| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
१. पाराजिकनिद्देसो
1. Pārājikaniddeso
पाराजिका च चत्तारोति –
Pārājikā ca cattāroti –
१.
1.
मग्गत्तये अनिक्खित्तसिक्खो सन्थतसन्थते।
Maggattaye anikkhittasikkho santhatasanthate;
अल्लोकासे निमित्तं सं, तिलमत्तम्पि सन्थतं॥
Allokāse nimittaṃ saṃ, tilamattampi santhataṃ.
२.
2.
असन्थतमुपादिण्णं, पवेसन्तो चुतोथ वा।
Asanthatamupādiṇṇaṃ, pavesanto cutotha vā;
पवेसनट्ठितुद्धारपविट्ठक्खणसादको॥
Pavesanaṭṭhituddhārapaviṭṭhakkhaṇasādako.
३.
3.
आदियेय्य हरेय्यावहरेय्य इरियापथं।
Ādiyeyya hareyyāvahareyya iriyāpathaṃ;
कोपेय्य ठाना चावेय्य, सङ्केतं वीतिनामये॥
Kopeyya ṭhānā cāveyya, saṅketaṃ vītināmaye.
४.
4.
अदिन्नं थेय्यचित्तेन, भवे पाराजिकोथ वा।
Adinnaṃ theyyacittena, bhave pārājikotha vā;
थेय्याबलकुसच्छन्नपरिकप्पावहारको।
Theyyābalakusacchannaparikappāvahārako;
भण्डकालग्घदेसेहि, परिभोगेत्थ निच्छयो॥
Bhaṇḍakālagghadesehi, paribhogettha nicchayo.
५.
5.
मनुस्सविग्गहं चिच्च, जीविता वा वियोजये।
Manussaviggahaṃ cicca, jīvitā vā viyojaye;
सत्थहारकं वास्स मरणचेतनो उपनिक्खिपे॥
Satthahārakaṃ vāssa maraṇacetano upanikkhipe.
६.
6.
गाहेय्य मरणूपायं, वदेय्य मरणे गुणं।
Gāheyya maraṇūpāyaṃ, vadeyya maraṇe guṇaṃ;
चुतो पयोगा साहत्थिनिस्सग्गाणत्तिथावरा॥
Cuto payogā sāhatthinissaggāṇattithāvarā.
७.
7.
इद्धिविज्जामया कालवत्थावुधिरियापथा।
Iddhivijjāmayā kālavatthāvudhiriyāpathā;
क्रियाविसेसो ओकासो, छ आणत्तिनियामका॥
Kriyāviseso okāso, cha āṇattiniyāmakā.
८.
8.
झानादिभेद नोसन्तमत्तनत्तुपनायिकं।
Jhānādibheda nosantamattanattupanāyikaṃ;
कत्वा कोट्ठासमेकेकं, पच्चुप्पन्नभवस्सितं॥
Katvā koṭṭhāsamekekaṃ, paccuppannabhavassitaṃ.
९.
9.
अञ्ञापदेसरहितं , दीपेन्तोनधिमानिको।
Aññāpadesarahitaṃ , dīpentonadhimāniko;
कायेन वाचा विञ्ञत्ति-पथे ञाते चुतो भवे॥
Kāyena vācā viññatti-pathe ñāte cuto bhave.
१०.
10.
पाराजिकेते चत्तारो, असंवासा यथा पुरे।
Pārājikete cattāro, asaṃvāsā yathā pure;
अभब्बा भिक्खुभावाय, सीसच्छिन्नोव जीवितुं॥
Abhabbā bhikkhubhāvāya, sīsacchinnova jīvituṃ.
११.
11.
परियायो च आणत्ति, ततिये दुतिये पन।
Pariyāyo ca āṇatti, tatiye dutiye pana;
आणत्तियेव सेसेसु, द्वयमेतं न लब्भति॥
Āṇattiyeva sesesu, dvayametaṃ na labbhati.
१२.
12.
सेवेतुकामताचित्तं , मग्गे मग्गप्पवेसनं।
Sevetukāmatācittaṃ , magge maggappavesanaṃ;
इमं मेथुनधम्मस्स, आहु अङ्गद्वयं बुधा॥
Imaṃ methunadhammassa, āhu aṅgadvayaṃ budhā.
१३.
13.
मनुस्ससं तथासञ्ञी, थेय्यचित्तञ्च वत्थुनो।
Manussasaṃ tathāsaññī, theyyacittañca vatthuno;
गरुता अवहारो च, अदिन्नादानहेतुयो॥
Garutā avahāro ca, adinnādānahetuyo.
१४.
14.
पाणो मानुस्सको पाण-सञ्ञिता घातचेतना।
Pāṇo mānussako pāṇa-saññitā ghātacetanā;
पयोगो तेन मरणं, पञ्चेते वधहेतुयो॥
Payogo tena maraṇaṃ, pañcete vadhahetuyo.
१५.
15.
असन्तता अत्तनि पापमिच्छता-
Asantatā attani pāpamicchatā-
यारोचना तस्स मनुस्सजातिता।
Yārocanā tassa manussajātitā;
नाञ्ञापदेसो च तदेव जाननं,
Nāññāpadeso ca tadeva jānanaṃ,
पञ्चेत्थ अङ्गानि असन्तदीपने॥
Pañcettha aṅgāni asantadīpane.
१६.
16.
असाधारणा चत्तारो, भिक्खुनीनमभब्बका।
Asādhāraṇā cattāro, bhikkhunīnamabhabbakā;
एकादस च विब्भन्ता, भिक्खुनी मुदुपिट्ठिको॥
Ekādasa ca vibbhantā, bhikkhunī mudupiṭṭhiko.
१७.
17.
लम्बी मुखेन गण्हन्तो, अङ्गजातं परस्स च।
Lambī mukhena gaṇhanto, aṅgajātaṃ parassa ca;
तत्थेवाभिनिसीदन्तो, चत्तारो अनुलोमिका॥
Tatthevābhinisīdanto, cattāro anulomikā.
१८.
18.
मग्गे मग्गप्पवेसना, मेथुनस्स इधागता।
Magge maggappavesanā, methunassa idhāgatā;
चत्तारोति चतुब्बीस, समोधाना पराजिकाति॥
Cattāroti catubbīsa, samodhānā parājikāti.
