| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៤៩. បំសុកូលវគ្គោ
49. Paṃsukūlavaggo
១. បំសុកូលសញ្ញកត្ថេរអបទានំ
1. Paṃsukūlasaññakattheraapadānaṃ
១.
1.
‘‘តិស្សោ នាមាសិ ភគវា, សយម្ភូ អគ្គបុគ្គលោ;
‘‘Tisso nāmāsi bhagavā, sayambhū aggapuggalo;
បំសុកូលំ ឋបេត្វាន, វិហារំ បាវិសី ជិនោ។
Paṃsukūlaṃ ṭhapetvāna, vihāraṃ pāvisī jino.
២.
2.
មណ្ឌលគ្គំ គហេត្វាន, កាននំ បាវិសិំ អហំ។
Maṇḍalaggaṃ gahetvāna, kānanaṃ pāvisiṃ ahaṃ.
៣.
3.
‘‘តត្ថទ្ទសំ បំសុកូលំ, ទុមគ្គេ លគ្គិតំ តទា;
‘‘Tatthaddasaṃ paṃsukūlaṃ, dumagge laggitaṃ tadā;
ចាបំ តត្ថេវ និក្ខិប្ប, សិរេ កត្វាន អញ្ជលិំ។
Cāpaṃ tattheva nikkhippa, sire katvāna añjaliṃ.
៤.
4.
‘‘បសន្នចិត្តោ សុមនោ, វិបុលាយ ច បីតិយា;
‘‘Pasannacitto sumano, vipulāya ca pītiyā;
ពុទ្ធសេដ្ឋំ សរិត្វាន, បំសុកូលំ អវន្ទហំ។
Buddhaseṭṭhaṃ saritvāna, paṃsukūlaṃ avandahaṃ.
៥.
5.
‘‘ទ្វេនវុតេ ឥតោ កប្បេ, បំសុកូលមវន្ទហំ;
‘‘Dvenavute ito kappe, paṃsukūlamavandahaṃ;
ទុគ្គតិំ នាភិជានាមិ, វន្ទនាយ ឥទំ ផលំ។
Duggatiṃ nābhijānāmi, vandanāya idaṃ phalaṃ.
៦.
6.
‘‘កិលេសា ឈាបិតា មយ្ហំ, ភវា សព្ពេ សមូហតា;
‘‘Kilesā jhāpitā mayhaṃ, bhavā sabbe samūhatā;
នាគោវ ពន្ធនំ ឆេត្វា, វិហរាមិ អនាសវោ។
Nāgova bandhanaṃ chetvā, viharāmi anāsavo.
៧.
7.
‘‘ស្វាគតំ វត មេ អាសិ, មម ពុទ្ធស្ស សន្តិកេ;
‘‘Svāgataṃ vata me āsi, mama buddhassa santike;
តិស្សោ វិជ្ជា អនុប្បត្តា, កតំ ពុទ្ធស្ស សាសនំ។
Tisso vijjā anuppattā, kataṃ buddhassa sāsanaṃ.
៨.
8.
‘‘បដិសម្ភិទា ចតស្សោ, វិមោក្ខាបិ ច អដ្ឋិមេ;
‘‘Paṭisambhidā catasso, vimokkhāpi ca aṭṭhime;
ឆឡភិញ្ញា សច្ឆិកតា, កតំ ពុទ្ធស្ស សាសនំ’’។
Chaḷabhiññā sacchikatā, kataṃ buddhassa sāsanaṃ’’.
ឥត្ថំ សុទំ អាយស្មា បំសុកូលសញ្ញកោ ថេរោ ឥមា គាថាយោ
Itthaṃ sudaṃ āyasmā paṃsukūlasaññako thero imā gāthāyo
អភាសិត្ថាតិ។
Abhāsitthāti.
បំសុកូលសញ្ញកត្ថេរស្សាបទានំ បឋមំ។
Paṃsukūlasaññakattherassāpadānaṃ paṭhamaṃ.
Footnotes:
