| Library / Tipiṭaka / తిపిటక • Tipiṭaka / మహావగ్గపాళి • Mahāvaggapāḷi |
౨౦౦. పలిబోధాపలిబోధకథా
200. Palibodhāpalibodhakathā
౩౨౫. ద్వేమే , భిక్ఖవే, కథినస్స పలిబోధా, ద్వే అపలిబోధా. కతమే చ, భిక్ఖవే, ద్వే కథినస్స పలిబోధా? ఆవాసపలిబోధో చ చీవరపలిబోధో చ. కథఞ్చ, భిక్ఖవే, ఆవాసపలిబోధో హోతి? ఇధ, భిక్ఖవే, భిక్ఖు వసతి వా తస్మిం ఆవాసే, సాపేక్ఖో వా పక్కమతి ‘‘పచ్చేస్స’’న్తి. ఏవం ఖో, భిక్ఖవే, ఆవాసపలిబోధో హోతి. కథఞ్చ, భిక్ఖవే, చీవరపలిబోధో హోతి? ఇధ, భిక్ఖవే, భిక్ఖునో చీవరం అకతం వా హోతి విప్పకతం వా, చీవరాసా వా అనుపచ్ఛిన్నా. ఏవం ఖో, భిక్ఖవే, చీవరపలిబోధో హోతి. ఇమే ఖో, భిక్ఖవే, ద్వే కథినస్స పలిబోధా.
325. Dveme , bhikkhave, kathinassa palibodhā, dve apalibodhā. Katame ca, bhikkhave, dve kathinassa palibodhā? Āvāsapalibodho ca cīvarapalibodho ca. Kathañca, bhikkhave, āvāsapalibodho hoti? Idha, bhikkhave, bhikkhu vasati vā tasmiṃ āvāse, sāpekkho vā pakkamati ‘‘paccessa’’nti. Evaṃ kho, bhikkhave, āvāsapalibodho hoti. Kathañca, bhikkhave, cīvarapalibodho hoti? Idha, bhikkhave, bhikkhuno cīvaraṃ akataṃ vā hoti vippakataṃ vā, cīvarāsā vā anupacchinnā. Evaṃ kho, bhikkhave, cīvarapalibodho hoti. Ime kho, bhikkhave, dve kathinassa palibodhā.
కతమే చ, భిక్ఖవే, ద్వే కథినస్స అపలిబోధా? ఆవాసఅపలిబోధో చ చీవరఅపలిబోధో చ. కథఞ్చ, భిక్ఖవే, ఆవాసఅపలిబోధో హోతి? ఇధ, భిక్ఖవే, భిక్ఖు పక్కమతి తమ్హా ఆవాసా చత్తేన వన్తేన ముత్తేన అనపేక్ఖో 1 ‘‘న పచ్చేస్స’’న్తి. ఏవం ఖో, భిక్ఖవే, ఆవాసఅపలిబోధో హోతి. కథఞ్చ, భిక్ఖవే, చీవరఅపలిబోధో హోతి? ఇధ, భిక్ఖవే, భిక్ఖునో చీవరం కతం వా హోతి, నట్ఠం వా వినట్ఠం వా దడ్ఢం వా, చీవరాసా వా ఉపచ్ఛిన్నా. ఏవం ఖో, భిక్ఖవే, చీవరఅపలిబోధో హోతి. ఇమే ఖో, భిక్ఖవే, ద్వే కథినస్స అపలిబోధాతి.
Katame ca, bhikkhave, dve kathinassa apalibodhā? Āvāsaapalibodho ca cīvaraapalibodho ca. Kathañca, bhikkhave, āvāsaapalibodho hoti? Idha, bhikkhave, bhikkhu pakkamati tamhā āvāsā cattena vantena muttena anapekkho 2 ‘‘na paccessa’’nti. Evaṃ kho, bhikkhave, āvāsaapalibodho hoti. Kathañca, bhikkhave, cīvaraapalibodho hoti? Idha, bhikkhave, bhikkhuno cīvaraṃ kataṃ vā hoti, naṭṭhaṃ vā vinaṭṭhaṃ vā daḍḍhaṃ vā, cīvarāsā vā upacchinnā. Evaṃ kho, bhikkhave, cīvaraapalibodho hoti. Ime kho, bhikkhave, dve kathinassa apalibodhāti.
పలిబోధాపలిబోధకథా నిట్ఠితా.
Palibodhāpalibodhakathā niṭṭhitā.
కథినక్ఖన్ధకో నిట్ఠితో సత్తమో.
Kathinakkhandhako niṭṭhito sattamo.
Footnotes:
Related texts:
అట్ఠకథా • Aṭṭhakathā / వినయపిటక (అట్ఠకథా) • Vinayapiṭaka (aṭṭhakathā) / మహావగ్గ-అట్ఠకథా • Mahāvagga-aṭṭhakathā / ఆదాయసత్తకకథా • Ādāyasattakakathā
టీకా • Tīkā / వినయపిటక (టీకా) • Vinayapiṭaka (ṭīkā) / వజిరబుద్ధి-టీకా • Vajirabuddhi-ṭīkā / ఆదాయసత్తకకథావణ్ణనా • Ādāyasattakakathāvaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / విమతివినోదనీ-టీకా • Vimativinodanī-ṭīkā / ఆదాయసత్తకకథావణ్ణనా • Ādāyasattakakathāvaṇṇanā
టీకా • Tīkā / వినయపిటక (టీకా) • Vinayapiṭaka (ṭīkā) / పాచిత్యాదియోజనాపాళి • Pācityādiyojanāpāḷi / ౧౮౮. ఆదాయసత్తకకథా • 188. Ādāyasattakakathā
