| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
२. सङ्घादिसेसनिद्देसो
2. Saṅghādisesaniddeso
गरुका नवाति –
Garukānavāti –
१९.
19.
मोचेतुकामता सुक्क-स्सुपक्कम्म विमोचयं।
Mocetukāmatā sukka-ssupakkamma vimocayaṃ;
अञ्ञत्र सुपिनन्तेन, समणो गरुकं फुसे॥
Aññatra supinantena, samaṇo garukaṃ phuse.
२०.
20.
इत्थिसञ्ञी मनुस्सित्थिं, कायसंसग्गरागवा।
Itthisaññī manussitthiṃ, kāyasaṃsaggarāgavā;
सम्फुसन्तो उपक्कम्म, समणो गरुकं फुसे॥
Samphusanto upakkamma, samaṇo garukaṃ phuse.
२१.
21.
तथा सुणन्तिं विञ्ञुञ्च, मग्गं वारब्भ मेथुनं।
Tathā suṇantiṃ viññuñca, maggaṃ vārabbha methunaṃ;
दुट्ठुल्लवाचारागेन, ओभासेत्वा गरुं फुसे॥
Duṭṭhullavācārāgena, obhāsetvā garuṃ phuse.
२२.
22.
वत्वात्तकामुपट्ठान-वण्णं मेथुनरागिनो।
Vatvāttakāmupaṭṭhāna-vaṇṇaṃ methunarāgino;
वाचा मेथुनयुत्तेन, गरुं मेथुनयाचने॥
Vācā methunayuttena, garuṃ methunayācane.
२३.
23.
पटिग्गहेत्वा सन्देसं, इत्थिया पुरिसस्स वा।
Paṭiggahetvā sandesaṃ, itthiyā purisassa vā;
वीमंसित्वा हरं पच्चा, समणो गरुकं फुसे॥
Vīmaṃsitvā haraṃ paccā, samaṇo garukaṃ phuse.
२४.
24.
संयाचितपरिक्खारं, कत्वादेसितवत्थुकं।
Saṃyācitaparikkhāraṃ, katvādesitavatthukaṃ;
कुटिं पमाणातिक्कन्तं, अत्तुद्देसं गरुं फुसे॥
Kuṭiṃ pamāṇātikkantaṃ, attuddesaṃ garuṃ phuse.
२५.
25.
महल्लकं विहारं वा, कत्वादेसितवत्थुकं।
Mahallakaṃ vihāraṃ vā, katvādesitavatthukaṃ;
अत्तनो वसनत्थाय, समणो गरुकं फुसे॥
Attano vasanatthāya, samaṇo garukaṃ phuse.
२६.
26.
अमूलकेन चोदेन्तो, चोदापेन्तोव वत्थुना।
Amūlakena codento, codāpentova vatthunā;
अन्तिमेन च चावेतुं, सुणमानं गरुं फुसे॥
Antimena ca cāvetuṃ, suṇamānaṃ garuṃ phuse.
२७.
27.
अञ्ञस्स किरियं दिस्वा, तेन लेसेन चोदयं।
Aññassa kiriyaṃ disvā, tena lesena codayaṃ;
वत्थुना अन्तिमेनाञ्ञं, चावेतुं गरुकं फुसे॥
Vatthunā antimenāññaṃ, cāvetuṃ garukaṃ phuse.
२८.
28.
छादेति जानमापन्नं, परिवसेय्य तावता।
Chādeti jānamāpannaṃ, parivaseyya tāvatā;
चरेय्य सङ्घे मानत्तं, परिवुत्थो छ रत्तियो॥
Careyya saṅghe mānattaṃ, parivuttho cha rattiyo.
चिण्णमानत्तमब्भेय्य, तं सङ्घो वीसतीगणो।
Ciṇṇamānattamabbheyya, taṃ saṅgho vīsatīgaṇo.
२९.
29.
आपत्तिनुक्खित्तमनन्तराय
Āpattinukkhittamanantarāya
पहुत्ततायो तथसञ्ञिता च।
Pahuttatāyo tathasaññitā ca;
छादेतुकामो अथ छादनाति,
Chādetukāmo atha chādanāti,
छन्ना दसङ्गेह्यरुणुग्गमम्हीति॥
Channā dasaṅgehyaruṇuggamamhīti.
