| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. பல்லங்கதா³யகத்தே²ரஅபதா³னவண்ணனா
10. Pallaṅkadāyakattheraapadānavaṇṇanā
ஸுமேத⁴ஸ்ஸ ப⁴க³வதோதிஆதி³கங் ஆயஸ்மதோ பல்லங்கதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகேஸு ப⁴வேஸு நிப்³பா³னாதி⁴க³மத்தா²ய கதபுஞ்ஞூபசயோ ஸுமேத⁴ஸ்ஸ ப⁴க³வதோ காலே க³ஹபதிகுலே நிப்³ப³த்தோ வுத்³தி⁴மன்வாய மஹாபோ⁴க³ஸம்பன்னோ ஸத்த²ரி பஸீதி³த்வா த⁴ம்மங் ஸுத்வா தஸ்ஸ ஸத்து²னோ ஸத்தரதனமயங் பல்லங்கங் காரெத்வா மஹந்தங் பூஜங் அகாஸி. ஸோ தேன புஞ்ஞேன தே³வமனுஸ்ஸேஸு ஸங்ஸரந்தோ ஸப்³ப³த்த² பூஜிதோ அஹோஸி. ஸோ அனுக்கமேன இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலே நிப்³ப³த்தோ விஞ்ஞுதங் பத்தோ க⁴ராவாஸங் ஸண்ட²பெத்வா ஸத்து² த⁴ம்மதே³ஸனங் ஸுத்வா பஸன்னோ பப்³ப³ஜித்வா நசிரஸ்ஸேவ அரஹத்தங் பத்வா புப்³பே³ கதபுஞ்ஞனாமேன பல்லங்கதா³யகத்தே²ரோதி பாகடோ அஹோஸி. ஹெட்டா² விய உபரிபி புப்³பே³ கதபுஞ்ஞனாமேன தே²ரானங் நாமானி ஏவமேவ வேதி³தப்³பா³னி.
Sumedhassabhagavatotiādikaṃ āyasmato pallaṅkadāyakattherassa apadānaṃ. Ayampi purimabuddhesu katādhikāro anekesu bhavesu nibbānādhigamatthāya katapuññūpacayo sumedhassa bhagavato kāle gahapatikule nibbatto vuddhimanvāya mahābhogasampanno satthari pasīditvā dhammaṃ sutvā tassa satthuno sattaratanamayaṃ pallaṅkaṃ kāretvā mahantaṃ pūjaṃ akāsi. So tena puññena devamanussesu saṃsaranto sabbattha pūjito ahosi. So anukkamena imasmiṃ buddhuppāde vibhavasampanne ekasmiṃ kule nibbatto viññutaṃ patto gharāvāsaṃ saṇṭhapetvā satthu dhammadesanaṃ sutvā pasanno pabbajitvā nacirasseva arahattaṃ patvā pubbe katapuññanāmena pallaṅkadāyakattheroti pākaṭo ahosi. Heṭṭhā viya uparipi pubbe katapuññanāmena therānaṃ nāmāni evameva veditabbāni.
47. ஸோ ஏகதி³வஸங் அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுமேத⁴ஸ்ஸ ப⁴க³வதோதிஆதி³மாஹ. பல்லங்கோ ஹி மயா தி³ன்னோதி பல்லங்கங் ஊருப³த்³தா⁴ஸனங் கத்வா யத்த² உபவீஸந்தி நிஸீத³ந்தி, ஸோ பல்லங்கோதி வுச்சதி, ஸோ பல்லங்கோ ஸத்தரதனமயோ மயா தி³ன்னோ பூஜிதோதி அத்தோ². ஸஉத்தரஸபச்ச²தோ³தி ஸஹ உத்தரச்ச²தே³ன ஸஹ பச்ச²தே³ன ஸஉத்தரஸபச்ச²தோ³, உபரிவிதானங் ப³ந்தி⁴த்வா ஆஸனங் உத்தமவத்தே²ஹி அச்சா²தெ³த்வாதி அத்தோ². ஸேஸங் பாகடமேவாதி.
47. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento sumedhassa bhagavatotiādimāha. Pallaṅko hi mayā dinnoti pallaṅkaṃ ūrubaddhāsanaṃ katvā yattha upavīsanti nisīdanti, so pallaṅkoti vuccati, so pallaṅko sattaratanamayo mayā dinno pūjitoti attho. Sauttarasapacchadoti saha uttaracchadena saha pacchadena sauttarasapacchado, uparivitānaṃ bandhitvā āsanaṃ uttamavatthehi acchādetvāti attho. Sesaṃ pākaṭamevāti.
பல்லங்கதா³யகத்தே²ரஅபதா³னவண்ணனா ஸமத்தா.
Pallaṅkadāyakattheraapadānavaṇṇanā samattā.
பன்னரஸமவக்³க³வண்ணனா ஸமத்தா.
Pannarasamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. வடங்ஸகியத்தே²ரஅபதா³னங் • 9. Vaṭaṃsakiyattheraapadānaṃ
