| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೧. ಪಾರಾಜಿಕನಿದ್ದೇಸೋ
1. Pārājikaniddeso
ಪಾರಾಜಿಕಾ ಚ ಚತ್ತಾರೋತಿ –
Pārājikā ca cattāroti –
೧.
1.
ಮಗ್ಗತ್ತಯೇ ಅನಿಕ್ಖಿತ್ತಸಿಕ್ಖೋ ಸನ್ಥತಸನ್ಥತೇ।
Maggattaye anikkhittasikkho santhatasanthate;
ಅಲ್ಲೋಕಾಸೇ ನಿಮಿತ್ತಂ ಸಂ, ತಿಲಮತ್ತಮ್ಪಿ ಸನ್ಥತಂ॥
Allokāse nimittaṃ saṃ, tilamattampi santhataṃ.
೨.
2.
ಅಸನ್ಥತಮುಪಾದಿಣ್ಣಂ, ಪವೇಸನ್ತೋ ಚುತೋಥ ವಾ।
Asanthatamupādiṇṇaṃ, pavesanto cutotha vā;
ಪವೇಸನಟ್ಠಿತುದ್ಧಾರಪವಿಟ್ಠಕ್ಖಣಸಾದಕೋ॥
Pavesanaṭṭhituddhārapaviṭṭhakkhaṇasādako.
೩.
3.
ಆದಿಯೇಯ್ಯ ಹರೇಯ್ಯಾವಹರೇಯ್ಯ ಇರಿಯಾಪಥಂ।
Ādiyeyya hareyyāvahareyya iriyāpathaṃ;
ಕೋಪೇಯ್ಯ ಠಾನಾ ಚಾವೇಯ್ಯ, ಸಙ್ಕೇತಂ ವೀತಿನಾಮಯೇ॥
Kopeyya ṭhānā cāveyya, saṅketaṃ vītināmaye.
೪.
4.
ಅದಿನ್ನಂ ಥೇಯ್ಯಚಿತ್ತೇನ, ಭವೇ ಪಾರಾಜಿಕೋಥ ವಾ।
Adinnaṃ theyyacittena, bhave pārājikotha vā;
ಥೇಯ್ಯಾಬಲಕುಸಚ್ಛನ್ನಪರಿಕಪ್ಪಾವಹಾರಕೋ।
Theyyābalakusacchannaparikappāvahārako;
ಭಣ್ಡಕಾಲಗ್ಘದೇಸೇಹಿ, ಪರಿಭೋಗೇತ್ಥ ನಿಚ್ಛಯೋ॥
Bhaṇḍakālagghadesehi, paribhogettha nicchayo.
೫.
5.
ಮನುಸ್ಸವಿಗ್ಗಹಂ ಚಿಚ್ಚ, ಜೀವಿತಾ ವಾ ವಿಯೋಜಯೇ।
Manussaviggahaṃ cicca, jīvitā vā viyojaye;
ಸತ್ಥಹಾರಕಂ ವಾಸ್ಸ ಮರಣಚೇತನೋ ಉಪನಿಕ್ಖಿಪೇ॥
Satthahārakaṃ vāssa maraṇacetano upanikkhipe.
೬.
6.
ಗಾಹೇಯ್ಯ ಮರಣೂಪಾಯಂ, ವದೇಯ್ಯ ಮರಣೇ ಗುಣಂ।
Gāheyya maraṇūpāyaṃ, vadeyya maraṇe guṇaṃ;
ಚುತೋ ಪಯೋಗಾ ಸಾಹತ್ಥಿನಿಸ್ಸಗ್ಗಾಣತ್ತಿಥಾವರಾ॥
Cuto payogā sāhatthinissaggāṇattithāvarā.
೭.
7.
ಇದ್ಧಿವಿಜ್ಜಾಮಯಾ ಕಾಲವತ್ಥಾವುಧಿರಿಯಾಪಥಾ।
Iddhivijjāmayā kālavatthāvudhiriyāpathā;
ಕ್ರಿಯಾವಿಸೇಸೋ ಓಕಾಸೋ, ಛ ಆಣತ್ತಿನಿಯಾಮಕಾ॥
Kriyāviseso okāso, cha āṇattiniyāmakā.
೮.
8.
ಝಾನಾದಿಭೇದ ನೋಸನ್ತಮತ್ತನತ್ತುಪನಾಯಿಕಂ।
Jhānādibheda nosantamattanattupanāyikaṃ;
ಕತ್ವಾ ಕೋಟ್ಠಾಸಮೇಕೇಕಂ, ಪಚ್ಚುಪ್ಪನ್ನಭವಸ್ಸಿತಂ॥
Katvā koṭṭhāsamekekaṃ, paccuppannabhavassitaṃ.
೯.
9.
ಅಞ್ಞಾಪದೇಸರಹಿತಂ , ದೀಪೇನ್ತೋನಧಿಮಾನಿಕೋ।
Aññāpadesarahitaṃ , dīpentonadhimāniko;
ಕಾಯೇನ ವಾಚಾ ವಿಞ್ಞತ್ತಿ-ಪಥೇ ಞಾತೇ ಚುತೋ ಭವೇ॥
Kāyena vācā viññatti-pathe ñāte cuto bhave.
೧೦.
10.
ಪಾರಾಜಿಕೇತೇ ಚತ್ತಾರೋ, ಅಸಂವಾಸಾ ಯಥಾ ಪುರೇ।
Pārājikete cattāro, asaṃvāsā yathā pure;
ಅಭಬ್ಬಾ ಭಿಕ್ಖುಭಾವಾಯ, ಸೀಸಚ್ಛಿನ್ನೋವ ಜೀವಿತುಂ॥
Abhabbā bhikkhubhāvāya, sīsacchinnova jīvituṃ.
೧೧.
11.
ಪರಿಯಾಯೋ ಚ ಆಣತ್ತಿ, ತತಿಯೇ ದುತಿಯೇ ಪನ।
Pariyāyo ca āṇatti, tatiye dutiye pana;
ಆಣತ್ತಿಯೇವ ಸೇಸೇಸು, ದ್ವಯಮೇತಂ ನ ಲಬ್ಭತಿ॥
Āṇattiyeva sesesu, dvayametaṃ na labbhati.
೧೨.
12.
ಸೇವೇತುಕಾಮತಾಚಿತ್ತಂ , ಮಗ್ಗೇ ಮಗ್ಗಪ್ಪವೇಸನಂ।
Sevetukāmatācittaṃ , magge maggappavesanaṃ;
ಇಮಂ ಮೇಥುನಧಮ್ಮಸ್ಸ, ಆಹು ಅಙ್ಗದ್ವಯಂ ಬುಧಾ॥
Imaṃ methunadhammassa, āhu aṅgadvayaṃ budhā.
೧೩.
13.
ಮನುಸ್ಸಸಂ ತಥಾಸಞ್ಞೀ, ಥೇಯ್ಯಚಿತ್ತಞ್ಚ ವತ್ಥುನೋ।
Manussasaṃ tathāsaññī, theyyacittañca vatthuno;
ಗರುತಾ ಅವಹಾರೋ ಚ, ಅದಿನ್ನಾದಾನಹೇತುಯೋ॥
Garutā avahāro ca, adinnādānahetuyo.
೧೪.
14.
ಪಾಣೋ ಮಾನುಸ್ಸಕೋ ಪಾಣ-ಸಞ್ಞಿತಾ ಘಾತಚೇತನಾ।
Pāṇo mānussako pāṇa-saññitā ghātacetanā;
ಪಯೋಗೋ ತೇನ ಮರಣಂ, ಪಞ್ಚೇತೇ ವಧಹೇತುಯೋ॥
Payogo tena maraṇaṃ, pañcete vadhahetuyo.
೧೫.
15.
ಅಸನ್ತತಾ ಅತ್ತನಿ ಪಾಪಮಿಚ್ಛತಾ-
Asantatā attani pāpamicchatā-
ಯಾರೋಚನಾ ತಸ್ಸ ಮನುಸ್ಸಜಾತಿತಾ।
Yārocanā tassa manussajātitā;
ನಾಞ್ಞಾಪದೇಸೋ ಚ ತದೇವ ಜಾನನಂ,
Nāññāpadeso ca tadeva jānanaṃ,
ಪಞ್ಚೇತ್ಥ ಅಙ್ಗಾನಿ ಅಸನ್ತದೀಪನೇ॥
Pañcettha aṅgāni asantadīpane.
೧೬.
16.
ಅಸಾಧಾರಣಾ ಚತ್ತಾರೋ, ಭಿಕ್ಖುನೀನಮಭಬ್ಬಕಾ।
Asādhāraṇā cattāro, bhikkhunīnamabhabbakā;
ಏಕಾದಸ ಚ ವಿಬ್ಭನ್ತಾ, ಭಿಕ್ಖುನೀ ಮುದುಪಿಟ್ಠಿಕೋ॥
Ekādasa ca vibbhantā, bhikkhunī mudupiṭṭhiko.
೧೭.
17.
ಲಮ್ಬೀ ಮುಖೇನ ಗಣ್ಹನ್ತೋ, ಅಙ್ಗಜಾತಂ ಪರಸ್ಸ ಚ।
Lambī mukhena gaṇhanto, aṅgajātaṃ parassa ca;
ತತ್ಥೇವಾಭಿನಿಸೀದನ್ತೋ, ಚತ್ತಾರೋ ಅನುಲೋಮಿಕಾ॥
Tatthevābhinisīdanto, cattāro anulomikā.
೧೮.
18.
ಮಗ್ಗೇ ಮಗ್ಗಪ್ಪವೇಸನಾ, ಮೇಥುನಸ್ಸ ಇಧಾಗತಾ।
Magge maggappavesanā, methunassa idhāgatā;
ಚತ್ತಾರೋತಿ ಚತುಬ್ಬೀಸ, ಸಮೋಧಾನಾ ಪರಾಜಿಕಾತಿ॥
Cattāroti catubbīsa, samodhānā parājikāti.
