| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১. পারাজিকনিদ্দেসো
1. Pārājikaniddeso
পারাজিকা চ চত্তারোতি –
Pārājikā ca cattāroti –
১.
1.
মগ্গত্তযে অনিক্খিত্তসিক্খো সন্থতসন্থতে।
Maggattaye anikkhittasikkho santhatasanthate;
অল্লোকাসে নিমিত্তং সং, তিলমত্তম্পি সন্থতং॥
Allokāse nimittaṃ saṃ, tilamattampi santhataṃ.
২.
2.
অসন্থতমুপাদিণ্ণং, পৰেসন্তো চুতোথ ৰা।
Asanthatamupādiṇṇaṃ, pavesanto cutotha vā;
পৰেসনট্ঠিতুদ্ধারপৰিট্ঠক্খণসাদকো॥
Pavesanaṭṭhituddhārapaviṭṭhakkhaṇasādako.
৩.
3.
আদিযেয্য হরেয্যাৰহরেয্য ইরিযাপথং।
Ādiyeyya hareyyāvahareyya iriyāpathaṃ;
কোপেয্য ঠানা চাৰেয্য, সঙ্কেতং ৰীতিনামযে॥
Kopeyya ṭhānā cāveyya, saṅketaṃ vītināmaye.
৪.
4.
অদিন্নং থেয্যচিত্তেন, ভৰে পারাজিকোথ ৰা।
Adinnaṃ theyyacittena, bhave pārājikotha vā;
থেয্যাবলকুসচ্ছন্নপরিকপ্পাৰহারকো।
Theyyābalakusacchannaparikappāvahārako;
ভণ্ডকালগ্ঘদেসেহি, পরিভোগেত্থ নিচ্ছযো॥
Bhaṇḍakālagghadesehi, paribhogettha nicchayo.
৫.
5.
মনুস্সৰিগ্গহং চিচ্চ, জীৰিতা ৰা ৰিযোজযে।
Manussaviggahaṃ cicca, jīvitā vā viyojaye;
সত্থহারকং ৰাস্স মরণচেতনো উপনিক্খিপে॥
Satthahārakaṃ vāssa maraṇacetano upanikkhipe.
৬.
6.
গাহেয্য মরণূপাযং, ৰদেয্য মরণে গুণং।
Gāheyya maraṇūpāyaṃ, vadeyya maraṇe guṇaṃ;
চুতো পযোগা সাহত্থিনিস্সগ্গাণত্তিথাৰরা॥
Cuto payogā sāhatthinissaggāṇattithāvarā.
৭.
7.
ইদ্ধিৰিজ্জামযা কালৰত্থাৰুধিরিযাপথা।
Iddhivijjāmayā kālavatthāvudhiriyāpathā;
ক্রিযাৰিসেসো ওকাসো, ছ আণত্তিনিযামকা॥
Kriyāviseso okāso, cha āṇattiniyāmakā.
৮.
8.
ঝানাদিভেদ নোসন্তমত্তনত্তুপনাযিকং।
Jhānādibheda nosantamattanattupanāyikaṃ;
কত্ৰা কোট্ঠাসমেকেকং, পচ্চুপ্পন্নভৰস্সিতং॥
Katvā koṭṭhāsamekekaṃ, paccuppannabhavassitaṃ.
৯.
9.
অঞ্ঞাপদেসরহিতং , দীপেন্তোনধিমানিকো।
Aññāpadesarahitaṃ , dīpentonadhimāniko;
কাযেন ৰাচা ৰিঞ্ঞত্তি-পথে ঞাতে চুতো ভৰে॥
Kāyena vācā viññatti-pathe ñāte cuto bhave.
১০.
10.
পারাজিকেতে চত্তারো, অসংৰাসা যথা পুরে।
Pārājikete cattāro, asaṃvāsā yathā pure;
অভব্বা ভিক্খুভাৰায, সীসচ্ছিন্নোৰ জীৰিতুং॥
Abhabbā bhikkhubhāvāya, sīsacchinnova jīvituṃ.
১১.
11.
পরিযাযো চ আণত্তি, ততিযে দুতিযে পন।
Pariyāyo ca āṇatti, tatiye dutiye pana;
আণত্তিযেৰ সেসেসু, দ্ৰযমেতং ন লব্ভতি॥
Āṇattiyeva sesesu, dvayametaṃ na labbhati.
১২.
12.
সেৰেতুকামতাচিত্তং , মগ্গে মগ্গপ্পৰেসনং।
Sevetukāmatācittaṃ , magge maggappavesanaṃ;
ইমং মেথুনধম্মস্স, আহু অঙ্গদ্ৰযং বুধা॥
Imaṃ methunadhammassa, āhu aṅgadvayaṃ budhā.
১৩.
13.
মনুস্সসং তথাসঞ্ঞী, থেয্যচিত্তঞ্চ ৰত্থুনো।
Manussasaṃ tathāsaññī, theyyacittañca vatthuno;
গরুতা অৰহারো চ, অদিন্নাদানহেতুযো॥
Garutā avahāro ca, adinnādānahetuyo.
১৪.
14.
পাণো মানুস্সকো পাণ-সঞ্ঞিতা ঘাতচেতনা।
Pāṇo mānussako pāṇa-saññitā ghātacetanā;
পযোগো তেন মরণং, পঞ্চেতে ৰধহেতুযো॥
Payogo tena maraṇaṃ, pañcete vadhahetuyo.
১৫.
15.
অসন্ততা অত্তনি পাপমিচ্ছতা-
Asantatā attani pāpamicchatā-
যারোচনা তস্স মনুস্সজাতিতা।
Yārocanā tassa manussajātitā;
নাঞ্ঞাপদেসো চ তদেৰ জাননং,
Nāññāpadeso ca tadeva jānanaṃ,
পঞ্চেত্থ অঙ্গানি অসন্তদীপনে॥
Pañcettha aṅgāni asantadīpane.
১৬.
16.
অসাধারণা চত্তারো, ভিক্খুনীনমভব্বকা।
Asādhāraṇā cattāro, bhikkhunīnamabhabbakā;
একাদস চ ৰিব্ভন্তা, ভিক্খুনী মুদুপিট্ঠিকো॥
Ekādasa ca vibbhantā, bhikkhunī mudupiṭṭhiko.
১৭.
17.
লম্বী মুখেন গণ্হন্তো, অঙ্গজাতং পরস্স চ।
Lambī mukhena gaṇhanto, aṅgajātaṃ parassa ca;
তত্থেৰাভিনিসীদন্তো, চত্তারো অনুলোমিকা॥
Tatthevābhinisīdanto, cattāro anulomikā.
১৮.
18.
মগ্গে মগ্গপ্পৰেসনা, মেথুনস্স ইধাগতা।
Magge maggappavesanā, methunassa idhāgatā;
চত্তারোতি চতুব্বীস, সমোধানা পরাজিকাতি॥
Cattāroti catubbīsa, samodhānā parājikāti.
