| Library / Tipiṭaka / ਤਿਪਿਟਕ • Tipiṭaka / ਚੂਲ਼ਨਿਦ੍ਦੇਸ-ਅਟ੍ਠਕਥਾ • Cūḷaniddesa-aṭṭhakathā |
੧੭. ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸવਣ੍ਣਨਾ
17. Pārāyanatthutigāthāniddesavaṇṇanā
੯੩. ਇਤੋ ਪਰਂ ਸਙ੍ਗੀਤਿਕਾਰਾ ਦੇਸਨਂ ਥੋਮੇਨ੍ਤਾ ‘‘ਇਦਮવੋਚ ਭਗવਾ’’ਤਿਆਦਿਮਾਹਂਸੁ। ਤਤ੍ਥ ਇਦਮવੋਚਾਤਿ ਇਦਂ ਪਾਰਾਯਨਂ ਅવੋਚ। ਪਰਿਚਾਰਕਸੋਲ਼ਸਾਨਨ੍ਤਿ ਬਾવਰਿਸ੍ਸ ਪਰਿਚਾਰਕੇਨ ਪਿਙ੍ਗਿਯੇਨ ਸਹ ਸੋਲ਼ਸਾਨਂ, ਬੁਦ੍ਧਸ੍ਸ વਾ ਭਗવਤੋ ਪਰਿਚਾਰਕਾਨਂ ਸੋਲ਼ਸਾਨਨ੍ਤਿ ਪਰਿਚਾਰਕਸੋਲ਼ਸਾਨਂ। ਤੇ ਏવ ਚ ਬ੍ਰਾਹ੍ਮਣਾ ਤਤ੍ਥ ਸੋਲ਼ਸਸੁ ਦਿਸਾਸੁ ਪੁਰਤੋ ਚ ਪਚ੍ਛਤੋ ਚ વਾਮਪਸ੍ਸਤੋ ਚ ਦਕ੍ਖਿਣਪਸ੍ਸਤੋ ਚ ਛ ਛ ਯੋਜਨਾ ਨਿਸਿਨ੍ਨਾ ਉਜੁਕੇਨ ਦ੍વਾਦਸਯੋਜਨਿਕਾ ਅਹੋਸਿ। ਅਜ੍ਝਿਟ੍ਠੋਤਿ ਯਾਚਿਤੋ।
93. Ito paraṃ saṅgītikārā desanaṃ thomentā ‘‘idamavoca bhagavā’’tiādimāhaṃsu. Tattha idamavocāti idaṃ pārāyanaṃ avoca. Paricārakasoḷasānanti bāvarissa paricārakena piṅgiyena saha soḷasānaṃ, buddhassa vā bhagavato paricārakānaṃ soḷasānanti paricārakasoḷasānaṃ. Te eva ca brāhmaṇā tattha soḷasasu disāsu purato ca pacchato ca vāmapassato ca dakkhiṇapassato ca cha cha yojanā nisinnā ujukena dvādasayojanikā ahosi. Ajjhiṭṭhoti yācito.
੯੪-੯੭. ਅਤ੍ਥਮਞ੍ਞਾਯਾਤਿ ਪਾਲ਼ਿਅਤ੍ਥਮਞ੍ਞਾਯ। ਧਮ੍ਮਮਞ੍ਞਾਯਾਤਿ ਪਾਲ਼ਿਮਞ੍ਞਾਯ। ਪਾਰਾਯਨਨ੍ਤਿ ਏવਂ ਇਮਸ੍ਸ ਧਮ੍ਮਪਰਿਯਾਯਸ੍ਸ ਅਧਿવਚਨਂ ਆਰੋਪੇਤ੍વਾ ਤੇਸਂ ਬ੍ਰਾਹ੍ਮਣਾਨਂ ਨਾਮਾਨਿ ਕਿਤ੍ਤਯਨ੍ਤੋ ‘‘ਅਜਿਤੋ…ਪੇ॰… ਬੁਦ੍ਧਸੇਟ੍ਠਮੁਪਾਗਮੁ’’ਨ੍ਤਿ ਆਹਂਸੁ। ਤਤ੍ਥ ਸਮ੍ਪਨ੍ਨਚਰਣਨ੍ਤਿ ਨਿਬ੍ਬਾਨਪਦਟ੍ਠਾਨਭੂਤੇਨ ਪਾਤਿਮੋਕ੍ਖਸੀਲਾਦਿਨਾ ਸਮ੍ਪਨ੍ਨਂ। ਇਸਿਨ੍ਤਿ ਮਹੇਸਿਂ।
94-97.Atthamaññāyāti pāḷiatthamaññāya. Dhammamaññāyāti pāḷimaññāya. Pārāyananti evaṃ imassa dhammapariyāyassa adhivacanaṃ āropetvā tesaṃ brāhmaṇānaṃ nāmāni kittayanto ‘‘ajito…pe… buddhaseṭṭhamupāgamu’’nti āhaṃsu. Tattha sampannacaraṇanti nibbānapadaṭṭhānabhūtena pātimokkhasīlādinā sampannaṃ. Isinti mahesiṃ.
ਨਿਦ੍ਦੇਸੇ ਉਪਾਗਮਿਂਸੂਤਿ ਸਮੀਪਂ ਗਮਿਂਸੁ। ਉਪਸਙ੍ਕਮਿਂਸੂਤਿ ਅવਿਦੂਰਟ੍ਠਾਨਂ ਗਮਿਂਸੁ। ਪਯਿਰੁਪਾਸਿਂਸੂਤਿ ਸਮੀਪੇ ਨਿਸੀਦਿਂਸੁ। ਪਰਿਪੁਚ੍ਛਿਂਸੂਤਿ ਪਰਿਪੁਚ੍ਛਂ ਆਹਰਿਂਸੁ। ਪਰਿਗਣ੍ਹਿਂਸੂਤਿ ਤੁਲਯਿਂਸੁ। ‘‘ਚੋਦਯਿਂਸੂ’’ਤਿ ਕੇਚਿ।
Niddese upāgamiṃsūti samīpaṃ gamiṃsu. Upasaṅkamiṃsūti avidūraṭṭhānaṃ gamiṃsu. Payirupāsiṃsūti samīpe nisīdiṃsu. Paripucchiṃsūti paripucchaṃ āhariṃsu. Parigaṇhiṃsūti tulayiṃsu. ‘‘Codayiṃsū’’ti keci.
ਸੀਲਾਚਾਰਨਿਬ੍ਬਤ੍ਤੀਤਿ ਉਤ੍ਤਮਸੀਲਾਚਾਰਨਿਬ੍ਬਤ੍ਤਿ, ਮਗ੍ਗੇਨ ਨਿਪ੍ਫਨ੍ਨਸੀਲਨ੍ਤਿ ਅਤ੍ਥੋ।
Sīlācāranibbattīti uttamasīlācāranibbatti, maggena nipphannasīlanti attho.
ਗਮ੍ਭੀਰੇਤਿ ਉਤ੍ਤਾਨਭਾવਪਟਿਕ੍ਖੇਪવਚਨਂ। ਦੁਦ੍ਦਸੇਤਿ ਗਮ੍ਭੀਰਤ੍ਤਾ ਦੁਦ੍ਦਸੇ, ਦੁਕ੍ਖੇਨ ਦਟ੍ਠਬ੍ਬੇ, ਨ ਸਕ੍ਕਾ ਸੁਖੇਨ ਦਟ੍ਠੁਂ। ਦੁਦ੍ਦਸਤ੍ਤਾવ ਦੁਰਨੁਬੋਧੇ, ਦੁਕ੍ਖੇਨ ਅવਬੁਜ੍ਝਿਤਬ੍ਬੇ, ਨ ਸਕ੍ਕਾ ਸੁਖੇਨ ਅવਬੁਜ੍ਝਿਤੁਂ। ਸਨ੍ਤੇਤਿ ਨਿਬ੍ਬੁਤੇ। ਪਣੀਤੇਤਿ ਅਤਪ੍ਪਕੇ। ਇਦਂ ਦ੍વਯਂ ਲੋਕੁਤ੍ਤਰਮੇવ ਸਨ੍ਧਾਯ વੁਤ੍ਤਂ। ਅਤਕ੍ਕਾવਚਰੇਤਿ ਤਕ੍ਕੇਨ ਨ ਅવਚਰਿਤਬ੍ਬੇ ਨ ਓਗਾਹਿਤਬ੍ਬੇ ਞਾਣੇਨੇવ ਅવਚਰਿਤਬ੍ਬੇ। ਨਿਪੁਣੇਤਿ ਸਣ੍ਹੇ। ਪਣ੍ਡਿਤવੇਦਨੀਯੇਤਿ ਸਮ੍ਮਾ ਪਟਿਪਨ੍ਨੇਹਿ ਪਣ੍ਡਿਤੇਹਿ વੇਦਿਤਬ੍ਬੇ।
Gambhīreti uttānabhāvapaṭikkhepavacanaṃ. Duddaseti gambhīrattā duddase, dukkhena daṭṭhabbe, na sakkā sukhena daṭṭhuṃ. Duddasattāva duranubodhe, dukkhena avabujjhitabbe, na sakkā sukhena avabujjhituṃ. Santeti nibbute. Paṇīteti atappake. Idaṃ dvayaṃ lokuttarameva sandhāya vuttaṃ. Atakkāvacareti takkena na avacaritabbe na ogāhitabbe ñāṇeneva avacaritabbe. Nipuṇeti saṇhe. Paṇḍitavedanīyeti sammā paṭipannehi paṇḍitehi veditabbe.
੯੮. ਤੋਸੇਸੀਤਿ ਤੁਟ੍ਠਿਂ ਆਪਾਦੇਸਿ। વਿਤੋਸੇਸੀਤਿ વਿવਿਧਾ ਤੇਸਂ ਸੋਮਨਸ੍ਸਂ ਉਪ੍ਪਾਦੇਸਿ। ਪਸਾਦੇਸੀਤਿ ਤੇਸਂ ਚਿਤ੍ਤਪ੍ਪਸਾਦਂ ਅਕਾਸਿ । ਆਰਾਧੇਸੀਤਿ ਆਰਾਧਯਿ ਸਿਦ੍ਧਿਂ ਪਾਪੇਸਿ। ਅਤ੍ਤਮਨੇ ਅਕਾਸੀਤਿ ਸੋਮਨਸ੍ਸવਸੇਨ ਸਕਮਨੇ ਅਕਾਸਿ।
98.Tosesīti tuṭṭhiṃ āpādesi. Vitosesīti vividhā tesaṃ somanassaṃ uppādesi. Pasādesīti tesaṃ cittappasādaṃ akāsi . Ārādhesīti ārādhayi siddhiṃ pāpesi. Attamane akāsīti somanassavasena sakamane akāsi.
੯੯. ਤਤੋ ਪਰਂ ਬ੍ਰਹ੍ਮਚਰਿਯਮਚਰਿਂਸੂਤਿ ਮਗ੍ਗਬ੍ਰਹ੍ਮਚਰਿਯਂ ਅਚਰਿਂਸੁ।
99. Tato paraṃ brahmacariyamacariṃsūti maggabrahmacariyaṃ acariṃsu.
੧੦੧. ਤਸ੍ਮਾ ਪਾਰਾਯਨਨ੍ਤਿ ਤਸ੍ਸ ਪਾਰਭੂਤਸ੍ਸ ਨਿਬ੍ਬਾਨਸ੍ਸ ਆਯਤਨਨ੍ਤਿ વੁਤ੍ਤਂ ਹੋਤਿ।
101.Tasmā pārāyananti tassa pārabhūtassa nibbānassa āyatananti vuttaṃ hoti.
ਸਦ੍ਧਮ੍ਮਪ੍ਪਜ੍ਜੋਤਿਕਾਯ ਚੂਲ਼ਨਿਦ੍ਦੇਸ-ਅਟ੍ਠਕਥਾਯ
Saddhammappajjotikāya cūḷaniddesa-aṭṭhakathāya
ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Pārāyanatthutigāthāniddesavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਚੂਲ਼ਨਿਦ੍ਦੇਸਪਾਲ਼ਿ • Cūḷaniddesapāḷi
੧੭. ਪਾਰਾਯਨਤ੍ਥੁਤਿਗਾਥਾ • 17. Pārāyanatthutigāthā
੧੭. ਪਾਰਾਯਨਤ੍ਥੁਤਿਗਾਥਾਨਿਦ੍ਦੇਸੋ • 17. Pārāyanatthutigāthāniddeso
