| Library / Tipiṭaka / တိပိဋက • Tipiṭaka / သုတ္တနိပာတ-အဋ္ဌကထာ • Suttanipāta-aṭṭhakathā |
ပာရာယနတ္ထုတိဂာထာဝဏ္ဏနာ
Pārāyanatthutigāthāvaṇṇanā
ဣတော ပရံ သင္ဂီတိကာရာ ဒေသနံ ထောမေန္တာ ‘‘ဣဒမဝောစ ဘဂဝာ’’တိအာဒိမာဟံသု။ တတ္ထ ဣဒမဝောစာတိ ဣဒံ ပရာယနံ အဝောစ။ ပရိစာရကသောဠသာနန္တိ ဗာဝရိသ္သ ပရိစာရကေန ပိင္ဂိယေန သဟ သောဠသန္နံ ဗုဒ္ဓသ္သ ဝာ ဘဂဝတော ပရိစာရကာနံ သောဠသန္နန္တိ ပရိစာရကသောဠသန္နံ။ တေ ဧဝ စ ဗ္ရာဟ္မဏာ။ တတ္ထ သောဠသပရိသာ ပန ပုရတော စ ပစ္ဆတော စ ဝာမပသ္သတော စ ဒက္ခိဏပသ္သတော စ ဆ ဆ ယောဇနာနိ နိသိန္နာ ဥဇုကေန ဒ္ဝာဒသယောဇနိကာ အဟောသိ။ အဇ္ဈိဋ္ဌောတိ ယာစိတော အတ္ထမညာယာတိ ပာဠိအတ္ထမညာယ။ ဓမ္မမညာယာတိ ပာဠိမညာယ။ ပာရာယနန္တိ ဧဝံ ဣမသ္သ ဓမ္မပရိယာယသ္သ အဓိဝစနံ အာရောပေတ္ဝာ တေသံ ဗ္ရာဟ္မဏာနံ နာမာနိ ကိတ္တယန္တာ ‘‘အဇိတော တိသ္သမေတ္တေယ္ယော။ပေ.။ ဗုဒ္ဓသေဋ္ဌံ ဥပာဂမု’’န္တိ အာဟံသု။
Ito paraṃ saṅgītikārā desanaṃ thomentā ‘‘idamavoca bhagavā’’tiādimāhaṃsu. Tattha idamavocāti idaṃ parāyanaṃ avoca. Paricārakasoḷasānanti bāvarissa paricārakena piṅgiyena saha soḷasannaṃ buddhassa vā bhagavato paricārakānaṃ soḷasannanti paricārakasoḷasannaṃ. Te eva ca brāhmaṇā. Tattha soḷasaparisā pana purato ca pacchato ca vāmapassato ca dakkhiṇapassato ca cha cha yojanāni nisinnā ujukena dvādasayojanikā ahosi. Ajjhiṭṭhoti yācito atthamaññāyāti pāḷiatthamaññāya. Dhammamaññāyāti pāḷimaññāya. Pārāyananti evaṃ imassa dhammapariyāyassa adhivacanaṃ āropetvā tesaṃ brāhmaṇānaṃ nāmāni kittayantā ‘‘ajito tissametteyyo…pe… buddhaseṭṭhaṃ upāgamu’’nti āhaṃsu.
၁၁၃၁-၇. တတ္ထ သမ္ပန္နစရဏန္တိ နိဗ္ဗာနပဒဋ္ဌာနဘူတေန ပာတိမောက္ခသီလာဒိနာ သမ္ပန္နံ။ ဣသိန္တိ မဟေသိံ။ သေသံ ပာကဋမေဝ။ တတော ပရံ ဗ္ရဟ္မစရိယမစရိံသူတိ မဂ္ဂဗ္ရဟ္မစရိယံ အစရိံသု။ တသ္မာ ပာရာယနန္တိ တသ္သ ပာရဘူတသ္သ နိဗ္ဗာနသ္သ အယနန္တိ ဝုတ္တံ ဟောတိ။
1131-7. Tattha sampannacaraṇanti nibbānapadaṭṭhānabhūtena pātimokkhasīlādinā sampannaṃ. Isinti mahesiṃ. Sesaṃ pākaṭameva. Tato paraṃ brahmacariyamacariṃsūti maggabrahmacariyaṃ acariṃsu. Tasmā pārāyananti tassa pārabhūtassa nibbānassa ayananti vuttaṃ hoti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / သုတ္တနိပာတပာဠိ • Suttanipātapāḷi / ပာရာယနတ္ထုတိဂာထာ • Pārāyanatthutigāthā
