| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๑. ปาราชิกนิเทฺทโส
1. Pārājikaniddeso
๑.
1.
สํ นิมิตฺตํ ปเวสโนฺต, ภิกฺขุ มคฺคตฺตเย จุโต;
Saṃ nimittaṃ pavesanto, bhikkhu maggattaye cuto;
ปเวสนฎฺฐิตุทฺธาร-ปวิเฎฺฐ เจปิ สาทิยํฯ
Pavesanaṭṭhituddhāra-paviṭṭhe cepi sādiyaṃ.
๒.
2.
อทินฺนํ มานุสํ ภณฺฑํ, เถยฺยาเยเกน อาทิยํ;
Adinnaṃ mānusaṃ bhaṇḍaṃ, theyyāyekena ādiyaṃ;
ปญฺจวีสาวหาเรสุ, ครุกํ เจ จุโต ภเวฯ
Pañcavīsāvahāresu, garukaṃ ce cuto bhave.
๓.
3.
อาทิยโนฺต หรโนฺตว-หรโนฺตปิริยาปถํ;
Ādiyanto harantova-harantopiriyāpathaṃ;
วิโกเปโนฺต ตถา ฐานา, จาเวโนฺตปิ ปราชิโกฯ
Vikopento tathā ṭhānā, cāventopi parājiko.
๔.
4.
ตตฺถ นาเนกภณฺฑานํ, ปญฺจกานํ วสา ปน;
Tattha nānekabhaṇḍānaṃ, pañcakānaṃ vasā pana;
อวหารา ทสเญฺจติ, วิญฺญาตพฺพา วิภาวินาฯ
Avahārā dasañceti, viññātabbā vibhāvinā.
๕.
5.
สาหตฺถาณตฺติโก เจว, นิสฺสโคฺค จาตฺถสาธโก;
Sāhatthāṇattiko ceva, nissaggo cātthasādhako;
ธุรนิเกฺขปนเญฺจว, อิทํ สาหตฺถปญฺจกํฯ
Dhuranikkhepanañceva, idaṃ sāhatthapañcakaṃ.
๖.
6.
ปุพฺพสหปฺปโยโค จ, สํวิธาหรณมฺปิ จ;
Pubbasahappayogo ca, saṃvidhāharaṇampi ca;
สเงฺกตกมฺมํ นิมิตฺตํ, ปุพฺพปฺปโยคปญฺจกํฯ
Saṅketakammaṃ nimittaṃ, pubbappayogapañcakaṃ.
๗.
7.
เถยฺยาปสยฺหปริกปฺป-ปฺปฎิจฺฉนฺนกุสาทิกา;
Theyyāpasayhaparikappa-ppaṭicchannakusādikā;
อวหารา อิเม ปญฺจ, วิญฺญาตพฺพา วิภาวินาฯ
Avahārā ime pañca, viññātabbā vibhāvinā.
๘.
8.
มนุสฺสปาณํ ปาโณติ, ชานํ วธกเจตสา;
Manussapāṇaṃ pāṇoti, jānaṃ vadhakacetasā;
ชีวิตา โย วิโยเชติ, สาสนา โส ปราชิโตฯ
Jīvitā yo viyojeti, sāsanā so parājito.
๙.
9.
ฌานาทิเภทํ หทเย อสนฺตํ,
Jhānādibhedaṃ hadaye asantaṃ,
อญฺญปเทสญฺจ วินาธิมานํ;
Aññapadesañca vinādhimānaṃ;
มนุสฺสชาติสฺส วเทยฺย ภิกฺขุ,
Manussajātissa vadeyya bhikkhu,
ญาตกฺขเณ เตน ปราชิโก ภเวติฯ
Ñātakkhaṇe tena parājiko bhaveti.
