| Library / Tipiṭaka / තිපිටක • Tipiṭaka / ඛුද්දසික්ඛා-මූලසික්ඛා • Khuddasikkhā-mūlasikkhā |
1. පාරාජිකනිද්දෙසො
1. Pārājikaniddeso
1.
1.
සං නිමිත්තං පවෙසන්තො, භික්ඛු මග්ගත්තයෙ චුතො;
Saṃ nimittaṃ pavesanto, bhikkhu maggattaye cuto;
පවෙසනට්ඨිතුද්ධාර-පවිට්ඨෙ චෙපි සාදියං.
Pavesanaṭṭhituddhāra-paviṭṭhe cepi sādiyaṃ.
2.
2.
අදින්නං මානුසං භණ්ඩං, ථෙය්යායෙකෙන ආදියං;
Adinnaṃ mānusaṃ bhaṇḍaṃ, theyyāyekena ādiyaṃ;
පඤ්චවීසාවහාරෙසු, ගරුකං චෙ චුතො භවෙ.
Pañcavīsāvahāresu, garukaṃ ce cuto bhave.
3.
3.
ආදියන්තො හරන්තොව-හරන්තොපිරියාපථං;
Ādiyanto harantova-harantopiriyāpathaṃ;
විකොපෙන්තො තථා ඨානා, චාවෙන්තොපි පරාජිකො.
Vikopento tathā ṭhānā, cāventopi parājiko.
4.
4.
තත්ථ නානෙකභණ්ඩානං, පඤ්චකානං වසා පන;
Tattha nānekabhaṇḍānaṃ, pañcakānaṃ vasā pana;
අවහාරා දසඤ්චෙති, විඤ්ඤාතබ්බා විභාවිනා.
Avahārā dasañceti, viññātabbā vibhāvinā.
5.
5.
සාහත්ථාණත්තිකො චෙව, නිස්සග්ගො චාත්ථසාධකො;
Sāhatthāṇattiko ceva, nissaggo cātthasādhako;
ධුරනික්ඛෙපනඤ්චෙව, ඉදං සාහත්ථපඤ්චකං.
Dhuranikkhepanañceva, idaṃ sāhatthapañcakaṃ.
6.
6.
පුබ්බසහප්පයොගො ච, සංවිධාහරණම්පි ච;
Pubbasahappayogo ca, saṃvidhāharaṇampi ca;
සඞ්කෙතකම්මං නිමිත්තං, පුබ්බප්පයොගපඤ්චකං.
Saṅketakammaṃ nimittaṃ, pubbappayogapañcakaṃ.
7.
7.
ථෙය්යාපසය්හපරිකප්ප-ප්පටිච්ඡන්නකුසාදිකා;
Theyyāpasayhaparikappa-ppaṭicchannakusādikā;
අවහාරා ඉමෙ පඤ්ච, විඤ්ඤාතබ්බා විභාවිනා.
Avahārā ime pañca, viññātabbā vibhāvinā.
8.
8.
මනුස්සපාණං පාණොති, ජානං වධකචෙතසා;
Manussapāṇaṃ pāṇoti, jānaṃ vadhakacetasā;
ජීවිතා යො වියොජෙති, සාසනා සො පරාජිතො.
Jīvitā yo viyojeti, sāsanā so parājito.
9.
9.
ඣානාදිභෙදං හදයෙ අසන්තං,
Jhānādibhedaṃ hadaye asantaṃ,
අඤ්ඤපදෙසඤ්ච විනාධිමානං;
Aññapadesañca vinādhimānaṃ;
මනුස්සජාතිස්ස වදෙය්ය භික්ඛු,
Manussajātissa vadeyya bhikkhu,
ඤාතක්ඛණෙ තෙන පරාජිකො භවෙති.
Ñātakkhaṇe tena parājiko bhaveti.
