| Library / Tipiṭaka / তিপিটক • Tipiṭaka / পরিৰারপাল়ি • Parivārapāḷi |
৫. পারাজিকাদিআপত্তি
5. Pārājikādiāpatti
৩৩৯.
339.
‘পারাজিক’ন্তি যং ৰুত্তং, তং সুণোহি যথাতথং।
‘Pārājika’nti yaṃ vuttaṃ, taṃ suṇohi yathātathaṃ;
চুতো পরদ্ধো ভট্ঠো চ, সদ্ধম্মা হি নিরঙ্কতো।
Cuto paraddho bhaṭṭho ca, saddhammā hi niraṅkato;
সংৰাসোপি তহিং নত্থি, তেনেতং ইতি ৰুচ্চতি॥
Saṃvāsopi tahiṃ natthi, tenetaṃ iti vuccati.
‘সঙ্ঘাদিসেসো’তি যং ৰুত্তং, তং সুণোহি যথাতথং।
‘Saṅghādiseso’ti yaṃ vuttaṃ, taṃ suṇohi yathātathaṃ;
সঙ্ঘোৰ দেতি পরিৰাসং, মূলায পটিকস্সতি।
Saṅghova deti parivāsaṃ, mūlāya paṭikassati;
মানত্তং দেতি অব্ভেতি, তেনেতং ইতি ৰুচ্চতি॥
Mānattaṃ deti abbheti, tenetaṃ iti vuccati.
‘অনিযতো’তি যং ৰুত্তং, তং সুণোহি যথাতথং।
‘Aniyato’ti yaṃ vuttaṃ, taṃ suṇohi yathātathaṃ;
অনিযতো ন নিযতো, অনেকংসিকতং পদং।
Aniyato na niyato, anekaṃsikataṃ padaṃ;
তিণ্ণমঞ্ঞতরং ঠানং, ‘অনিযতো’তি পৰুচ্চতি॥
Tiṇṇamaññataraṃ ṭhānaṃ, ‘aniyato’ti pavuccati.
‘থুল্লচ্চয’ন্তি যং ৰুত্তং, তং সুণোহি যথাতথং।
‘Thullaccaya’nti yaṃ vuttaṃ, taṃ suṇohi yathātathaṃ;
একস্স মূলে যো দেসেতি, যো চ তং পটিগণ্হতি।
Ekassa mūle yo deseti, yo ca taṃ paṭigaṇhati;
অচ্চযো তেন সমো নত্থি, তেনেতং ইতি ৰুচ্চতি॥
Accayo tena samo natthi, tenetaṃ iti vuccati.
‘নিস্সগ্গিয’ন্তি যং ৰুত্তং, তং সুণোহি যথাতথং।
‘Nissaggiya’nti yaṃ vuttaṃ, taṃ suṇohi yathātathaṃ;
সঙ্ঘমজ্ঝে গণমজ্ঝে, একস্সেৰ চ একতো।
Saṅghamajjhe gaṇamajjhe, ekasseva ca ekato;
নিস্সজ্জিত্ৰান দেসেতি, তেনেতং ইতি ৰুচ্চতি॥
Nissajjitvāna deseti, tenetaṃ iti vuccati.
‘পাচিত্তিয’ন্তি যং ৰুত্তং, তং সুণোহি যথাতথং।
‘Pācittiya’nti yaṃ vuttaṃ, taṃ suṇohi yathātathaṃ;
পাতেতি কুসলং ধম্মং, অরিযমগ্গং অপরজ্ঝতি।
Pāteti kusalaṃ dhammaṃ, ariyamaggaṃ aparajjhati;
চিত্তসংমোহনট্ঠানং, তেনেতং ইতি ৰুচ্চতি॥
Cittasaṃmohanaṭṭhānaṃ, tenetaṃ iti vuccati.
‘পাটিদেসনীয’ন্তি যং ৰুত্তং, তং সুণোহি যথাতথং।
‘Pāṭidesanīya’nti yaṃ vuttaṃ, taṃ suṇohi yathātathaṃ;
ভিক্খু অঞ্ঞাতকো সন্তো, কিচ্ছা লদ্ধায ভোজনং।
Bhikkhu aññātako santo, kicchā laddhāya bhojanaṃ;
সামং গহেত্ৰা ভুঞ্জেয্য, ‘গারয্হ’ন্তি পৰুচ্চতি॥
Sāmaṃ gahetvā bhuñjeyya, ‘gārayha’nti pavuccati.
নিমন্তনাসু ভুঞ্জন্তা ছন্দায, ৰোসাসতি তত্থ ভিক্খুনিং।
Nimantanāsu bhuñjantā chandāya, vosāsati tattha bhikkhuniṃ;
অনিৰারেত্ৰা তহিং ভুঞ্জে, গারয্হন্তি পৰুচ্চতি॥
Anivāretvā tahiṃ bhuñje, gārayhanti pavuccati.
অগিলানো তহিং ভুঞ্জে, গারয্হন্তি পৰুচ্চতি॥
Agilāno tahiṃ bhuñje, gārayhanti pavuccati.
যো চে অরঞ্ঞে ৰিহরন্তো, সাসঙ্কে সভযানকে।
Yo ce araññe viharanto, sāsaṅke sabhayānake;
অৰিদিতং তহিং ভুঞ্জে, গারয্হন্তি পৰুচ্চতি॥
Aviditaṃ tahiṃ bhuñje, gārayhanti pavuccati.
ভিক্খুনী অঞ্ঞাতিকা সন্তা, যং পরেসং মমাযিতং।
Bhikkhunī aññātikā santā, yaṃ paresaṃ mamāyitaṃ;
সপ্পি তেলং মধুং ফাণিতং, মচ্ছমংসং অথো খীরং।
Sappi telaṃ madhuṃ phāṇitaṃ, macchamaṃsaṃ atho khīraṃ;
দধিং সযং ৰিঞ্ঞাপেয্য ভিক্খুনী, গারয্হপত্তা সুগতস্স সাসনে॥
Dadhiṃ sayaṃ viññāpeyya bhikkhunī, gārayhapattā sugatassa sāsane.
‘দুক্কট’ন্তি যং ৰুত্তং, তং সুণোহি যথাতথং।
‘Dukkaṭa’nti yaṃ vuttaṃ, taṃ suṇohi yathātathaṃ;
অপরদ্ধং ৰিরদ্ধঞ্চ, খলিতং যঞ্চ দুক্কটং॥
Aparaddhaṃ viraddhañca, khalitaṃ yañca dukkaṭaṃ.
যং মনুস্সো করে পাপং, আৰি ৰা যদি ৰা রহো।
Yaṃ manusso kare pāpaṃ, āvi vā yadi vā raho;
‘দুক্কট’ন্তি পৰেদেন্তি, তেনেতং ইতি ৰুচ্চতি॥
‘Dukkaṭa’nti pavedenti, tenetaṃ iti vuccati.
‘দুব্ভাসিত’ন্তি যং ৰুত্তং, তং সুণোহি যথাতথং।
‘Dubbhāsita’nti yaṃ vuttaṃ, taṃ suṇohi yathātathaṃ;
দুব্ভাসিতং দুরাভট্ঠং, সংকিলিট্ঠঞ্চ যং পদং।
Dubbhāsitaṃ durābhaṭṭhaṃ, saṃkiliṭṭhañca yaṃ padaṃ;
যঞ্চ ৰিঞ্ঞূ গরহন্তি, তেনেতং ইতি ৰুচ্চতি॥
Yañca viññū garahanti, tenetaṃ iti vuccati.
‘সেখিয’ন্তি যং ৰুত্তং, তং সুণোহি যথাতথং।
‘Sekhiya’nti yaṃ vuttaṃ, taṃ suṇohi yathātathaṃ;
সেক্খস্স সিক্খমানস্স, উজুমগ্গানুসারিনো॥
Sekkhassa sikkhamānassa, ujumaggānusārino.
আদি চেতং চরণঞ্চ, মুখং সঞ্ঞমসংৰরো।
Ādi cetaṃ caraṇañca, mukhaṃ saññamasaṃvaro;
সিক্খা এতাদিসী নত্থি, তেনেতং ইতি ৰুচ্চতি॥
Sikkhā etādisī natthi, tenetaṃ iti vuccati.
তস্মা ছন্নং ৰিৰরেথ, এৰং তং নাতিৰস্সতি॥
Tasmā channaṃ vivaretha, evaṃ taṃ nātivassati.
গতি মিগানং পৰনং, আকাসো পক্খিনং গতি।
Gati migānaṃ pavanaṃ, ākāso pakkhinaṃ gati;
ৰিভৰো গতি ধম্মানং, নিব্বানং অরহতো গতীতি॥
Vibhavo gati dhammānaṃ, nibbānaṃ arahato gatīti.
গাথাসঙ্গণিকং।
Gāthāsaṅgaṇikaṃ.
তস্সুদ্দানং –
Tassuddānaṃ –
সত্তনগরেসু পঞ্ঞত্তা, ৰিপত্তি চতুরোপি চ।
Sattanagaresu paññattā, vipatti caturopi ca;
ভিক্খূনং ভিক্খুনীনঞ্চ, সাধারণা অসাধারণা।
Bhikkhūnaṃ bhikkhunīnañca, sādhāraṇā asādhāraṇā;
সাসনং অনুগ্গহায, গাথাসঙ্গণিকং ইদন্তি॥
Sāsanaṃ anuggahāya, gāthāsaṅgaṇikaṃ idanti.
গাথাসঙ্গণিকং নিট্ঠিতং।
Gāthāsaṅgaṇikaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / পরিৰার-অট্ঠকথা • Parivāra-aṭṭhakathā / পারাজিকাদিআপত্তিৰণ্ণনা • Pārājikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / অসাধারণাদিৰণ্ণনা • Asādhāraṇādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পারাজিকাদিআপত্তিৰণ্ণনা • Pārājikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পারাজিকাদিআপত্তিৰণ্ণনা • Pārājikādiāpattivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / পারাজিকাদিআপত্তিৰণ্ণনা • Pārājikādiāpattivaṇṇanā
