| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
១០. បល្លង្កទាយកត្ថេរអបទានវណ្ណនា
10. Pallaṅkadāyakattheraapadānavaṇṇanā
សុមេធស្ស ភគវតោតិអាទិកំ អាយស្មតោ បល្លង្កទាយកត្ថេរស្ស អបទានំ។ អយម្បិ បុរិមពុទ្ធេសុ កតាធិការោ អនេកេសុ ភវេសុ និព្ពានាធិគមត្ថាយ កតបុញ្ញូបចយោ សុមេធស្ស ភគវតោ កាលេ គហបតិកុលេ និព្ពត្តោ វុទ្ធិមន្វាយ មហាភោគសម្បន្នោ សត្ថរិ បសីទិត្វា ធម្មំ សុត្វា តស្ស សត្ថុនោ សត្តរតនមយំ បល្លង្កំ ការេត្វា មហន្តំ បូជំ អកាសិ។ សោ តេន បុញ្ញេន ទេវមនុស្សេសុ សំសរន្តោ សព្ពត្ថ បូជិតោ អហោសិ។ សោ អនុក្កមេន ឥមស្មិំ ពុទ្ធុប្បាទេ វិភវសម្បន្នេ ឯកស្មិំ កុលេ និព្ពត្តោ វិញ្ញុតំ បត្តោ ឃរាវាសំ សណ្ឋបេត្វា សត្ថុ ធម្មទេសនំ សុត្វា បសន្នោ បព្ពជិត្វា នចិរស្សេវ អរហត្តំ បត្វា បុព្ពេ កតបុញ្ញនាមេន បល្លង្កទាយកត្ថេរោតិ បាកដោ អហោសិ។ ហេដ្ឋា វិយ ឧបរិបិ បុព្ពេ កតបុញ្ញនាមេន ថេរានំ នាមានិ ឯវមេវ វេទិតព្ពានិ។
Sumedhassabhagavatotiādikaṃ āyasmato pallaṅkadāyakattherassa apadānaṃ. Ayampi purimabuddhesu katādhikāro anekesu bhavesu nibbānādhigamatthāya katapuññūpacayo sumedhassa bhagavato kāle gahapatikule nibbatto vuddhimanvāya mahābhogasampanno satthari pasīditvā dhammaṃ sutvā tassa satthuno sattaratanamayaṃ pallaṅkaṃ kāretvā mahantaṃ pūjaṃ akāsi. So tena puññena devamanussesu saṃsaranto sabbattha pūjito ahosi. So anukkamena imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā satthu dhammadesanaṃ sutvā pasanno pabbajitvā nacirasseva arahattaṃ patvā pubbe katapuññanāmena pallaṅkadāyakattheroti pākaṭo ahosi. Heṭṭhā viya uparipi pubbe katapuññanāmena therānaṃ nāmāni evameva veditabbāni.
៤៧. សោ ឯកទិវសំ អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ សុមេធស្ស ភគវតោតិអាទិមាហ។ បល្លង្កោ ហិ មយា ទិន្នោតិ បល្លង្កំ ឩរុពទ្ធាសនំ កត្វា យត្ថ ឧបវីសន្តិ និសីទន្តិ, សោ បល្លង្កោតិ វុច្ចតិ, សោ បល្លង្កោ សត្តរតនមយោ មយា ទិន្នោ បូជិតោតិ អត្ថោ។ សឧត្តរសបច្ឆទោតិ សហ ឧត្តរច្ឆទេន សហ បច្ឆទេន សឧត្តរសបច្ឆទោ, ឧបរិវិតានំ ពន្ធិត្វា អាសនំ ឧត្តមវត្ថេហិ អច្ឆាទេត្វាតិ អត្ថោ។ សេសំ បាកដមេវាតិ។
47. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento sumedhassa bhagavatotiādimāha. Pallaṅko hi mayā dinnoti pallaṅkaṃ ūrubaddhāsanaṃ katvā yattha upavīsanti nisīdanti, so pallaṅkoti vuccati, so pallaṅko sattaratanamayo mayā dinno pūjitoti attho. Sauttarasapacchadoti saha uttaracchadena saha pacchadena sauttarasapacchado, uparivitānaṃ bandhitvā āsanaṃ uttamavatthehi acchādetvāti attho. Sesaṃ pākaṭamevāti.
បល្លង្កទាយកត្ថេរអបទានវណ្ណនា សមត្តា។
Pallaṅkadāyakattheraapadānavaṇṇanā samattā.
បន្នរសមវគ្គវណ្ណនា សមត្តា។
Pannarasamavaggavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. វដំសកិយត្ថេរអបទានំ • 9. Vaṭaṃsakiyattheraapadānaṃ
