| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
១០. បល្លង្កទាយកត្ថេរអបទានំ
10. Pallaṅkadāyakattheraapadānaṃ
៤៨.
48.
‘‘សុមេធស្ស ភគវតោ, លោកជេដ្ឋស្ស តាទិនោ;
‘‘Sumedhassa bhagavato, lokajeṭṭhassa tādino;
បល្លង្កោ ហិ មយា ទិន្នោ, សឧត្តរសបច្ឆទោ។
Pallaṅko hi mayā dinno, sauttarasapacchado.
៤៩.
49.
‘‘សត្តរតនសម្បន្នោ , បល្លង្កោ អាសិ សោ តទា;
‘‘Sattaratanasampanno , pallaṅko āsi so tadā;
មម សង្កប្បមញ្ញាយ, និព្ពត្តតិ សទា មម។
Mama saṅkappamaññāya, nibbattati sadā mama.
៥០.
50.
‘‘តិំសកប្បសហស្សម្ហិ, បល្លង្កមទទិំ តទា;
‘‘Tiṃsakappasahassamhi, pallaṅkamadadiṃ tadā;
ទុគ្គតិំ នាភិជានាមិ, បល្លង្កស្ស ឥទំ ផលំ។
Duggatiṃ nābhijānāmi, pallaṅkassa idaṃ phalaṃ.
៥១.
51.
‘‘វីសកប្បសហស្សម្ហិ, សុវណ្ណាភា តយោ ជនា;
‘‘Vīsakappasahassamhi, suvaṇṇābhā tayo janā;
សត្តរតនសម្បន្នា, ចក្កវត្តី មហព្ពលា។
Sattaratanasampannā, cakkavattī mahabbalā.
៥២.
52.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា បល្លង្កទាយកោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā pallaṅkadāyako thero imā gāthāyo abhāsitthāti.
បល្លង្កទាយកត្ថេរស្សាបទានំ ទសមំ។
Pallaṅkadāyakattherassāpadānaṃ dasamaṃ.
ឆត្តវគ្គោ បន្នរសមោ។
Chattavaggo pannarasamo.
តស្សុទ្ទានំ –
Tassuddānaṃ –
ឆត្តំ ថម្ភោ ច វេទិ ច, បរិវារុមបុប្ផិយោ;
Chattaṃ thambho ca vedi ca, parivārumapupphiyo;
អនុលេបោ ច មគ្គោ ច, ផលកោ ច វដំសកោ;
Anulepo ca maggo ca, phalako ca vaṭaṃsako;
បល្លង្កទាយី ច គាថាយោ, ឆប្បញ្ញាស បកិត្តិតាតិ។
Pallaṅkadāyī ca gāthāyo, chappaññāsa pakittitāti.
