| Library / Tipiṭaka / तिपिटक • Tipiṭaka / विमानवत्थुपाळि • Vimānavatthupāḷi |
१०. पारिच्छत्तकविमानवत्थु
10. Pāricchattakavimānavatthu
६८०.
680.
‘‘पारिच्छत्तके कोविळारे, रमणीये मनोरमे।
‘‘Pāricchattake koviḷāre, ramaṇīye manorame;
दिब्बमालं गन्थमाना, गायन्ती सम्पमोदसि॥
Dibbamālaṃ ganthamānā, gāyantī sampamodasi.
६८१.
681.
‘‘तस्सा ते नच्चमानाय, अङ्गमङ्गेहि सब्बसो।
‘‘Tassā te naccamānāya, aṅgamaṅgehi sabbaso;
दिब्बा सद्दा निच्छरन्ति, सवनीया मनोरमा॥
Dibbā saddā niccharanti, savanīyā manoramā.
६८२.
682.
‘‘तस्सा ते नच्चमानाय, अङ्गमङ्गेहि सब्बसो।
‘‘Tassā te naccamānāya, aṅgamaṅgehi sabbaso;
दिब्बा गन्धा पवायन्ति, सुचिगन्धा मनोरमा॥
Dibbā gandhā pavāyanti, sucigandhā manoramā.
६८३.
683.
‘‘विवत्तमाना कायेन, या वेणीसु पिळन्धना॥
‘‘Vivattamānā kāyena, yā veṇīsu piḷandhanā.
तेसं सुय्यति निग्घोसो, तूरिये पञ्चङ्गिके यथा॥
Tesaṃ suyyati nigghoso, tūriye pañcaṅgike yathā.
६८४.
684.
तेसं सुय्यति निग्घोसो, तूरिये पञ्चङ्गिके यथा॥
Tesaṃ suyyati nigghoso, tūriye pañcaṅgike yathā.
६८५.
685.
‘‘यापि ते सिरस्मिं माला, सुचिगन्धा मनोरमा।
‘‘Yāpi te sirasmiṃ mālā, sucigandhā manoramā;
वाति गन्धो दिसा सब्बा, रुक्खो मञ्जूसको यथा॥
Vāti gandho disā sabbā, rukkho mañjūsako yathā.
६८६.
686.
देवते पुच्छिताचिक्ख, किस्स कम्मस्सिदं फल’’न्ति॥
Devate pucchitācikkha, kissa kammassidaṃ phala’’nti.
६८७.
687.
‘‘पभस्सरं अच्चिमन्तं, वण्णगन्धेन संयुतं।
‘‘Pabhassaraṃ accimantaṃ, vaṇṇagandhena saṃyutaṃ;
असोकपुप्फमालाहं, बुद्धस्स उपनामयिं॥
Asokapupphamālāhaṃ, buddhassa upanāmayiṃ.
६८८.
688.
‘‘ताहं कम्मं करित्वान, कुसलं बुद्धवण्णितं।
‘‘Tāhaṃ kammaṃ karitvāna, kusalaṃ buddhavaṇṇitaṃ;
अपेतसोका सुखिता, सम्पमोदामनामया’’ति॥
Apetasokā sukhitā, sampamodāmanāmayā’’ti.
पारिच्छत्तकविमानं दसमं।
Pāricchattakavimānaṃ dasamaṃ.
पारिच्छत्तकवग्गो ततियो निट्ठितो।
Pāricchattakavaggo tatiyo niṭṭhito.
तस्सुद्दानं –
Tassuddānaṃ –
उळारो उच्छु पल्लङ्को, लता च गुत्तिलेन च।
Uḷāro ucchu pallaṅko, latā ca guttilena ca;
दद्दल्लपेसमल्लिका, विसालक्खि पारिच्छत्तको।
Daddallapesamallikā, visālakkhi pāricchattako;
वग्गो तेन पवुच्चतीति॥
Vaggo tena pavuccatīti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / विमानवत्थु-अट्ठकथा • Vimānavatthu-aṭṭhakathā / १०. पारिच्छत्तकविमानवण्णना • 10. Pāricchattakavimānavaṇṇanā
