| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೨. ಸಙ್ಘಾದಿಸೇಸನಿದ್ದೇಸೋ
2. Saṅghādisesaniddeso
ಗರುಕಾ ನವಾತಿ –
Garukānavāti –
೧೯.
19.
ಮೋಚೇತುಕಾಮತಾ ಸುಕ್ಕ-ಸ್ಸುಪಕ್ಕಮ್ಮ ವಿಮೋಚಯಂ।
Mocetukāmatā sukka-ssupakkamma vimocayaṃ;
ಅಞ್ಞತ್ರ ಸುಪಿನನ್ತೇನ, ಸಮಣೋ ಗರುಕಂ ಫುಸೇ॥
Aññatra supinantena, samaṇo garukaṃ phuse.
೨೦.
20.
ಇತ್ಥಿಸಞ್ಞೀ ಮನುಸ್ಸಿತ್ಥಿಂ, ಕಾಯಸಂಸಗ್ಗರಾಗವಾ।
Itthisaññī manussitthiṃ, kāyasaṃsaggarāgavā;
ಸಮ್ಫುಸನ್ತೋ ಉಪಕ್ಕಮ್ಮ, ಸಮಣೋ ಗರುಕಂ ಫುಸೇ॥
Samphusanto upakkamma, samaṇo garukaṃ phuse.
೨೧.
21.
ತಥಾ ಸುಣನ್ತಿಂ ವಿಞ್ಞುಞ್ಚ, ಮಗ್ಗಂ ವಾರಬ್ಭ ಮೇಥುನಂ।
Tathā suṇantiṃ viññuñca, maggaṃ vārabbha methunaṃ;
ದುಟ್ಠುಲ್ಲವಾಚಾರಾಗೇನ, ಓಭಾಸೇತ್ವಾ ಗರುಂ ಫುಸೇ॥
Duṭṭhullavācārāgena, obhāsetvā garuṃ phuse.
೨೨.
22.
ವತ್ವಾತ್ತಕಾಮುಪಟ್ಠಾನ-ವಣ್ಣಂ ಮೇಥುನರಾಗಿನೋ।
Vatvāttakāmupaṭṭhāna-vaṇṇaṃ methunarāgino;
ವಾಚಾ ಮೇಥುನಯುತ್ತೇನ, ಗರುಂ ಮೇಥುನಯಾಚನೇ॥
Vācā methunayuttena, garuṃ methunayācane.
೨೩.
23.
ಪಟಿಗ್ಗಹೇತ್ವಾ ಸನ್ದೇಸಂ, ಇತ್ಥಿಯಾ ಪುರಿಸಸ್ಸ ವಾ।
Paṭiggahetvā sandesaṃ, itthiyā purisassa vā;
ವೀಮಂಸಿತ್ವಾ ಹರಂ ಪಚ್ಚಾ, ಸಮಣೋ ಗರುಕಂ ಫುಸೇ॥
Vīmaṃsitvā haraṃ paccā, samaṇo garukaṃ phuse.
೨೪.
24.
ಸಂಯಾಚಿತಪರಿಕ್ಖಾರಂ, ಕತ್ವಾದೇಸಿತವತ್ಥುಕಂ।
Saṃyācitaparikkhāraṃ, katvādesitavatthukaṃ;
ಕುಟಿಂ ಪಮಾಣಾತಿಕ್ಕನ್ತಂ, ಅತ್ತುದ್ದೇಸಂ ಗರುಂ ಫುಸೇ॥
Kuṭiṃ pamāṇātikkantaṃ, attuddesaṃ garuṃ phuse.
೨೫.
25.
ಮಹಲ್ಲಕಂ ವಿಹಾರಂ ವಾ, ಕತ್ವಾದೇಸಿತವತ್ಥುಕಂ।
Mahallakaṃ vihāraṃ vā, katvādesitavatthukaṃ;
ಅತ್ತನೋ ವಸನತ್ಥಾಯ, ಸಮಣೋ ಗರುಕಂ ಫುಸೇ॥
Attano vasanatthāya, samaṇo garukaṃ phuse.
೨೬.
26.
ಅಮೂಲಕೇನ ಚೋದೇನ್ತೋ, ಚೋದಾಪೇನ್ತೋವ ವತ್ಥುನಾ।
Amūlakena codento, codāpentova vatthunā;
ಅನ್ತಿಮೇನ ಚ ಚಾವೇತುಂ, ಸುಣಮಾನಂ ಗರುಂ ಫುಸೇ॥
Antimena ca cāvetuṃ, suṇamānaṃ garuṃ phuse.
೨೭.
27.
ಅಞ್ಞಸ್ಸ ಕಿರಿಯಂ ದಿಸ್ವಾ, ತೇನ ಲೇಸೇನ ಚೋದಯಂ।
Aññassa kiriyaṃ disvā, tena lesena codayaṃ;
ವತ್ಥುನಾ ಅನ್ತಿಮೇನಾಞ್ಞಂ, ಚಾವೇತುಂ ಗರುಕಂ ಫುಸೇ॥
Vatthunā antimenāññaṃ, cāvetuṃ garukaṃ phuse.
೨೮.
28.
ಛಾದೇತಿ ಜಾನಮಾಪನ್ನಂ, ಪರಿವಸೇಯ್ಯ ತಾವತಾ।
Chādeti jānamāpannaṃ, parivaseyya tāvatā;
ಚರೇಯ್ಯ ಸಙ್ಘೇ ಮಾನತ್ತಂ, ಪರಿವುತ್ಥೋ ಛ ರತ್ತಿಯೋ॥
Careyya saṅghe mānattaṃ, parivuttho cha rattiyo.
ಚಿಣ್ಣಮಾನತ್ತಮಬ್ಭೇಯ್ಯ, ತಂ ಸಙ್ಘೋ ವೀಸತೀಗಣೋ।
Ciṇṇamānattamabbheyya, taṃ saṅgho vīsatīgaṇo.
೨೯.
29.
ಆಪತ್ತಿನುಕ್ಖಿತ್ತಮನನ್ತರಾಯ
Āpattinukkhittamanantarāya
ಪಹುತ್ತತಾಯೋ ತಥಸಞ್ಞಿತಾ ಚ।
Pahuttatāyo tathasaññitā ca;
ಛಾದೇತುಕಾಮೋ ಅಥ ಛಾದನಾತಿ,
Chādetukāmo atha chādanāti,
ಛನ್ನಾ ದಸಙ್ಗೇಹ್ಯರುಣುಗ್ಗಮಮ್ಹೀತಿ॥
Channā dasaṅgehyaruṇuggamamhīti.
