| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. បាបនិវារិយត្ថេរអបទានំ
10. Pāpanivāriyattheraapadānaṃ
៤៤.
44.
‘‘តិស្សស្ស តុ ភគវតោ, ទេវទេវស្ស តាទិនោ;
‘‘Tissassa tu bhagavato, devadevassa tādino;
ឯកច្ឆត្តំ មយា ទិន្នំ, វិប្បសន្នេន ចេតសា។
Ekacchattaṃ mayā dinnaṃ, vippasannena cetasā.
៤៥.
45.
‘‘និវុតំ ហោតិ មេ បាបំ, កុសលស្សុបសម្បទា;
‘‘Nivutaṃ hoti me pāpaṃ, kusalassupasampadā;
អាកាសេ ឆត្តំ ធារេន្តិ, បុព្ពកម្មស្សិទំ ផលំ។
Ākāse chattaṃ dhārenti, pubbakammassidaṃ phalaṃ.
៤៦.
46.
‘‘ចរិមំ វត្តតេ មយ្ហំ, ភវា សព្ពេ សមូហតា;
‘‘Carimaṃ vattate mayhaṃ, bhavā sabbe samūhatā;
ធារេមិ អន្តិមំ ទេហំ, សម្មាសម្ពុទ្ធសាសនេ។
Dhāremi antimaṃ dehaṃ, sammāsambuddhasāsane.
៤៧.
47.
‘‘ទ្វេនវុតេ ឥតោ កប្បេ, យំ ឆត្តមទទិំ តទា;
‘‘Dvenavute ito kappe, yaṃ chattamadadiṃ tadā;
ទុគ្គតិំ នាភិជានាមិ, ឆត្តទានស្សិទំ ផលំ។
Duggatiṃ nābhijānāmi, chattadānassidaṃ phalaṃ.
៤៨.
48.
‘‘ទ្វេសត្តតិម្ហិតោ កប្បេ, អដ្ឋាសិំសុ ជនាធិបា;
‘‘Dvesattatimhito kappe, aṭṭhāsiṃsu janādhipā;
មហានិទាននាមេន, រាជានោ ចក្កវត្តិនោ។
Mahānidānanāmena, rājāno cakkavattino.
៤៩.
49.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា បាបនិវារិយោ 1 ថេរោ ឥមា គាថាយោ អភាសិត្ថាតិ;
Itthaṃ sudaṃ āyasmā pāpanivāriyo 2 thero imā gāthāyo abhāsitthāti;
បាបនិវារិយត្ថេរស្សាបទានំ ទសមំ។
Pāpanivāriyattherassāpadānaṃ dasamaṃ.
កណិការបុប្ផិយវគ្គោ ឯកវីសតិមោ។
Kaṇikārapupphiyavaggo ekavīsatimo.
តស្សុទ្ទានំ –
Tassuddānaṃ –
កណិការោ មិនេលញ្ច, កិង្កណិ តរណេន ច;
Kaṇikāro minelañca, kiṅkaṇi taraṇena ca;
និគ្គុណ្ឌិបុប្ផី ទកទោ, សលលោ ច កុរណ្ឌកោ;
Nigguṇḍipupphī dakado, salalo ca kuraṇḍako;
អាធារកោ បាបវារី, អដ្ឋតាលីស គាថកាតិ។
Ādhārako pāpavārī, aṭṭhatālīsa gāthakāti.
Footnotes:
