| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๑. ปาราชิกนิเทฺทโส
1. Pārājikaniddeso
ปาราชิกา จ จตฺตาโรติ –
Pārājikā ca cattāroti –
๑.
1.
มคฺคตฺตเย อนิกฺขิตฺตสิโกฺข สนฺถตสนฺถเต;
Maggattaye anikkhittasikkho santhatasanthate;
อโลฺลกาเส นิมิตฺตํ สํ, ติลมตฺตมฺปิ สนฺถตํฯ
Allokāse nimittaṃ saṃ, tilamattampi santhataṃ.
๒.
2.
อสนฺถตมุปาทิณฺณํ, ปเวสโนฺต จุโตถ วา;
Asanthatamupādiṇṇaṃ, pavesanto cutotha vā;
ปเวสนฎฺฐิตุทฺธารปวิฎฺฐกฺขณสาทโกฯ
Pavesanaṭṭhituddhārapaviṭṭhakkhaṇasādako.
๓.
3.
อาทิเยยฺย หเรยฺยาวหเรยฺย อิริยาปถํ;
Ādiyeyya hareyyāvahareyya iriyāpathaṃ;
โกเปยฺย ฐานา จาเวยฺย, สเงฺกตํ วีตินามเยฯ
Kopeyya ṭhānā cāveyya, saṅketaṃ vītināmaye.
๔.
4.
อทินฺนํ เถยฺยจิเตฺตน, ภเว ปาราชิโกถ วา;
Adinnaṃ theyyacittena, bhave pārājikotha vā;
เถยฺยาพลกุสจฺฉนฺนปริกปฺปาวหารโก;
Theyyābalakusacchannaparikappāvahārako;
ภณฺฑกาลคฺฆเทเสหิ, ปริโภเคตฺถ นิจฺฉโยฯ
Bhaṇḍakālagghadesehi, paribhogettha nicchayo.
๕.
5.
มนุสฺสวิคฺคหํ จิจฺจ, ชีวิตา วา วิโยชเย;
Manussaviggahaṃ cicca, jīvitā vā viyojaye;
สตฺถหารกํ วาสฺส มรณเจตโน อุปนิกฺขิเปฯ
Satthahārakaṃ vāssa maraṇacetano upanikkhipe.
๖.
6.
คาเหยฺย มรณูปายํ, วเทยฺย มรเณ คุณํ;
Gāheyya maraṇūpāyaṃ, vadeyya maraṇe guṇaṃ;
จุโต ปโยคา สาหตฺถินิสฺสคฺคาณตฺติถาวราฯ
Cuto payogā sāhatthinissaggāṇattithāvarā.
๗.
7.
อิทฺธิวิชฺชามยา กาลวตฺถาวุธิริยาปถา;
Iddhivijjāmayā kālavatthāvudhiriyāpathā;
กฺริยาวิเสโส โอกาโส, ฉ อาณตฺตินิยามกาฯ
Kriyāviseso okāso, cha āṇattiniyāmakā.
๘.
8.
ฌานาทิเภท โนสนฺตมตฺตนตฺตุปนายิกํ;
Jhānādibheda nosantamattanattupanāyikaṃ;
กตฺวา โกฎฺฐาสเมเกกํ, ปจฺจุปฺปนฺนภวสฺสิตํฯ
Katvā koṭṭhāsamekekaṃ, paccuppannabhavassitaṃ.
๙.
9.
อญฺญาปเทสรหิตํ , ทีเปโนฺตนธิมานิโก;
Aññāpadesarahitaṃ , dīpentonadhimāniko;
กาเยน วาจา วิญฺญตฺติ-ปเถ ญาเต จุโต ภเวฯ
Kāyena vācā viññatti-pathe ñāte cuto bhave.
๑๐.
10.
ปาราชิเกเต จตฺตาโร, อสํวาสา ยถา ปุเร;
Pārājikete cattāro, asaṃvāsā yathā pure;
อภพฺพา ภิกฺขุภาวาย, สีสจฺฉิโนฺนว ชีวิตุํฯ
Abhabbā bhikkhubhāvāya, sīsacchinnova jīvituṃ.
๑๑.
11.
ปริยาโย จ อาณตฺติ, ตติเย ทุติเย ปน;
Pariyāyo ca āṇatti, tatiye dutiye pana;
อาณตฺติเยว เสเสสุ, ทฺวยเมตํ น ลพฺภติฯ
Āṇattiyeva sesesu, dvayametaṃ na labbhati.
๑๒.
12.
เสเวตุกามตาจิตฺตํ , มเคฺค มคฺคปฺปเวสนํ;
Sevetukāmatācittaṃ , magge maggappavesanaṃ;
อิมํ เมถุนธมฺมสฺส, อาหุ องฺคทฺวยํ พุธาฯ
Imaṃ methunadhammassa, āhu aṅgadvayaṃ budhā.
๑๓.
13.
มนุสฺสสํ ตถาสญฺญี, เถยฺยจิตฺตญฺจ วตฺถุโน;
Manussasaṃ tathāsaññī, theyyacittañca vatthuno;
ครุตา อวหาโร จ, อทินฺนาทานเหตุโยฯ
Garutā avahāro ca, adinnādānahetuyo.
๑๔.
14.
ปาโณ มานุสฺสโก ปาณ-สญฺญิตา ฆาตเจตนา;
Pāṇo mānussako pāṇa-saññitā ghātacetanā;
ปโยโค เตน มรณํ, ปเญฺจเต วธเหตุโยฯ
Payogo tena maraṇaṃ, pañcete vadhahetuyo.
๑๕.
15.
อสนฺตตา อตฺตนิ ปาปมิจฺฉตา-
Asantatā attani pāpamicchatā-
ยาโรจนา ตสฺส มนุสฺสชาติตา;
Yārocanā tassa manussajātitā;
นาญฺญาปเทโส จ ตเทว ชานนํ,
Nāññāpadeso ca tadeva jānanaṃ,
ปเญฺจตฺถ องฺคานิ อสนฺตทีปเนฯ
Pañcettha aṅgāni asantadīpane.
๑๖.
16.
อสาธารณา จตฺตาโร, ภิกฺขุนีนมภพฺพกา;
Asādhāraṇā cattāro, bhikkhunīnamabhabbakā;
เอกาทส จ วิพฺภนฺตา, ภิกฺขุนี มุทุปิฎฺฐิโกฯ
Ekādasa ca vibbhantā, bhikkhunī mudupiṭṭhiko.
๑๗.
17.
ลมฺพี มุเขน คณฺหโนฺต, องฺคชาตํ ปรสฺส จ;
Lambī mukhena gaṇhanto, aṅgajātaṃ parassa ca;
ตเตฺถวาภินิสีทโนฺต, จตฺตาโร อนุโลมิกาฯ
Tatthevābhinisīdanto, cattāro anulomikā.
๑๘.
18.
มเคฺค มคฺคปฺปเวสนา, เมถุนสฺส อิธาคตา;
Magge maggappavesanā, methunassa idhāgatā;
จตฺตาโรติ จตุพฺพีส, สโมธานา ปราชิกาติฯ
Cattāroti catubbīsa, samodhānā parājikāti.
