| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೨. ಪಾರಾಜಿಕಾದಿಪಞ್ಹಾ
2. Pārājikādipañhā
೪೮೦.
480.
ಇತ್ಥೀ ಚ ಅಬ್ಭನ್ತರೇ ಸಿಯಾ,
Itthī ca abbhantare siyā,
ಭಿಕ್ಖು ಚ ಬಹಿದ್ಧಾ ಸಿಯಾ।
Bhikkhu ca bahiddhā siyā;
ಛಿದ್ದಂ ತಸ್ಮಿಂ ಘರೇ ನತ್ಥಿ।
Chiddaṃ tasmiṃ ghare natthi;
ಮೇಥುನಧಮ್ಮಪಚ್ಚಯಾ।
Methunadhammapaccayā;
ಕಥಂ ಪಾರಾಜಿಕೋ ಸಿಯಾ।
Kathaṃ pārājiko siyā;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ತೇಲಂ ಮಧುಂ ಫಾಣಿತಞ್ಚಾಪಿ ಸಪ್ಪಿಂ।
Telaṃ madhuṃ phāṇitañcāpi sappiṃ;
ಸಾಮಂ ಗಹೇತ್ವಾನ ನಿಕ್ಖಿಪೇಯ್ಯ।
Sāmaṃ gahetvāna nikkhipeyya;
ಅವೀತಿವತ್ತೇ ಸತ್ತಾಹೇ।
Avītivatte sattāhe;
ಸತಿ ಪಚ್ಚಯೇ ಪರಿಭುಞ್ಜನ್ತಸ್ಸ ಆಪತ್ತಿ।
Sati paccaye paribhuñjantassa āpatti;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ನಿಸ್ಸಗ್ಗಿಯೇನ ಆಪತ್ತಿ।
Nissaggiyena āpatti;
ಸುದ್ಧಕೇನ ಪಾಚಿತ್ತಿಯಂ।
Suddhakena pācittiyaṃ;
ಆಪಜ್ಜನ್ತಸ್ಸ ಏಕತೋ।
Āpajjantassa ekato;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಭಿಕ್ಖೂ ಸಿಯಾ ವೀಸತಿಯಾ ಸಮಾಗತಾ।
Bhikkhū siyā vīsatiyā samāgatā;
ಕಮ್ಮಂ ಕರೇಯ್ಯುಂ ಸಮಗ್ಗಸಞ್ಞಿನೋ।
Kammaṃ kareyyuṃ samaggasaññino;
ಭಿಕ್ಖು ಸಿಯಾ ದ್ವಾದಸಯೋಜನೇ ಠಿತೋ।
Bhikkhu siyā dvādasayojane ṭhito;
ಕಮ್ಮಞ್ಚ ತಂ ಕುಪ್ಪೇಯ್ಯ ವಗ್ಗಪಚ್ಚಯಾ।
Kammañca taṃ kuppeyya vaggapaccayā;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಪದವೀತಿಹಾರಮತ್ತೇನ ವಾಚಾಯ ಭಣಿತೇನ ಚ।
Padavītihāramattena vācāya bhaṇitena ca;
ಸಬ್ಬಾನಿ ಗರುಕಾನಿ ಸಪ್ಪಟಿಕಮ್ಮಾನಿ।
Sabbāni garukāni sappaṭikammāni;
ಚತುಸಟ್ಠಿ ಆಪತ್ತಿಯೋ ಆಪಜ್ಜೇಯ್ಯ ಏಕತೋ।
Catusaṭṭhi āpattiyo āpajjeyya ekato;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ನಿವತ್ಥೋ ಅನ್ತರವಾಸಕೇನ।
Nivattho antaravāsakena;
ದಿಗುಣಂ ಸಙ್ಘಾಟಿಂ ಪಾರುತೋ।
Diguṇaṃ saṅghāṭiṃ pāruto;
ಸಬ್ಬಾನಿ ತಾನಿ ನಿಸ್ಸಗ್ಗಿಯಾನಿ ಹೋನ್ತಿ।
Sabbāni tāni nissaggiyāni honti;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ನ ಚಾಪಿ ಞತ್ತಿ ನ ಚ ಪನ ಕಮ್ಮವಾಚಾ।
Na cāpi ñatti na ca pana kammavācā;
ನ ಚೇಹಿ ಭಿಕ್ಖೂತಿ ಜಿನೋ ಅವೋಚ।
Na cehi bhikkhūti jino avoca;
ಸರಣಗಮನಮ್ಪಿ ನ ತಸ್ಸ ಅತ್ಥಿ।
Saraṇagamanampi na tassa atthi;
ಉಪಸಮ್ಪದಾ ಚಸ್ಸ ಅಕುಪ್ಪಾ।
Upasampadā cassa akuppā;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಇತ್ಥಿಂ ಹನೇ ನ ಮಾತರಂ, ಪುರಿಸಞ್ಚ ನ ಪಿತರಂ ಹನೇ।
Itthiṃ hane na mātaraṃ, purisañca na pitaraṃ hane;
ಹನೇಯ್ಯ ಅನರಿಯಂ ಮನ್ದೋ, ತೇನ ಚಾನನ್ತರಂ ಫುಸೇ।
Haneyya anariyaṃ mando, tena cānantaraṃ phuse;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಇತ್ಥಿಂ ಹನೇ ಚ ಮಾತರಂ, ಪುರಿಸಞ್ಚ ಪಿತರಂ ಹನೇ।
Itthiṃ hane ca mātaraṃ, purisañca pitaraṃ hane;
ಮಾತರಂ ಪಿತರಂ ಹನ್ತ್ವಾ, ನ ತೇನಾನನ್ತರಂ ಫುಸೇ।
Mātaraṃ pitaraṃ hantvā, na tenānantaraṃ phuse;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಅಚೋದಯಿತ್ವಾ ಅಸ್ಸಾರಯಿತ್ವಾ।
Acodayitvā assārayitvā;
ಅಸಮ್ಮುಖೀಭೂತಸ್ಸ ಕರೇಯ್ಯ ಕಮ್ಮಂ।
Asammukhībhūtassa kareyya kammaṃ;
ಕತಞ್ಚ ಕಮ್ಮಂ ಸುಕತಂ ಭವೇಯ್ಯ।
Katañca kammaṃ sukataṃ bhaveyya;
ಕಾರಕೋ ಚ ಸಙ್ಘೋ ಅನಾಪತ್ತಿಕೋ ಸಿಯಾ।
Kārako ca saṅgho anāpattiko siyā;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಚೋದಯಿತ್ವಾ ಸಾರಯಿತ್ವಾ।
Codayitvā sārayitvā;
ಸಮ್ಮುಖೀಭೂತಸ್ಸ ಕರೇಯ್ಯ ಕಮ್ಮಂ।
Sammukhībhūtassa kareyya kammaṃ;
ಕತಞ್ಚ ಕಮ್ಮಂ ಅಕತಂ ಭವೇಯ್ಯ।
Katañca kammaṃ akataṃ bhaveyya;
ಕಾರಕೋ ಚ ಸಙ್ಘೋ ಸಾಪತ್ತಿಕೋ ಸಿಯಾ।
Kārako ca saṅgho sāpattiko siyā;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಛಿನ್ದನ್ತಸ್ಸ ಆಪತ್ತಿ, ಛಿನ್ದನ್ತಸ್ಸ ಅನಾಪತ್ತಿ।
Chindantassa āpatti, chindantassa anāpatti;
ಛಾದೇನ್ತಸ್ಸ ಆಪತ್ತಿ, ಛಾದೇನ್ತಸ್ಸ ಅನಾಪತ್ತಿ।
Chādentassa āpatti, chādentassa anāpatti;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
ಸಚ್ಚಂ ಭಣನ್ತೋ ಗರುಕಂ, ಮುಸಾ ಚ ಲಹು ಭಾಸತೋ।
Saccaṃ bhaṇanto garukaṃ, musā ca lahu bhāsato;
ಮುಸಾ ಭಣನ್ತೋ ಗರುಕಂ, ಸಚ್ಚಞ್ಚ ಲಹು ಭಾಸತೋ।
Musā bhaṇanto garukaṃ, saccañca lahu bhāsato;
ಪಞ್ಹಾ ಮೇಸಾ ಕುಸಲೇಹಿ ಚಿನ್ತಿತಾ॥
Pañhā mesā kusalehi cintitā.
Related texts:
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಪರಿವಾರ-ಅಟ್ಠಕಥಾ • Parivāra-aṭṭhakathā / (೨) ಪಾರಾಜಿಕಾದಿಪಞ್ಹಾವಣ್ಣನಾ • (2) Pārājikādipañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಪಾರಾಜಿಕಾದಿಪಞ್ಹವಣ್ಣನಾ • Pārājikādipañhavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಪಾರಾಜಿಕಾದಿಪಞ್ಹಾವಣ್ಣನಾ • Pārājikādipañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಪಾರಾಜಿಕಾದಿಪಞ್ಹಾವಣ್ಣನಾ • Pārājikādipañhāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / (೨) ಪಾರಾಜಿಕಾದಿಪಞ್ಹಾವಣ್ಣನಾ • (2) Pārājikādipañhāvaṇṇanā
