāti ṭhapetvā. Sūcisaṇḍāsako (pārā. aṭṭha. 1.85) nāma sūciṃ ḍaṃsāpetvā ghaṃsituṃ kato dārumayo. ‘‘Anujānāmi, bhikkhave, makaradantakaṃ chinditu’’nti (cūḷava. 253) vuttattā pattamaṇḍale makaradantakaṃ vaṭṭati, aññaṃ bhittikammādivikārameva na vaṭṭati, tasmā girikūṭaṃ pattamaṇḍale ṭhapetvā avasese na vaṭṭatīti veditabbaṃ.
២៧២. សេនាសនេតិ (បារា. អដ្ឋ. ១.៨៥) បាសាទាទិសេនាសនេតិ អត្ថោ។
272.Senāsaneti (pārā. aṭṭha. 1.85) pāsādādisenāsaneti attho.
២៧៣. បុមិត្ថិរូបរហិតន្តិ បុរិសរូបឥត្ថិរូបរហិតន្តិ អត្ថោ។ បរិក្ខារវិនិច្ឆយោ។
273.Pumitthirūparahitanti purisarūpaitthirūparahitanti attho. Parikkhāravinicchayo.
បរិក្ខារនិទ្ទេសវណ្ណនា និដ្ឋិតា។
Parikkhāraniddesavaṇṇanā niṭṭhitā.
