| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၇. ပဉ္စာလစဏ္ဍသုတ္တဝဏ္ဏနာ
7. Pañcālacaṇḍasuttavaṇṇanā
၈၈. သမ္ဗာဓေတိ သမ္ပီဠိတတဏ္ဟာကိလေသာဒိနာ သဥပ္ပီဠတာယ ပရမသမ္ဗာဓေ။ အတိဝိယ သင္ကာရဋ္ဌာနဘူတော ဟိ နီဝရဏသမ္ဗာဓော အဓိပ္ပေတော။ သော ဟိ ဒုဂ္ဂဟနော တသ္မိံ အသတိ ကာမဂုဏသမ္ဗာဓော အနဝသရော ဧဝ သေယ္ယထာပိ မဟာကသ္သပာဒီနံ။ ဩကာသန္တိ ဈာနသ္သေတံ နာမံ နီဝရဏသမ္ဗာဓာဘာဝတော။ အသမ္ဗာဓဘာဝေန ဟိ ဈာနံ ဣဓ ‘‘ဩကာသော’’တိ ဝုတ္တံ, တဉ္စ ခော အစ္စန္တာသမ္ဗာဓဋ္ဌာနတာယ ဝိပသ္သနာပာဒကတာယ ။ တထာ ဟိ ပာဠိယံ ‘‘အဝိန္ဒီ’’တိအာဒိ ဝုတ္တံ။ တတ္ထ အဝိန္ဒီတိ ဝိန္ဒိ ပဋိလဘိ။ ဘူရိမေဓသောတိ မဟာပညော, သပညောတိ အတ္ထော။ အဗုဇ္ဈီတိ ဗုဇ္ဈိ ပဋိဝိဇ္ဈိ။ ပဋိလီနော ဟုတ္ဝာ သေဋ္ဌော, ပဋိလီနာနံ ဝာ သေဋ္ဌောတိ ပဋိလီနသေဋ္ဌော။ မာနုသ္သယဝသေန ဥန္နတဘာဝတော ပဋိလီနော နာမ ပဟီနမာနော။ ပဋိလဘိံသူတိ ကာမဂုဏသမ္ဗာဓေပိ ‘‘ဣမေ ကာမဂုဏာ မာဒိသာနံ ကိံ ကရိသ္သန္တီ’’တိ? တေ အဘိဘုယ္ယ နိဗ္ဗာနပ္ပတ္တိယာ သမ္မာသတိံ ပဋိလဘိံသု။ တေန သမ္ပယုတ္တေန လောကုတ္တရသမာဓိနာပိ သုဋ္ဌု သမာဟိတာ။
88.Sambādheti sampīḷitataṇhākilesādinā sauppīḷatāya paramasambādhe. Ativiya saṅkāraṭṭhānabhūto hi nīvaraṇasambādho adhippeto. So hi duggahano tasmiṃ asati kāmaguṇasambādho anavasaro eva seyyathāpi mahākassapādīnaṃ. Okāsanti jhānassetaṃ nāmaṃ nīvaraṇasambādhābhāvato. Asambādhabhāvena hi jhānaṃ idha ‘‘okāso’’ti vuttaṃ, tañca kho accantāsambādhaṭṭhānatāya vipassanāpādakatāya . Tathā hi pāḷiyaṃ ‘‘avindī’’tiādi vuttaṃ. Tattha avindīti vindi paṭilabhi. Bhūrimedhasoti mahāpañño, sapaññoti attho. Abujjhīti bujjhi paṭivijjhi. Paṭilīno hutvā seṭṭho, paṭilīnānaṃ vā seṭṭhoti paṭilīnaseṭṭho. Mānussayavasena unnatabhāvato paṭilīno nāma pahīnamāno. Paṭilabhiṃsūti kāmaguṇasambādhepi ‘‘ime kāmaguṇā mādisānaṃ kiṃ karissantī’’ti? Te abhibhuyya nibbānappattiyā sammāsatiṃ paṭilabhiṃsu. Tena sampayuttena lokuttarasamādhināpi suṭṭhu samāhitā.
အယံ ကိရ ဒေဝပုတ္တော ဣတော ပုရိမဝာရေ အတ္တဘာဝေ ပဌမဇ္ဈာနလာဘီ ဟုတ္ဝာ တတော စဝိတ္ဝာ ဗ္ရဟ္မကာယိကာသု နိဗ္ဗတ္တိတ္ဝာ တတ္ထ ဈာနသုခံ အနုဘဝိတ္ဝာ တတော စုတော ဣဒာနိ ကာမဘဝေ နိဗ္ဗတ္တော, တသ္မာ တံ ဈာနံ သမ္ဘာဝေန္တော ‘‘တာဒိသသ္သ နာမ ဈာနသုခသ္သ လာဘီ ဘဂဝာ’’တိ တေန ဂုဏေန ဘဂဝန္တံ အဘိတ္ထဝန္တော ‘‘သမ္ဗာဓေ ဝတာ’’တိ ဂာထံ အဘာသိ။ အထသ္သ ဘဂဝာ ယထာ နာမ အဋ္ဌသဋ္ဌိယောဇနသတသဟသ္သုဗ္ဗေဓသိနေရုပဗ္ဗတရာဇံ ဥပာဒာယ သာသပော န ကိဉ္စိ ဟောတိ, ဧဝံ အနန္တာပရိမေယ္ယဗုဒ္ဓဂုဏေ ဥပာဒာယ ရူပာဝစရပဌမဇ္ဈာနံ န ကိဉ္စိ ဟောတီတိ ဒသ္သေန္တော ‘‘ယေ သတိ’’န္တိအာဒိနာ အနုတ္တရဂုဏာဓိဂမံ ပဝေဒေသိ။ တတ္ထ သတိန္တိ ဝိပသ္သနာသတိယာ သဒ္ဓိံ အရိယမဂ္ဂသတိံ။ သုသမာဟိတာတိ လောကိယသမာဓိနာ စေဝ လောကုတ္တရသမာဓိနာ စ သုဋ္ဌု သမာဟိတာ။ တေ ဟိ အစ္စန္တံ သုသမာဟိတာ, န ဈာနမတ္တလာဘိနော အကုပ္ပဓမ္မတ္တာ။ ကေစိ ‘‘ကမ္မန္တေ သုသမာဟိတာ’’တိ ပာဌံ ဝတ္ဝာ ‘‘မဂ္ဂသမာဟိတာ’’တိ အတ္ထံ ဝဒန္တိ။
Ayaṃ kira devaputto ito purimavāre attabhāve paṭhamajjhānalābhī hutvā tato cavitvā brahmakāyikāsu nibbattitvā tattha jhānasukhaṃ anubhavitvā tato cuto idāni kāmabhave nibbatto, tasmā taṃ jhānaṃ sambhāvento ‘‘tādisassa nāma jhānasukhassa lābhī bhagavā’’ti tena guṇena bhagavantaṃ abhitthavanto ‘‘sambādhe vatā’’ti gāthaṃ abhāsi. Athassa bhagavā yathā nāma aṭṭhasaṭṭhiyojanasatasahassubbedhasinerupabbatarājaṃ upādāya sāsapo na kiñci hoti, evaṃ anantāparimeyyabuddhaguṇe upādāya rūpāvacarapaṭhamajjhānaṃ na kiñci hotīti dassento ‘‘ye sati’’ntiādinā anuttaraguṇādhigamaṃ pavedesi. Tattha satinti vipassanāsatiyā saddhiṃ ariyamaggasatiṃ. Susamāhitāti lokiyasamādhinā ceva lokuttarasamādhinā ca suṭṭhu samāhitā. Te hi accantaṃ susamāhitā, na jhānamattalābhino akuppadhammattā. Keci ‘‘kammante susamāhitā’’ti pāṭhaṃ vatvā ‘‘maggasamāhitā’’ti atthaṃ vadanti.
ပဉ္စာလစဏ္ဍသုတ္တဝဏ္ဏနာ နိဋ္ဌိတာ။
Pañcālacaṇḍasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၇. ပဉ္စာလစဏ္ဍသုတ္တံ • 7. Pañcālacaṇḍasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၇. ပဉ္စာလစဏ္ဍသုတ္တဝဏ္ဏနာ • 7. Pañcālacaṇḍasuttavaṇṇanā
