| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๒. สงฺฆาทิเสสนิเทฺทโส
2. Saṅghādisesaniddeso
ครุกา นวาติ –
Garukānavāti –
๑๙.
19.
โมเจตุกามตา สุกฺก-สฺสุปกฺกมฺม วิโมจยํ;
Mocetukāmatā sukka-ssupakkamma vimocayaṃ;
อญฺญตฺร สุปินเนฺตน, สมโณ ครุกํ ผุเสฯ
Aññatra supinantena, samaṇo garukaṃ phuse.
๒๐.
20.
อิตฺถิสญฺญี มนุสฺสิตฺถิํ, กายสํสคฺคราควา;
Itthisaññī manussitthiṃ, kāyasaṃsaggarāgavā;
สมฺผุสโนฺต อุปกฺกมฺม, สมโณ ครุกํ ผุเสฯ
Samphusanto upakkamma, samaṇo garukaṃ phuse.
๒๑.
21.
ตถา สุณนฺติํ วิญฺญุญฺจ, มคฺคํ วารพฺภ เมถุนํ;
Tathā suṇantiṃ viññuñca, maggaṃ vārabbha methunaṃ;
ทุฎฺฐุลฺลวาจาราเคน, โอภาเสตฺวา ครุํ ผุเสฯ
Duṭṭhullavācārāgena, obhāsetvā garuṃ phuse.
๒๒.
22.
วตฺวาตฺตกามุปฎฺฐาน-วณฺณํ เมถุนราคิโน;
Vatvāttakāmupaṭṭhāna-vaṇṇaṃ methunarāgino;
วาจา เมถุนยุเตฺตน, ครุํ เมถุนยาจเนฯ
Vācā methunayuttena, garuṃ methunayācane.
๒๓.
23.
ปฎิคฺคเหตฺวา สเนฺทสํ, อิตฺถิยา ปุริสสฺส วา;
Paṭiggahetvā sandesaṃ, itthiyā purisassa vā;
วีมํสิตฺวา หรํ ปจฺจา, สมโณ ครุกํ ผุเสฯ
Vīmaṃsitvā haraṃ paccā, samaṇo garukaṃ phuse.
๒๔.
24.
สํยาจิตปริกฺขารํ, กตฺวาเทสิตวตฺถุกํ;
Saṃyācitaparikkhāraṃ, katvādesitavatthukaṃ;
กุฎิํ ปมาณาติกฺกนฺตํ, อตฺตุเทฺทสํ ครุํ ผุเสฯ
Kuṭiṃ pamāṇātikkantaṃ, attuddesaṃ garuṃ phuse.
๒๕.
25.
มหลฺลกํ วิหารํ วา, กตฺวาเทสิตวตฺถุกํ;
Mahallakaṃ vihāraṃ vā, katvādesitavatthukaṃ;
อตฺตโน วสนตฺถาย, สมโณ ครุกํ ผุเสฯ
Attano vasanatthāya, samaṇo garukaṃ phuse.
๒๖.
26.
อมูลเกน โจเทโนฺต, โจทาเปโนฺตว วตฺถุนา;
Amūlakena codento, codāpentova vatthunā;
อนฺติเมน จ จาเวตุํ, สุณมานํ ครุํ ผุเสฯ
Antimena ca cāvetuṃ, suṇamānaṃ garuṃ phuse.
๒๗.
27.
อญฺญสฺส กิริยํ ทิสฺวา, เตน เลเสน โจทยํ;
Aññassa kiriyaṃ disvā, tena lesena codayaṃ;
วตฺถุนา อนฺติเมนาญฺญํ, จาเวตุํ ครุกํ ผุเสฯ
Vatthunā antimenāññaṃ, cāvetuṃ garukaṃ phuse.
๒๘.
28.
ฉาเทติ ชานมาปนฺนํ, ปริวเสยฺย ตาวตา;
Chādeti jānamāpannaṃ, parivaseyya tāvatā;
จเรยฺย สเงฺฆ มานตฺตํ, ปริวุโตฺถ ฉ รตฺติโยฯ
Careyya saṅghe mānattaṃ, parivuttho cha rattiyo.
จิณฺณมานตฺตมเพฺภยฺย, ตํ สโงฺฆ วีสตีคโณฯ
Ciṇṇamānattamabbheyya, taṃ saṅgho vīsatīgaṇo.
๒๙.
29.
อาปตฺตินุกฺขิตฺตมนนฺตราย
Āpattinukkhittamanantarāya
ปหุตฺตตาโย ตถสญฺญิตา จ;
Pahuttatāyo tathasaññitā ca;
ฉาเทตุกาโม อถ ฉาทนาติ,
Chādetukāmo atha chādanāti,
ฉนฺนา ทสเงฺคหฺยรุณุคฺคมมฺหีติฯ
Channā dasaṅgehyaruṇuggamamhīti.
