| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
१०. परिहानसुत्तं
10. Parihānasuttaṃ
७९. वुत्तञ्हेतं भगवता, वुत्तमरहताति मे सुतं –
79. Vuttañhetaṃ bhagavatā, vuttamarahatāti me sutaṃ –
‘‘तयोमे, भिक्खवे, धम्मा सेखस्स भिक्खुनो परिहानाय संवत्तन्ति। कतमे तयो? इध, भिक्खवे, सेखो भिक्खु कम्मारामो होति, कम्मरतो, कम्मारामतमनुयुत्तो; भस्सारामो होति, भस्सरतो, भस्सारामतमनुयुत्तो; निद्दारामो होति, निद्दारतो, निद्दारामतमनुयुत्तो। इमे खो, भिक्खवे, तयो धम्मा सेखस्स भिक्खुनो परिहानाय संवत्तन्ति।
‘‘Tayome, bhikkhave, dhammā sekhassa bhikkhuno parihānāya saṃvattanti. Katame tayo? Idha, bhikkhave, sekho bhikkhu kammārāmo hoti, kammarato, kammārāmatamanuyutto; bhassārāmo hoti, bhassarato, bhassārāmatamanuyutto; niddārāmo hoti, niddārato, niddārāmatamanuyutto. Ime kho, bhikkhave, tayo dhammā sekhassa bhikkhuno parihānāya saṃvattanti.
‘‘तयोमे, भिक्खवे, धम्मा सेखस्स भिक्खुनो अपरिहानाय संवत्तन्ति। कतमे तयो? इध, भिक्खवे, सेखो भिक्खु न कम्मारामो होति, न कम्मरतो, न कम्मारामतमनुयुत्तो; न भस्सारामो होति, न भस्सरतो, न भस्सारामतमनुयुत्तो; न निद्दारामो होति, न निद्दारतो , न निद्दारामतमनुयुत्तो। इमे खो, भिक्खवे, तयो धम्मा सेखस्स भिक्खुनो अपरिहानाय संवत्तन्ती’’ति। एतमत्थं भगवा अवोच। तत्थेतं इति वुच्चति –
‘‘Tayome, bhikkhave, dhammā sekhassa bhikkhuno aparihānāya saṃvattanti. Katame tayo? Idha, bhikkhave, sekho bhikkhu na kammārāmo hoti, na kammarato, na kammārāmatamanuyutto; na bhassārāmo hoti, na bhassarato, na bhassārāmatamanuyutto; na niddārāmo hoti, na niddārato , na niddārāmatamanuyutto. Ime kho, bhikkhave, tayo dhammā sekhassa bhikkhuno aparihānāya saṃvattantī’’ti. Etamatthaṃ bhagavā avoca. Tatthetaṃ iti vuccati –
अभब्बो तादिसो भिक्खु, फुट्ठुं सम्बोधिमुत्तमं॥
Abhabbo tādiso bhikkhu, phuṭṭhuṃ sambodhimuttamaṃ.
‘‘तस्मा हि अप्पकिच्चस्स, अप्पमिद्धो अनुद्धतो।
‘‘Tasmā hi appakiccassa, appamiddho anuddhato;
भब्बो सो तादिसो भिक्खु, फुट्ठुं सम्बोधिमुत्तम’’न्ति॥
Bhabbo so tādiso bhikkhu, phuṭṭhuṃ sambodhimuttama’’nti.
अयम्पि अत्थो वुत्तो भगवता, इति मे सुतन्ति। दसमं।
Ayampi attho vutto bhagavatā, iti me sutanti. Dasamaṃ.
ततियो वग्गो निट्ठितो।
Tatiyo vaggo niṭṭhito.
तस्सुद्दानं –
Tassuddānaṃ –
द्वे दिट्ठी निस्सरणं रूपं, पुत्तो अवुट्ठिकेन च।
Dve diṭṭhī nissaraṇaṃ rūpaṃ, putto avuṭṭhikena ca;
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १०. परिहानसुत्तवण्णना • 10. Parihānasuttavaṇṇanā
