| Library / Tipiṭaka / តិបិដក • Tipiṭaka / វិមតិវិនោទនី-ដីកា • Vimativinodanī-ṭīkā |
បណាមនាខមាបនាកថាវណ្ណនា
Paṇāmanākhamāpanākathāvaṇṇanā
៨០. យំ បុព្ពេ លក្ខណំ វុត្តំ, តេនេវ លក្ខណេន និស្សយន្តេវាសិកស្ស អាបត្តិ ន វេទិតព្ពាតិ សម្ពន្ធយោជនា ទដ្ឋព្ពា។ បោត្ថកេសុ បន ‘‘ន តេនេវ លក្ខណេនា’’តិ ឯត្ថ ន-ការំ ឆឌ្ឌេត្វា ‘‘តេនេវ លក្ខណេន និស្សយន្តេវាសិកស្ស អាបត្តិ វេទិតព្ពា’’តិ លិខន្តិ, តំ បមាទលិខិតំ។ តថា ហិ តេនេវ លក្ខណេន អាបត្តិភាវេ គយ្ហមានេ និស្សយមុត្តកស្សាបិ អមុត្តកស្សាបិ អាបត្តិ ឯវាតិ វុត្តលក្ខណេន អាបត្តិំ អាបជ្ជេយ្យ។ តថា ច ‘‘និស្សយន្តេវាសិកេន ហិ យាវ អាចរិយំ និស្សាយ វសតិ, តាវ សព្ពំ អាចរិយវត្តំ កាតព្ព’’ន្តិ ឥមិនា អនន្តរវចនេន វិរោធោ សិយា។ វិសុទ្ធិមគ្គេបិ ច –
80. Yaṃ pubbe lakkhaṇaṃ vuttaṃ, teneva lakkhaṇena nissayantevāsikassa āpatti na veditabbāti sambandhayojanā daṭṭhabbā. Potthakesu pana ‘‘na teneva lakkhaṇenā’’ti ettha na-kāraṃ chaḍḍetvā ‘‘teneva lakkhaṇena nissayantevāsikassa āpatti veditabbā’’ti likhanti, taṃ pamādalikhitaṃ. Tathā hi teneva lakkhaṇena āpattibhāve gayhamāne nissayamuttakassāpi amuttakassāpi āpatti evāti vuttalakkhaṇena āpattiṃ āpajjeyya. Tathā ca ‘‘nissayantevāsikena hi yāva ācariyaṃ nissāya vasati, tāva sabbaṃ ācariyavattaṃ kātabba’’nti iminā anantaravacanena virodho siyā. Visuddhimaggepi ca –
‘‘និស្សយាចរិយ, ឧទ្ទេសាចរិយ, និស្សយន្តេវាសិក, ឧទ្ទេសន្តេវាសិក, សមានាចរិយកា បន យាវ និស្សយឧទ្ទេសា អនុបច្ឆិន្នា។ តាវ បដិជគ្គិតព្ពា’’តិ (វិសុទ្ធិ. ១.៤១) –
‘‘Nissayācariya, uddesācariya, nissayantevāsika, uddesantevāsika, samānācariyakā pana yāva nissayauddesā anupacchinnā. Tāva paṭijaggitabbā’’ti (visuddhi. 1.41) –
វុត្តំ ។ តស្មា វុត្តនយេន ឥធ បរិគឡិតំ ន-ការំ អានេត្វា តេនេវ សទ្ធិវិហារិកស្ស វុត្តេនេវ លក្ខណេន និស្សយន្តេវាសិកស្ស អាបត្តិ ន វេទិតព្ពាតិ ឯវមត្ថោ គហេតព្ពោ។
Vuttaṃ . Tasmā vuttanayena idha parigaḷitaṃ na-kāraṃ ānetvā teneva saddhivihārikassa vutteneva lakkhaṇena nissayantevāsikassa āpatti na veditabbāti evamattho gahetabbo.
បណាមនាខមាបនាកថាវណ្ណនា និដ្ឋិតា។
Paṇāmanākhamāpanākathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ២០. បណាមនា ខមាបនា • 20. Paṇāmanā khamāpanā
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / បណាមនាខមនាកថា • Paṇāmanākhamanākathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បណាមនាខមាបនាកថាវណ្ណនា • Paṇāmanākhamāpanākathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២០. បណាមនាខមាបនាកថា • 20. Paṇāmanākhamāpanākathā
