| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
5. பகிண்ணகனித்³தே³ஸவண்ணனா
5. Pakiṇṇakaniddesavaṇṇanā
53. இதா³னி பகிண்ணகங் த³ஸ்ஸேதுங் ‘‘ஸங்கி⁴க’’ந்த்யாதி³ ஆரத்³த⁴ங். தத்த² யோ பி⁴க்கு² இஸ்ஸரோ ஹுத்வா ஸங்கி⁴கங் க³ருப⁴ண்ட³ங் அஞ்ஞஸ்ஸ தே³தி, தஸ்ஸ து²ல்லச்சயங் ஸியா. தெ²ய்யாய அஞ்ஞஸ்ஸ தே³தி, யதா²வத்து² பாராஜிகாதி³ ஸியா, து³க்கடவத்து² து³க்கடங், து²ல்லச்சயவத்து² து²ல்லச்சயங், பாராஜிகவத்து² பாராஜிகங் ஸியாதி வுத்தங் ஹோதி.
53. Idāni pakiṇṇakaṃ dassetuṃ ‘‘saṅghika’’ntyādi āraddhaṃ. Tattha yo bhikkhu issaro hutvā saṅghikaṃ garubhaṇḍaṃ aññassa deti, tassa thullaccayaṃ siyā. Theyyāya aññassa deti, yathāvatthu pārājikādi siyā, dukkaṭavatthu dukkaṭaṃ, thullaccayavatthu thullaccayaṃ, pārājikavatthu pārājikaṃ siyāti vuttaṃ hoti.
54. குஸாதி³மயசீரானீதி எத்த² ஆதி³-ஸத்³தோ³ வாகப²லகங் ஸங்க³ண்ஹாதி, குஸமயசீரங் வாகமயசீரங் ப²லகமயசீரந்தி. தத்த² குஸே க³ந்தெ²த்வா கதசீரங் குஸமயசீரங். வாகமயசீரங் நாம தாபஸானங் வக்கலங். ப²லகமயசீரங் நாம ப²லகஸண்டா²னானி ப²லகானி ஸிப்³பெ³த்வா கதசீரங். கம்ப³லங் கேஸவாலஜந்தி கேஸஜங் கம்ப³லங் வாலஜங் கம்ப³லங், கேஸகம்ப³லங் வாலகம்ப³லந்தி அத்தோ². கேஸேஹி தந்தே வாயித்வா கதகம்ப³லங் கேஸகம்ப³லங். சமரிவாலேஹி வாயித்வா கதகம்ப³லங் வாலகம்ப³லங். ஸமயங் வினாதி நட்ட²சீவரகாலங் ட²பெத்வா. தா⁴ரயதோ தா⁴ரயந்தஸ்ஸ. லூகபக்கா²ஜினக்கி²பந்தி உலூகபக்கி²அஜினக்கி²பங். தத்த² உலூகபக்கீ²தி உலூகஸகுணபக்கே²ஹி கதனிவாஸனங். அஜினக்கி²பந்தி ஸலோமங் ஸகு²ரங் அஜினமிக³சம்மங். நட்ட²சீவரகாலங் ட²பெத்வா இமேஸு ஸத்தஸு வத்தூ²ஸு யங் கிஞ்சி தா⁴ரயதோ து²ல்லச்சயங் ஸியாதி அத்தோ².
54.Kusādimayacīrānīti ettha ādi-saddo vākaphalakaṃ saṅgaṇhāti, kusamayacīraṃ vākamayacīraṃ phalakamayacīranti. Tattha kuse ganthetvā katacīraṃ kusamayacīraṃ. Vākamayacīraṃ nāma tāpasānaṃ vakkalaṃ. Phalakamayacīraṃ nāma phalakasaṇṭhānāni phalakāni sibbetvā katacīraṃ. Kambalaṃ kesavālajanti kesajaṃ kambalaṃ vālajaṃ kambalaṃ, kesakambalaṃ vālakambalanti attho. Kesehi tante vāyitvā katakambalaṃ kesakambalaṃ. Camarivālehi vāyitvā katakambalaṃ vālakambalaṃ. Samayaṃ vināti naṭṭhacīvarakālaṃ ṭhapetvā. Dhārayato dhārayantassa. Lūkapakkhājinakkhipanti ulūkapakkhiajinakkhipaṃ. Tattha ulūkapakkhīti ulūkasakuṇapakkhehi katanivāsanaṃ. Ajinakkhipanti salomaṃ sakhuraṃ ajinamigacammaṃ. Naṭṭhacīvarakālaṃ ṭhapetvā imesu sattasu vatthūsu yaṃ kiñci dhārayato thullaccayaṃ siyāti attho.
55. ஸத்த²கேன கத்தப்³ப³ங் கம்மங் ஸத்த²கம்மங், தஸ்மிங் ஸத்த²கம்மே. வத்தி²ம்ஹி கத்தப்³ப³ங் கம்மங் வத்தி²கம்மங், தஸ்மிங் வத்தி²கம்மே. ஸங் நிமித்தந்தி அத்தனோ அங்க³ஜாதங். தங் சி²ந்த³தோ து²ல்லச்சயங் ஸியாதி ஸம்ப³ந்தோ⁴. மங்ஸாதி³போ⁴ஜனேதி எத்த² ஆதி³-ஸத்³தோ³ அட்டி²லோஹிதசம்மலோமானி ஸங்க³ண்ஹாதி. தஸ்மா மனுஸ்ஸானங் மங்ஸஅட்டி²லோஹிதசம்மலோமபோ⁴ஜனபச்சயா து²ல்லச்சயங் ஸியாதி அத்தோ².
55. Satthakena kattabbaṃ kammaṃ satthakammaṃ, tasmiṃ satthakamme. Vatthimhi kattabbaṃ kammaṃ vatthikammaṃ, tasmiṃ vatthikamme. Saṃ nimittanti attano aṅgajātaṃ. Taṃ chindato thullaccayaṃ siyāti sambandho. Maṃsādibhojaneti ettha ādi-saddo aṭṭhilohitacammalomāni saṅgaṇhāti. Tasmā manussānaṃ maṃsaaṭṭhilohitacammalomabhojanapaccayā thullaccayaṃ siyāti attho.
56. கத³லேரகக்கது³ஸ்ஸானீதி எத்த² கத³லிஏரகஅக்கவாகேஹி கதானி வத்தா²னி தா⁴ரயந்தஸ்ஸ து³க்கடங். பொத்த²கந்தி மகசிவாகேஹி கதங் பொத்த²கது³ஸ்ஸங். ஸப்³ப³பீதாதி³கந்தி எத்த² ஆதி³-ஸத்³தே³ன ஸப்³ப³லோஹிதகஸப்³ப³கண்ஹகஸப்³ப³மஞ்ஜெட்டி²கங் ஸங்க³ண்ஹாதி. தத்த² ஸப்³ப³மேவ நீலகங் ஸப்³ப³னீலகங். ஏவங் ஸேஸேஸுபி. நீலங் உம்மாரபுப்ப²வண்ணங். பீதங் கணிகாரபுப்ப²வண்ணங். லோஹிதங் ஜயஸுமனபுப்ப²வண்ணங். கண்ஹகங் அத்³தா³ரிட்ட²கவண்ணங். மஞ்ஜெட்டி²கங் லாகா²ரஸவண்ணங். இமேஸு அட்ட²ஸு வத்தூ²ஸு யங் கிஞ்சி தா⁴ரயந்தஸ்ஸ து³க்கடங் ஸியாதி அத்தோ².
56.Kadalerakakkadussānīti ettha kadalierakaakkavākehi katāni vatthāni dhārayantassa dukkaṭaṃ. Potthakanti makacivākehi kataṃ potthakadussaṃ. Sabbapītādikanti ettha ādi-saddena sabbalohitakasabbakaṇhakasabbamañjeṭṭhikaṃ saṅgaṇhāti. Tattha sabbameva nīlakaṃ sabbanīlakaṃ. Evaṃ sesesupi. Nīlaṃ ummārapupphavaṇṇaṃ. Pītaṃ kaṇikārapupphavaṇṇaṃ. Lohitaṃ jayasumanapupphavaṇṇaṃ. Kaṇhakaṃ addāriṭṭhakavaṇṇaṃ. Mañjeṭṭhikaṃ lākhārasavaṇṇaṃ. Imesu aṭṭhasu vatthūsu yaṃ kiñci dhārayantassa dukkaṭaṃ siyāti attho.
57-8. ஹத்தி²ஸ்ஸுரக³ஸோணானந்தி ஹத்தி²அஸ்ஸஉரக³ஸோணானங் மங்ஸங் அட்டி²ருதி⁴ரசம்மலோமானி. ஸீஹப்³யக்³க⁴ச்ச²தீ³பினந்தி ஸீஹப்³யக்³க⁴அச்ச²தீ³பீனங் மங்ஸாதீ³னி. தரச்ச²ஸ்ஸ ச மங்ஸாதி³ங் உத்³தி³ஸ்ஸகதமங்ஸஞ்ச அனாபுச்சி²தமங்ஸஞ்ச பு⁴ஞ்ஜதோ து³க்கடங் ஸியா. த³கதித்தா²தி³கந்தி எத்த² ஆதி³-ஸத்³தோ³ வச்சபஸ்ஸாவகுடியோ ஸங்க³ண்ஹாதி. தேன யாதானுபுப்³ப³ங் ஆக³தப்படிபாடிங் ஹித்வான வஜ்ஜெத்வா நஹானதித்த²ஞ்ச வச்சகுடிஞ்ச பஸ்ஸாவகுடிஞ்ச வஜே வஜெய்ய க³ச்செ²ய்ய, து³க்கடங் தஸ்ஸ ஸியாதி அத்தோ².
57-8.Hatthissuragasoṇānanti hatthiassauragasoṇānaṃ maṃsaṃ aṭṭhirudhiracammalomāni. Sīhabyagghacchadīpinanti sīhabyagghaacchadīpīnaṃ maṃsādīni. Taracchassa ca maṃsādiṃ uddissakatamaṃsañca anāpucchitamaṃsañca bhuñjato dukkaṭaṃ siyā. Dakatitthādikanti ettha ādi-saddo vaccapassāvakuṭiyo saṅgaṇhāti. Tena yātānupubbaṃ āgatappaṭipāṭiṃ hitvāna vajjetvā nahānatitthañca vaccakuṭiñca passāvakuṭiñca vaje vajeyya gaccheyya, dukkaṭaṃ tassa siyāti attho.
59. ஸஹஸாதி வேக³ஸா வேகே³ன. வுப்³ப⁴ஜித்வானாதி அந்தரவாஸகங் தூ³ரதோவ உக்கி²பித்வா, வ-காரோ ஸந்தி⁴வஸேனாக³தோ. பவிஸேதி பவிஸெய்ய. வச்சபஸ்ஸாவகுடிகந்தி வச்சகுடிகங் பஸ்ஸாவகுடிகங். விஸேதி பவிஸெய்ய. யோ பி⁴க்கு² வச்சபஸ்ஸாவகுடிகங் ஸஹஸா பவிஸெய்ய வா நிக்க²மெய்ய வா, உப்³ப⁴ஜித்வா வா பவிஸெய்ய வா நிக்க²மெய்ய வா, உக்காஸிகங் வஜ்ஜெத்வா தங் பவிஸெய்ய, தஸ்ஸ து³க்கடங் ஸியாதி யோஜனா.
59.Sahasāti vegasā vegena. Vubbhajitvānāti antaravāsakaṃ dūratova ukkhipitvā, va-kāro sandhivasenāgato. Paviseti paviseyya. Vaccapassāvakuṭikanti vaccakuṭikaṃ passāvakuṭikaṃ. Viseti paviseyya. Yo bhikkhu vaccapassāvakuṭikaṃ sahasā paviseyya vā nikkhameyya vā, ubbhajitvā vā paviseyya vā nikkhameyya vā, ukkāsikaṃ vajjetvā taṃ paviseyya, tassa dukkaṭaṃ siyāti yojanā.
60. நித்து²னந்தோ வச்சங் கரெய்ய த³ந்தகட்ட²ஞ்ச கா²த³ந்தோ, தஸ்ஸ து³க்கடங் ஸியாதி அத்தோ². வச்சபஸ்ஸாவதோ³ணீனங் ப³ஹி வச்சாதி³கங் வச்சபஸ்ஸாவங் கரெய்ய, தஸ்ஸ து³க்கடங் ஸியா.
60. Nitthunanto vaccaṃ kareyya dantakaṭṭhañca khādanto, tassa dukkaṭaṃ siyāti attho. Vaccapassāvadoṇīnaṃ bahi vaccādikaṃ vaccapassāvaṃ kareyya, tassa dukkaṭaṃ siyā.
61. க²ரேன சாவலேகெ²ய்யாதி பா²லிதகட்டே²ன வா ப²ருஸேன வா க³ண்டி²கேன வா பூதிகட்டே²ன வா ஸுஸிரேன வா அவலேகெ²ய்யாதி அத்தோ². கட்ட²ந்தி அவலேக²னகட்ட²ங். கூபகேதி வச்சகூபகே. ஊஹதஞ்சாதி கூ³த²மக்கி²தஞ்ச. ந தோ⁴வெய்யாதி அத்தனா வா ந தோ⁴வெய்ய பரேன வா ந தோ⁴வாபெய்ய. உக்லாபஞ்சாதி கசவரஞ்ச. ந ஸோத⁴யேந ஸம்மஜ்ஜெய்ய.
61.Kharenacāvalekheyyāti phālitakaṭṭhena vā pharusena vā gaṇṭhikena vā pūtikaṭṭhena vā susirena vā avalekheyyāti attho. Kaṭṭhanti avalekhanakaṭṭhaṃ. Kūpaketi vaccakūpake. Ūhatañcāti gūthamakkhitañca. Na dhoveyyāti attanā vā na dhoveyya parena vā na dhovāpeyya. Uklāpañcāti kacavarañca. Na sodhayena sammajjeyya.
62. சபுசபூதி ஸத்³த³ங் கத்வா உத³ககிச்சங் கரொந்தஸ்ஸ ஆசமந்தஸ்ஸ து³க்கடங் ஸியாதி அத்தோ². அனஜ்ஜி²ட்டோ²வாதி அனாணத்தோயேவ. தே²ரேனாதி ஸங்க⁴த்தே²ரேன. பாதிமொக்க²ந்தி பாதிமொக்கு²த்³தே³ஸங். உத்³தி³ஸே உத்³தி³ஸெய்ய, து³க்கடங் ஸியா.
62.Capucapūti saddaṃ katvā udakakiccaṃ karontassa ācamantassa dukkaṭaṃ siyāti attho. Anajjhiṭṭhovāti anāṇattoyeva. Therenāti saṅghattherena. Pātimokkhanti pātimokkhuddesaṃ. Uddise uddiseyya, dukkaṭaṃ siyā.
63. அனாபுச்சா²ய பஞ்ஹஸ்ஸ கத²னே, அனாபுச்சா²ய பஞ்ஹஸ்ஸ விஸ்ஸஜ்ஜனே, அனாபுச்சா²ய ஸஜ்ஜா²யகரணே, அனாபுச்சா²ய பதீ³பஜாலனே, அனாபுச்சா²ய பதீ³பவிஜ்ஜா²பனேதி இமேஸு சதூஸு பச்சயேஸு தஸ்ஸ து³க்கடங் ஸியா.
63. Anāpucchāya pañhassa kathane, anāpucchāya pañhassa vissajjane, anāpucchāya sajjhāyakaraṇe, anāpucchāya padīpajālane, anāpucchāya padīpavijjhāpaneti imesu catūsu paccayesu tassa dukkaṭaṃ siyā.
64. அனாபுச்சா² வாதபானகவாடானி விவரெய்ய வா த²கெய்ய வா, தஸ்ஸ து³க்கடங் ஸியாதி ஸம்ப³ந்தோ⁴. வந்த³னாதி³ந்தி எத்த² ஆதி³-ஸத்³தோ³ வந்தா³பனங் ஸங்க³ண்ஹாதி. யோ பி⁴க்கு² நக்³கோ³ வந்த³னங் கரெய்ய, வந்தா³பனங் கரெய்ய, க³மனங் கரெய்ய, போ⁴ஜனங் கரெய்ய, பிவனங் கரெய்ய, கா²த³னங் கரெய்ய, க³ஹணங் கரெய்ய, தா³னங் கரெய்ய, தஸ்ஸ ஸப்³ப³த்த² து³க்கடந்தி ஸம்ப³ந்தோ⁴.
64. Anāpucchā vātapānakavāṭāni vivareyya vā thakeyya vā, tassa dukkaṭaṃ siyāti sambandho. Vandanādinti ettha ādi-saddo vandāpanaṃ saṅgaṇhāti. Yo bhikkhu naggo vandanaṃ kareyya, vandāpanaṃ kareyya, gamanaṃ kareyya, bhojanaṃ kareyya, pivanaṃ kareyya, khādanaṃ kareyya, gahaṇaṃ kareyya, dānaṃ kareyya, tassa sabbattha dukkaṭanti sambandho.
65. திபடிச்ச²ன்னகங் வினாதி ‘‘அனுஜானாமி, பி⁴க்க²வே, திஸ்ஸோ படிச்சா²தி³யோ ஜந்தாக⁴ரப்படிச்சா²தி³ங் உத³கப்படிச்சா²தி³ங் வத்த²ப்படிச்சா²தி³’’ந்தி (சூளவ॰ 261) ஏவங் வுத்தா திஸ்ஸோ படிச்சா²தி³யோ ஸமாஹடாதி ‘‘திபடிச்சா²தீ³’’தி வுத்தங். திபடிச்ச²ன்னகங் ட²பெத்வா பரிகம்மங் ஸயங் கரெய்ய, பரங் காராபெய்ய, தஸ்ஸ து³க்கடங் ஸியாதி அத்தோ² . யோ பி⁴க்கு² நஹாயங் நஹாயந்தோ குட்டே வா த²ம்பே⁴ வா தரும்ஹி வா காயங் உபக⁴ங்ஸெய்ய, தஸ்ஸ து³க்கடங் ஸியா.
65.Tipaṭicchannakaṃ vināti ‘‘anujānāmi, bhikkhave, tisso paṭicchādiyo jantāgharappaṭicchādiṃ udakappaṭicchādiṃ vatthappaṭicchādi’’nti (cūḷava. 261) evaṃ vuttā tisso paṭicchādiyo samāhaṭāti ‘‘tipaṭicchādī’’ti vuttaṃ. Tipaṭicchannakaṃ ṭhapetvā parikammaṃ sayaṃ kareyya, paraṃ kārāpeyya, tassa dukkaṭaṃ siyāti attho . Yo bhikkhu nahāyaṃ nahāyanto kuṭṭe vā thambhe vā tarumhi vā kāyaṃ upaghaṃseyya, tassa dukkaṭaṃ siyā.
66. யோ பி⁴க்கு² நஹாயந்தோ குருவிந்த³கஸுத்தேன காயங் க⁴ங்ஸெய்ய, காயதோ காயேன அஞ்ஞமஞ்ஞங் க⁴ங்ஸெய்ய, தஸ்ஸ து³க்கடங் ஸியாதி ஸம்ப³ந்தோ⁴. யோ அகி³லானோ ஸஉபாஹனோ ப³ஹாராமே ப³ஹிஆராமே சரெய்ய, தஸ்ஸ து³க்கடங் ஸியாதி ஸம்ப³ந்தோ⁴.
66. Yo bhikkhu nahāyanto kuruvindakasuttena kāyaṃ ghaṃseyya, kāyato kāyena aññamaññaṃ ghaṃseyya, tassa dukkaṭaṃ siyāti sambandho. Yo agilāno saupāhano bahārāme bahiārāme careyya, tassa dukkaṭaṃ siyāti sambandho.
67. ஸப்³ப³னீலாதி³கம்பி சாதி எத்த² ஆதி³-ஸத்³தோ³ லோஹிதோதா³தபீதகண்ஹமஞ்ஜெட்ட²மஹாரங்க³மஹானாமரங்க³ரத்தாத³யோ உபாஹனாயோ ஸங்க³ண்ஹாதி. யோ பி⁴க்கு² ஸப்³ப³னீலஸப்³ப³லோஹிதாதி³கங் உபாஹனங் தா⁴ரேதி, தஸ்ஸ து³க்கடங் ஸியாதி ஸம்ப³ந்தோ⁴. யோ பி⁴க்கு² ரத்தோ ரத்தசித்தோ தத³ஹுஜாதாயபி இத்தி²யா நிமித்தங் பஸ்ஸெய்ய, தஸ்ஸ து³க்கடங் ஸியா. யோ பி⁴க்கு² பி⁴க்க²தா³யியா பி⁴க்க²தா³யிகாய இத்தி²யா முக²ங் பஸ்ஸெய்ய, தஸ்ஸ து³க்கடங் ஸியா.
67.Sabbanīlādikampi cāti ettha ādi-saddo lohitodātapītakaṇhamañjeṭṭhamahāraṅgamahānāmaraṅgarattādayo upāhanāyo saṅgaṇhāti. Yo bhikkhu sabbanīlasabbalohitādikaṃ upāhanaṃ dhāreti, tassa dukkaṭaṃ siyāti sambandho. Yo bhikkhu ratto rattacitto tadahujātāyapi itthiyā nimittaṃ passeyya, tassa dukkaṭaṃ siyā. Yo bhikkhu bhikkhadāyiyā bhikkhadāyikāya itthiyā mukhaṃ passeyya, tassa dukkaṭaṃ siyā.
68-9. யோ பி⁴க்கு² உஜ்ஜா²னஸஞ்ஞீ ஹுத்வா அஞ்ஞஸ்ஸ பி⁴க்கு²னோ பத்தங் வா பஸ்ஸெய்ய, தஸ்ஸ து³க்கடங் ஸியா. ஆதா³ஸாதி³ம்ஹி உத³கபத்தே அத்தனோ முக²ங் பஸ்ஸெய்ய, தஸ்ஸ து³க்கடங் ஸியா. உச்சாஸனமஹாஸனே நிஸஜ்ஜாதி³ங் நிஸீத³னஸயனாதி³ங் கரொந்தஸ்ஸ பி⁴க்கு²னோ து³க்கடங் ஸியா. உக்கி²த்தானுபஸம்பன்னநானாஸங்வாஸகாதீ³னங் வந்த³னேபி து³க்கடங் ஸியாதி ஸம்ப³ந்தோ⁴. தத்த² உக்கி²த்தோதி ஆபத்தியா அத³ஸ்ஸனே உக்கி²த்தகோ, ஆபத்தியா அப்படிகம்மே உக்கி²த்தகோ, பாபிகாய தி³ட்டி²யா அப்படினிஸ்ஸக்³கே³ உக்கி²த்தகோதி திவிதோ⁴பி இதா⁴தி⁴ப்பேதோ. அனுபஸம்பன்னோதி இமினா பி⁴க்கு²னிஸாமணேரஸாமணேரிஸிக்க²மானபண்ட³கஇத்தி²ஸிக்கா²பச்சக்கா²தகா க³ஹிதா. நானாஸங்வாஸகாதி லத்³தி⁴னானாஸங்வாஸகா க³ஹிதா. ஆதி³-ஸத்³தே³ன சி²ன்னமூலகா க³ஹிதா.
68-9. Yo bhikkhu ujjhānasaññī hutvā aññassa bhikkhuno pattaṃ vā passeyya, tassa dukkaṭaṃ siyā. Ādāsādimhi udakapatte attano mukhaṃ passeyya, tassa dukkaṭaṃ siyā. Uccāsanamahāsane nisajjādiṃ nisīdanasayanādiṃ karontassa bhikkhuno dukkaṭaṃ siyā. Ukkhittānupasampannanānāsaṃvāsakādīnaṃ vandanepi dukkaṭaṃ siyāti sambandho. Tattha ukkhittoti āpattiyā adassane ukkhittako, āpattiyā appaṭikamme ukkhittako, pāpikāya diṭṭhiyā appaṭinissagge ukkhittakoti tividhopi idhādhippeto. Anupasampannoti iminā bhikkhunisāmaṇerasāmaṇerisikkhamānapaṇḍakaitthisikkhāpaccakkhātakā gahitā. Nānāsaṃvāsakāti laddhinānāsaṃvāsakā gahitā. Ādi-saddena chinnamūlakā gahitā.
70-71. யோ தீ³கா⁴ஸனே பண்ட³கித்தீ²ஹி பண்ட³கேன வா இத்தி²யா வா உப⁴தொப்³யஞ்ஜனேன வா ஏகதோ நிஸீதெ³ய்ய, தஸ்ஸ து³க்கடங் ஸியா. அதீ³கே⁴ ஆஸனேதி ரஸ்ஸே ஆஸனே. யோ பி⁴க்கு² ரஸ்ஸாஸனே மஞ்சே வா பீடே² வா அஸமானாஸனிகேன ஏகதோ ஸயெய்ய, தஸ்ஸ து³க்கடங் ஸியாதி அத்தோ². ப²லபுப்பா²தி³கந்தி எத்த² ஆதி³-ஸத்³தே³ன வேளுசுண்ணத³ந்தகட்ட²மத்திகாத³யோ ஸங்க³ஹிதா. குலஸங்க³ஹத்தா²ய ப²லபுப்பா²தி³கங் த³த³தோ து³க்கடங் ஸியாதி ஸம்ப³ந்தோ⁴.
70-71. Yo dīghāsane paṇḍakitthīhi paṇḍakena vā itthiyā vā ubhatobyañjanena vā ekato nisīdeyya, tassa dukkaṭaṃ siyā. Adīghe āsaneti rasse āsane. Yo bhikkhu rassāsane mañce vā pīṭhe vā asamānāsanikena ekato sayeyya, tassa dukkaṭaṃ siyāti attho. Phalapupphādikanti ettha ādi-saddena veḷucuṇṇadantakaṭṭhamattikādayo saṅgahitā. Kulasaṅgahatthāya phalapupphādikaṃ dadato dukkaṭaṃ siyāti sambandho.
72-3. யோ பி⁴க்கு² க³ந்தி²மாதி³ங் ஸயங் கரெய்ய, பரங் காராபெய்ய, தஸ்ஸ து³க்கடங் ஸியா. யோ பி⁴க்கு² ஜினேன வாரிதபச்சயே பரிபு⁴ஞ்ஜெய்ய, தஸ்ஸ து³க்கடங் ஸியா. அப்³யத்தோ பா³லோ யோ பி⁴க்கு² ஆசரியுபஜ்ஜா²யே அனிஸ்ஸாய நிஸ்ஸயங் அக்³க³ஹெத்வா வஸெய்ய, தஸ்ஸ து³க்கடங் ஸியா. யோ பி⁴க்கு² அனுஞ்ஞாதேஹி மாதாபிதுஆதீ³ஹி புக்³க³லேஹி அஞ்ஞஸ்ஸ புக்³க³லஸ்ஸ பே⁴ஸஜ்ஜங் கரெய்ய வா வதெ³ய்ய வா, தஸ்ஸ து³க்கடங் ஸியா. ஸாபத்திகோ யோ பி⁴க்கு² உபோஸத²ப்பவாரணங் கரெய்ய, தஸ்ஸ து³க்கடங் ஸியாதி ஸம்ப³ந்தோ⁴. தத்த² ஜினேன ப⁴க³வதா வாரிதா ஜினவாரிதா, ஜினவாரிதா ச தே பச்சயா சேதி ஜினவாரிதபச்சயா, தே ஜினவாரிதபச்சயே. த்³வேமாதிகாஅப்பகு³ணதாய அப்³யத்தோ.
72-3. Yo bhikkhu ganthimādiṃ sayaṃ kareyya, paraṃ kārāpeyya, tassa dukkaṭaṃ siyā. Yo bhikkhu jinena vāritapaccaye paribhuñjeyya, tassa dukkaṭaṃ siyā. Abyatto bālo yo bhikkhu ācariyupajjhāye anissāya nissayaṃ aggahetvā vaseyya, tassa dukkaṭaṃ siyā. Yo bhikkhu anuññātehi mātāpituādīhi puggalehi aññassa puggalassa bhesajjaṃ kareyya vā vadeyya vā, tassa dukkaṭaṃ siyā. Sāpattiko yo bhikkhu uposathappavāraṇaṃ kareyya, tassa dukkaṭaṃ siyāti sambandho. Tattha jinena bhagavatā vāritā jinavāritā, jinavāritā ca te paccayā ceti jinavāritapaccayā, te jinavāritapaccaye. Dvemātikāappaguṇatāya abyatto.
74. யோ பி⁴க்கு² ஆபோ⁴க³ங் வா நியோக³ங் வா வஜ்ஜெத்வா த்³வாரப³ந்தா⁴தி³கே டா²னே பரிவத்தகவாடகங் அபிதா⁴ய தி³வா ஸயெய்ய, தஸ்ஸ து³க்கடங் ஸியாதி ஸம்ப³ந்தோ⁴. த்³வாரப³ந்தா⁴தி³கேதி யேன கேனசி பரிக்கி²த்தே அப்³போ⁴காஸேபி ருக்க²மூலேபி அந்தமஸோ இமினா லக்க²ணேன யுத்தஆகாஸங்க³ணேபி. அபிதா⁴யாதி அபித³ஹித்வா. வினாபோ⁴க³ந்தி ‘‘ஏஸ த்³வாரங் ஜக்³கி³ஸ்ஸதீ’’தி ஆபோ⁴க³ங் ட²பெத்வாதி அத்தோ². நியோக³ந்தி அவஸட்டா²னங், அத்தனோ அவஸங் ப³ஹுஸாதா⁴ரணட்டா²னங் ட²பெத்வா. ‘‘ஸவஸோ’’தி வா பாடோ², ஸவஸோ ஹுத்வாதி அத்தோ². தி³வாதி தி³வாகாலே.
74. Yo bhikkhu ābhogaṃ vā niyogaṃ vā vajjetvā dvārabandhādike ṭhāne parivattakavāṭakaṃ apidhāya divā sayeyya, tassa dukkaṭaṃ siyāti sambandho. Dvārabandhādiketi yena kenaci parikkhitte abbhokāsepi rukkhamūlepi antamaso iminā lakkhaṇena yuttaākāsaṅgaṇepi. Apidhāyāti apidahitvā. Vinābhoganti ‘‘esa dvāraṃ jaggissatī’’ti ābhogaṃ ṭhapetvāti attho. Niyoganti avasaṭṭhānaṃ, attano avasaṃ bahusādhāraṇaṭṭhānaṃ ṭhapetvā. ‘‘Savaso’’ti vā pāṭho, savaso hutvāti attho. Divāti divākāle.
75. த⁴ஞ்ஞந்தி ஸாலி வீஹி யவோ கோ³து⁴மோ கங்கு³ வரகோ குத்³ரூஸகோதி ஸத்தவித⁴ங் த⁴ஞ்ஞங். இத்தி²ரூபந்தி தா³ருலோஹமயாதி³இத்தி²ரூபங். ரதனந்தி முத்தாதி³த³ஸவித⁴ங் ரதனங். ஆவுத⁴ந்தி ஸத்திதோமராதி³ஸப்³பா³வுத⁴ப⁴ண்ட³ங். இத்தி²பஸாத⁴னந்தி இத்தி²யா ஸீஸாதி³அலங்காரங். தூரியப⁴ண்ட³ந்தி த⁴மனஸங்கா²தி³ஸப்³ப³ங் தூரியப⁴ண்ட³ங். ப²லருக்கே²தி ப²லிதருக்கே². புப்³ப³ண்ணாதி³கந்தி முக்³க³மாஸாதி³கங். ஆதி³-ஸத்³தே³ன வாகுரகுமினாத³யோ க³ஹிதா. ஏதேஸு யங் கிஞ்சி ஆமஸெய்ய, தஸ்ஸ து³க்கடங் ஸியாதி அத்தோ².
75.Dhaññanti sāli vīhi yavo godhumo kaṅgu varako kudrūsakoti sattavidhaṃ dhaññaṃ. Itthirūpanti dārulohamayādiitthirūpaṃ. Ratananti muttādidasavidhaṃ ratanaṃ. Āvudhanti sattitomarādisabbāvudhabhaṇḍaṃ. Itthipasādhananti itthiyā sīsādialaṅkāraṃ. Tūriyabhaṇḍanti dhamanasaṅkhādisabbaṃ tūriyabhaṇḍaṃ. Phalarukkheti phalitarukkhe. Pubbaṇṇādikanti muggamāsādikaṃ. Ādi-saddena vākurakuminādayo gahitā. Etesu yaṃ kiñci āmaseyya, tassa dukkaṭaṃ siyāti attho.
76. ஸஸித்தோ²த³கதேலேஹீதி யோ பன மது⁴ஸித்த²கதேலேன வா உத³கமிஸ்ஸகதேலேன வா யேன கேனசி சிக்க²ல்லேன வா. ப²ணஹத்த²ப²ணேஹி வாதி த³ந்தமயாதி³ப²ணேன வா ப²ணகிச்சஸாத⁴கேஹி ஹத்த²ங்கு³லீஹி வா கொச்சே²ன வா கேஸமோஸண்ட²னே து³க்கடங் ஸியாதி அத்தோ². ஏகஸ்மிங் பா⁴ஜனே போ⁴ஜனநிமித்தே து³க்கடங் ஸியாதி அத்தோ².
76.Sasitthodakatelehīti yo pana madhusitthakatelena vā udakamissakatelena vā yena kenaci cikkhallena vā. Phaṇahatthaphaṇehi vāti dantamayādiphaṇena vā phaṇakiccasādhakehi hatthaṅgulīhi vā kocchena vā kesamosaṇṭhane dukkaṭaṃ siyāti attho. Ekasmiṃ bhājane bhojananimitte dukkaṭaṃ siyāti attho.
77. த்³வே பி⁴க்கூ² ஏகத்த²ரணா ஸயெய்யூங், த்³வே பி⁴க்கூ² ஏகபாவுரணா ஸயெய்யுங், த்³வே பி⁴க்கூ² ஏகமஞ்சகே ஸயெய்யுங், தேஸங் து³க்கடானி ஹொந்தீதி ஸம்ப³ந்தோ⁴. பமாணதோ அதி⁴கங் வா ஊனங் வா த³ந்தகட்ட²ங் கா²தெ³ய்ய, தஸ்ஸ து³க்கடங் ஸியாதி யோஜனா. தத்த² அதி⁴கந்தி அட்ட²ங்கு³லதோ அதி⁴கங். ஊனந்தி சதுரங்கு³லதோ ஊனங்.
77. Dve bhikkhū ekattharaṇā sayeyyūṃ, dve bhikkhū ekapāvuraṇā sayeyyuṃ, dve bhikkhū ekamañcake sayeyyuṃ, tesaṃ dukkaṭāni hontīti sambandho. Pamāṇato adhikaṃ vā ūnaṃ vā dantakaṭṭhaṃ khādeyya, tassa dukkaṭaṃ siyāti yojanā. Tattha adhikanti aṭṭhaṅgulato adhikaṃ. Ūnanti caturaṅgulato ūnaṃ.
78. யோ பி⁴க்கு² நச்சஞ்ச கீ³தஞ்ச வாதி³தஞ்ச யோஜேதி வா யோஜாபேதி வா, தஸ்ஸ து³க்கடங் ஸியா. தேஸங் நச்சானங் த³ஸ்ஸனங், தேஸங் கீ³தானங் ஸவனங், தேஸங் வாதி³தானங் ஸவனஞ்ச கரொந்தஸ்ஸ து³க்கடங் ஸியாதி அத்தோ².
78. Yo bhikkhu naccañca gītañca vāditañca yojeti vā yojāpeti vā, tassa dukkaṭaṃ siyā. Tesaṃ naccānaṃ dassanaṃ, tesaṃ gītānaṃ savanaṃ, tesaṃ vāditānaṃ savanañca karontassa dukkaṭaṃ siyāti attho.
79. வீஹாதி³ரோபிமேதி வீஹிஆதீ³னங் ருஹனட்டா²னே. ப³ஹிபாகாரகுட்டகேதி பாகாரகுட்டானங் ப³ஹி. வச்சாதி³ச²ட்³ட³னாதி³ம்ஹீதி வச்சபஸ்ஸாவஸங்காரசலகாதீ³னங் ச²ட்³ட³னவிஸ்ஸஜ்ஜனபச்சயா து³க்கடங் ஸியாதி அத்தோ². தீ³க⁴கேஸாதி³தா⁴ரணேதி தீ³க⁴கேஸதா⁴ரணே தீ³க⁴னக²தா⁴ரணே து³க்கடங் ஸியாதி அத்தோ².
79.Vīhādiropimeti vīhiādīnaṃ ruhanaṭṭhāne. Bahipākārakuṭṭaketi pākārakuṭṭānaṃ bahi. Vaccādichaḍḍanādimhīti vaccapassāvasaṅkāracalakādīnaṃ chaḍḍanavissajjanapaccayā dukkaṭaṃ siyāti attho. Dīghakesādidhāraṇeti dīghakesadhāraṇe dīghanakhadhāraṇe dukkaṭaṃ siyāti attho.
80. நக²மட்ட²கரணாதி³ம்ஹீதி எத்த² ஆதி³-ஸத்³தே³ன ரஜனகரணங் க³ஹிதங். ஸம்பா³தே⁴ லோமஹாரணேதி ஸம்பா³தே⁴ உபகச்ச²கமுத்தகரணட்டா²னே லோமுத்³த⁴ரணே. ஸஉபாஹனோ பி⁴க்கு² பரிகம்மகதங் பூ⁴மிங் அக்கமெய்யாதி ஸம்ப³ந்தோ⁴.
80.Nakhamaṭṭhakaraṇādimhīti ettha ādi-saddena rajanakaraṇaṃ gahitaṃ. Sambādhe lomahāraṇeti sambādhe upakacchakamuttakaraṇaṭṭhāne lomuddharaṇe. Saupāhano bhikkhu parikammakataṃ bhūmiṃ akkameyyāti sambandho.
81. அதோ⁴தஅல்லபாதே³ஹீதி யோ பி⁴க்கு² அதோ⁴தபாதே³ஹி வா அல்லபாதே³ஹி வா ஸங்கி⁴கங் மஞ்சங் வா பீட²ங் வா அக்கமெய்ய, பரிகம்மகதங் பி⁴த்திங் வா காயதோ ஆமஸந்தஸ்ஸ து³க்கடங் ஸியாதி அத்தோ².
81.Adhotaallapādehīti yo bhikkhu adhotapādehi vā allapādehi vā saṅghikaṃ mañcaṃ vā pīṭhaṃ vā akkameyya, parikammakataṃ bhittiṃ vā kāyato āmasantassa dukkaṭaṃ siyāti attho.
82-3. ஸங்கா⁴டியாபி பல்லத்தே²தி அதி⁴ட்டி²தசீவரேன விஹாரே வா அந்தரக⁴ரே வா பல்லத்தி²கங் கரெய்ய, தஸ்ஸ து³க்கடங். து³ப்பரிபு⁴ஞ்ஜெய்ய சீவரந்தி திண்ணங் சீவரானங் அஞ்ஞதரங் சீவரங் து³ப்பரிபோ⁴கே³ன பரிபு⁴ஞ்ஜெய்ய. அகாயப³ந்த⁴னோதி காயப³ந்த⁴னவிரஹிதோ பி⁴க்கு² கா³மங் வஜெய்ய க³ச்செ²ய்ய. யோ பி⁴க்கு² வச்சகங் உச்சாரங் கத்வான உத³கே ஸந்தே நாசமெய்ய உத³கஸுத்³தி⁴ங் ந கரெய்ய, தஸ்ஸ து³க்கடங் ஸியாதி அத்தோ². ஸமாதெ³ய்ய அகப்பியேதி பி⁴க்கு²ங் வா ஸாமணேராதி³கே ஸேஸஸஹத⁴ம்மிகே வா அகப்பியே நியோஜெய்ய, தஸ்ஸ து³க்கடங் ஸியாதி அத்தோ². ஸபா⁴கா³பத்தியா தே³ஸனாரோசனபச்சயா து³க்கடங் ஸியாதி அத்தோ². ஸபா⁴கா³தி எத்த² வத்து²ஸபா⁴க³தாவ இதா⁴தி⁴ப்பேதா, ந ஆபத்திஸபா⁴க³தா.
82-3.Saṅghāṭiyāpipallattheti adhiṭṭhitacīvarena vihāre vā antaraghare vā pallatthikaṃ kareyya, tassa dukkaṭaṃ. Dupparibhuñjeyya cīvaranti tiṇṇaṃ cīvarānaṃ aññataraṃ cīvaraṃ dupparibhogena paribhuñjeyya. Akāyabandhanoti kāyabandhanavirahito bhikkhu gāmaṃ vajeyya gaccheyya. Yo bhikkhu vaccakaṃ uccāraṃ katvāna udake sante nācameyya udakasuddhiṃ na kareyya, tassa dukkaṭaṃ siyāti attho. Samādeyya akappiyeti bhikkhuṃ vā sāmaṇerādike sesasahadhammike vā akappiye niyojeyya, tassa dukkaṭaṃ siyāti attho. Sabhāgāpattiyā desanārocanapaccayā dukkaṭaṃ siyāti attho. Sabhāgāti ettha vatthusabhāgatāva idhādhippetā, na āpattisabhāgatā.
84. ந வஸே வஸ்ஸந்தி யோ பி⁴க்கு² வஸ்ஸங் ந வஸெய்ய ந உபக³ச்செ²ய்ய, தஸ்ஸ து³க்கடங் ஸியா. விஸங்வாதே³ ஸுத்³த⁴சித்தேதி எத்த² ஸம்பதா³னத்தே² பு⁴ம்மவசனங், படிஸ்ஸவங் விஸங்வாதெ³ந்தஸ்ஸ ஸுத்³த⁴சித்தஸ்ஸ து³க்கடங் ஸியாதி அத்தோ². வஸ்ஸங் வஸித்வா அனநுஞ்ஞாதகிச்சதோ அனநுஞ்ஞாதகிச்சேன பி⁴க்கு²னோ க³மனே து³க்கடங் ஸியாதி யோஜனா.
84.Na vase vassanti yo bhikkhu vassaṃ na vaseyya na upagaccheyya, tassa dukkaṭaṃ siyā. Visaṃvāde suddhacitteti ettha sampadānatthe bhummavacanaṃ, paṭissavaṃ visaṃvādentassa suddhacittassa dukkaṭaṃ siyāti attho. Vassaṃ vasitvā ananuññātakiccato ananuññātakiccena bhikkhuno gamane dukkaṭaṃ siyāti yojanā.
85. ஆபத³ங் வஜ்ஜெத்வா தருஸ்ஸ உத்³த⁴ங் போரிஸம்ஹா அபி⁴ருஹணே து³க்கடங் ஸியாதி ஸம்ப³ந்தோ⁴. ஆபத³ந்தி அந்தராயங். தருஸ்ஸாதி ருக்க²ஸ்ஸ. போரிஸம்ஹாதி ஏகபோரிஸப்பமாணா மஜ்ஜி²மஸ்ஸ புரிஸஸ்ஸ பஞ்சஹத்தா². அபரிஸ்ஸாவனோ யோ பி⁴க்கு² அத்³தா⁴னங் க³ச்செ²ய்ய, யோ ச பி⁴க்கு² தங் பரிஸ்ஸாவனங் யாசதோ ந த³தெ³ய்ய, தஸ்ஸ து³க்கடங் ஸியாதி யோஜனா. அத்³தா⁴னந்தி அத்³த⁴யோஜனமேவ அந்திமமத்³தா⁴னங்.
85. Āpadaṃ vajjetvā tarussa uddhaṃ porisamhā abhiruhaṇe dukkaṭaṃ siyāti sambandho. Āpadanti antarāyaṃ. Tarussāti rukkhassa. Porisamhāti ekaporisappamāṇā majjhimassa purisassa pañcahatthā. Aparissāvano yo bhikkhu addhānaṃ gaccheyya, yo ca bhikkhu taṃ parissāvanaṃ yācato na dadeyya, tassa dukkaṭaṃ siyāti yojanā. Addhānanti addhayojanameva antimamaddhānaṃ.
86. அத்தனோ கா⁴தனே து³க்கடங் ஸியாதி ஸம்ப³ந்தோ⁴. யோ பி⁴க்கு² இத்தி²ரூபாதி³ரூபங் கரெய்ய வா காராபெய்ய வா, தஸ்ஸ து³க்கடங் ஸியா. மாலாதி³கங் விசித்தங் ட²பெத்வா ஜாதகாதி³வத்து²ங் ஸயங் கரெய்ய, து³க்கடங் ஸியாதி ஸம்ப³ந்தோ⁴.
86. Attano ghātane dukkaṭaṃ siyāti sambandho. Yo bhikkhu itthirūpādirūpaṃ kareyya vā kārāpeyya vā, tassa dukkaṭaṃ siyā. Mālādikaṃ vicittaṃ ṭhapetvā jātakādivatthuṃ sayaṃ kareyya, dukkaṭaṃ siyāti sambandho.
87. பு⁴ஞ்ஜந்தமுட்ட²பேதி யோ பி⁴க்கு² பு⁴ஞ்ஜந்தங் உட்டா²பெய்ய, தஸ்ஸ து³க்கடங் ஸியா. ப⁴த்தஸாலாதீ³ஸு வுட்³டா⁴னங் ஓகாஸங் அத³த்வா நிஸீத³தோ து³க்கடங் ஸியாதி யோஜனா.
87.Bhuñjantamuṭṭhapeti yo bhikkhu bhuñjantaṃ uṭṭhāpeyya, tassa dukkaṭaṃ siyā. Bhattasālādīsu vuḍḍhānaṃ okāsaṃ adatvā nisīdato dukkaṭaṃ siyāti yojanā.
88. யானானீதி வய்ஹங் ரதோ² ஸகடங் ஸந்த³மானிகாதீ³னி. கல்லகோதி அகி³லானோ. அகி³லானோ யோ பி⁴க்கு² யானானி அபி⁴ருஹெய்ய, தஸ்ஸ து³க்கடங் ஸியாதி அத்தோ². வதே³ த³வந்தி கேளிங் வதெ³ய்ய, ரதனத்தயங் ஆரப்³ப⁴ கேளிங் வதெ³ய்ய, தஸ்ஸ து³க்கடங் ஸியாதி அத்தோ². அஞ்ஞபரிஸாய உபலாலனே து³க்கடங் ஹோதி.
88.Yānānīti vayhaṃ ratho sakaṭaṃ sandamānikādīni. Kallakoti agilāno. Agilāno yo bhikkhu yānāni abhiruheyya, tassa dukkaṭaṃ siyāti attho. Vade davanti keḷiṃ vadeyya, ratanattayaṃ ārabbha keḷiṃ vadeyya, tassa dukkaṭaṃ siyāti attho. Aññaparisāya upalālane dukkaṭaṃ hoti.
89. காயாதி³ந்தி எத்த² ஆதி³-ஸத்³தோ³ ஊருனிமித்தங் ஸங்க³ண்ஹாதி. காயங் வா ஊருங் வா நிமித்தங் வா விவரித்வா பி⁴க்கு²னீனங் ந த³ஸ்ஸயே ந த³ஸ்ஸெய்யாதி அத்தோ². லோகாயதங் திரச்சா²னாதி³விஜ்ஜங் ந ச ஸயங் வாசெய்ய, பரஞ்ச ந வாசாபெய்ய. பலிதங் க³ண்ஹெய்ய வா க³ண்ஹாபெய்ய வா, தஸ்ஸ து³க்கடங் ஸியாதி யோஜனா.
89.Kāyādinti ettha ādi-saddo ūrunimittaṃ saṅgaṇhāti. Kāyaṃ vā ūruṃ vā nimittaṃ vā vivaritvā bhikkhunīnaṃ na dassaye na dasseyyāti attho. Lokāyataṃ tiracchānādivijjaṃ na ca sayaṃ vāceyya, parañca na vācāpeyya. Palitaṃ gaṇheyya vā gaṇhāpeyya vā, tassa dukkaṭaṃ siyāti yojanā.
90-92. யத்த² கத்த²சி பேளாயங் பக்கி²பித்வா ப⁴த்தங் பு⁴ஞ்ஜந்தஸ்ஸ து³க்கடங் ஸியாதி ஸம்ப³ந்தோ⁴. பத்தஹத்த²கோ யோ பி⁴க்கு² வாதபானங் வா கவாடங் வா பணாமே பணாமெய்ய, ஸோத³கங் பத்தங் உண்ஹெய்ய உண்ஹே ஓதாபெய்ய வா படிஸாமெய்ய வா, வோத³கங் பத்தங் அதிஉண்ஹெய்ய அதிட²பெய்ய, தஸ்ஸ து³க்கடங் ஸியாதி அத்தோ². யோ பி⁴க்கு² பத்தங் பூ⁴மியங் வா அங்கே வா மஞ்சே வா பீடே² வா மிட்³ட⁴ந்தே வா பரிப⁴ண்ட³ந்தே வா பாதே³ வா ச²த்தே வா ட²பெய்ய, தஸ்ஸ து³க்கடங் ஸியாதி ஸம்ப³ந்தோ⁴. பூ⁴மியந்தி யேன கேனசி அனத்த²தாய பங்ஸுஸக்க²ரமிஸ்ஸாய. அங்கேதி த்³வின்னங் ஊரூனங் மஜ்ஜே². மிட்³ட⁴ந்தேதி மிட்³ட⁴பரியந்தே. பரிப⁴ண்ட³ந்தேதி பா³ஹிரபஸ்ஸே கதாய தனுகமிட்³டி⁴யா அந்தே. யோ பி⁴க்கு² சலகாதி³ங் வா பத்தே ட²பெய்ய, பத்தே வா ஹத்த²தோ⁴வனே ஹத்த²ஸ்ஸ தோ⁴வனப்பச்சயா தஸ்ஸ து³க்கடங் ஸியாதி ஸம்ப³ந்தோ⁴.
90-92. Yattha katthaci peḷāyaṃ pakkhipitvā bhattaṃ bhuñjantassa dukkaṭaṃ siyāti sambandho. Pattahatthako yo bhikkhu vātapānaṃ vā kavāṭaṃ vā paṇāme paṇāmeyya, sodakaṃ pattaṃ uṇheyya uṇhe otāpeyya vā paṭisāmeyya vā, vodakaṃ pattaṃ atiuṇheyya atiṭhapeyya, tassa dukkaṭaṃ siyāti attho. Yo bhikkhu pattaṃ bhūmiyaṃ vā aṅke vā mañce vā pīṭhe vā miḍḍhante vā paribhaṇḍante vā pāde vā chatte vā ṭhapeyya, tassa dukkaṭaṃ siyāti sambandho. Bhūmiyanti yena kenaci anatthatāya paṃsusakkharamissāya. Aṅketi dvinnaṃ ūrūnaṃ majjhe. Miḍḍhanteti miḍḍhapariyante. Paribhaṇḍanteti bāhirapasse katāya tanukamiḍḍhiyā ante. Yo bhikkhu calakādiṃ vā patte ṭhapeyya, patte vā hatthadhovane hatthassa dhovanappaccayā tassa dukkaṭaṃ siyāti sambandho.
93. உச்சி²ட்ட²ங் முக²தோ⁴வனங் உத³கம்பி பத்தேன நீஹரந்தஸ்ஸ பி⁴க்கு²னோ து³க்கடங் ஸியா. யோ பி⁴க்கு² அகப்பியங் பத்தங் பரிபு⁴ஞ்ஜெய்ய, தஸ்ஸ து³க்கடங் ஸியாதி அத்தோ². தத்த² அகப்பியங் பத்தந்தி தா³ருமயபத்தாதி³ங்.
93. Ucchiṭṭhaṃ mukhadhovanaṃ udakampi pattena nīharantassa bhikkhuno dukkaṭaṃ siyā. Yo bhikkhu akappiyaṃ pattaṃ paribhuñjeyya, tassa dukkaṭaṃ siyāti attho. Tattha akappiyaṃ pattanti dārumayapattādiṃ.
94. யோ பி⁴க்கு² கி²பிதே ‘‘ஜீவா’’தி வதே³ வதெ³ய்ய, தஸ்ஸ து³க்கடங் ஸியாதி அத்தோ². யோ பி⁴க்கு² பரிமண்ட³லகாதி³ம்ஹி பஞ்சஸத்ததி ஸேகி²யே அனாத³ரோ ஹுத்வா ந ஸிக்க²தி, தஸ்ஸ து³க்கடங் ஸியாதி ஸம்ப³ந்தோ⁴.
94. Yo bhikkhu khipite ‘‘jīvā’’ti vade vadeyya, tassa dukkaṭaṃ siyāti attho. Yo bhikkhu parimaṇḍalakādimhi pañcasattati sekhiye anādaro hutvā na sikkhati, tassa dukkaṭaṃ siyāti sambandho.
95. யோ பி⁴க்கு² ப⁴ண்டா³கா³ரே பயுதோ மாதுயா பிதுனோ ச ப⁴ண்ட³கங் கோ³பெய்ய, அஸ்ஸ பி⁴க்கு²னோ பாசித்தியங் ஸியாதி ஸம்ப³ந்தோ⁴. தத்த² பயுதோதி ப⁴ண்டா³கா³ரே ப்³யாபாரவஸேன யுத்தப்பயுத்தோ. கோ³பயேதி கோ³பெய்ய. யோ பி⁴க்கு² த³வாய ஹீனேன ஜாதிஆதி³னா உத்தமம்பி வதெ³ய்ய, து³ப்³பா⁴ஸிதங் ஸியாதி ஸம்ப³ந்தோ⁴. தத்த² ஹீனேஹி வா உக்கட்டே²ஹி வா ஜாதிஆதீ³ஹி ஏவங் உக்கட்ட²ங் வா ஹீனங் வா ‘‘சண்டா³லோஸீ’’திஆதி³னா நயேன உஜுங் வா ‘‘ஸந்தி இதே⁴கச்சே சண்டா³லவேனநேஸாதா³’’திஆதி³னா நயேன அஞ்ஞாபதே³ஸேன வா உபஸம்பன்னங் வா அனுபஸம்பன்னங் வா அக்கோஸாதி⁴ப்பாயங் வினா கேவலங் கீளாதி⁴ப்பாயேன வதெ³ய்ய, து³ப்³பா⁴ஸிதங் ஸியாதி.
95. Yo bhikkhu bhaṇḍāgāre payuto mātuyā pituno ca bhaṇḍakaṃ gopeyya, assa bhikkhuno pācittiyaṃ siyāti sambandho. Tattha payutoti bhaṇḍāgāre byāpāravasena yuttappayutto. Gopayeti gopeyya. Yo bhikkhu davāya hīnena jātiādinā uttamampi vadeyya, dubbhāsitaṃ siyāti sambandho. Tattha hīnehi vā ukkaṭṭhehi vā jātiādīhi evaṃ ukkaṭṭhaṃ vā hīnaṃ vā ‘‘caṇḍālosī’’tiādinā nayena ujuṃ vā ‘‘santi idhekacce caṇḍālavenanesādā’’tiādinā nayena aññāpadesena vā upasampannaṃ vā anupasampannaṃ vā akkosādhippāyaṃ vinā kevalaṃ kīḷādhippāyena vadeyya, dubbhāsitaṃ siyāti.
பகிண்ணகனித்³தே³ஸவண்ணனா நிட்டி²தா.
Pakiṇṇakaniddesavaṇṇanā niṭṭhitā.
