| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
४. चतुत्थवग्गो
4. Catutthavaggo
१. वितक्कसुत्तं
1. Vitakkasuttaṃ
८०. वुत्तञ्हेतं भगवता, वुत्तमरहताति मे सुतं –
80. Vuttañhetaṃ bhagavatā, vuttamarahatāti me sutaṃ –
‘‘तयोमे, भिक्खवे, अकुसलवितक्का। कतमे तयो? अनवञ्ञत्तिपटिसंयुत्तो वितक्को, लाभसक्कारसिलोकपटिसंयुत्तो वितक्को, परानुद्दयतापटिसंयुत्तो वितक्को। इमे खो, भिक्खवे, तयो अकुसलवितक्का’’ति । एतमत्थं भगवा अवोच। तत्थेतं इति वुच्चति –
‘‘Tayome, bhikkhave, akusalavitakkā. Katame tayo? Anavaññattipaṭisaṃyutto vitakko, lābhasakkārasilokapaṭisaṃyutto vitakko, parānuddayatāpaṭisaṃyutto vitakko. Ime kho, bhikkhave, tayo akusalavitakkā’’ti . Etamatthaṃ bhagavā avoca. Tatthetaṃ iti vuccati –
‘‘अनवञ्ञत्तिसंयुत्तो, लाभसक्कारगारवो।
‘‘Anavaññattisaṃyutto, lābhasakkāragāravo;
सहनन्दी अमच्चेहि, आरा संयोजनक्खया॥
Sahanandī amaccehi, ārā saṃyojanakkhayā.
भब्बो सो तादिसो भिक्खु, फुट्ठुं सम्बोधिमुत्तम’’न्ति॥
Bhabbo so tādiso bhikkhu, phuṭṭhuṃ sambodhimuttama’’nti.
अयम्पि अत्थो वुत्तो भगवता, इति मे सुतन्ति। पठमं।
Ayampi attho vutto bhagavatā, iti me sutanti. Paṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १. वितक्कसुत्तवण्णना • 1. Vitakkasuttavaṇṇanā
