| Library / Tipiṭaka / តិបិដក • Tipiṭaka / បាចិត្យាទិយោជនាបាឡិ • Pācityādiyojanāpāḷi |
២០៧. បជ្ជោតរាជវត្ថុកថា
207. Pajjotarājavatthukathā
៣៣៤. វិច្ឆិកស្ស ជាតោតិ វិច្ឆិកស្ស ការណា ជាតោ, វិច្ឆិកំ បដិច្ច ជាតោតិ អត្ថោ។ សព្ពិ ច ភេសជ្ជំ វិច្ឆិកានំ បដិកូលំ ហោតីតិ យោជនា។ បញ្ញាសយោជនិកាតិ ឯត្ថ ណិកបច្ចយស្ស គន្តុំ សមត្ថត្ថេ បវត្តភាវំ ទស្សេន្តោ អាហ ‘‘គន្តុំ សមត្ថោ ហោតី’’តិ។ អស្ស រញ្ញោតិ ចន្ទបជ្ជោតនាមកស្ស អស្ស រញ្ញោ។ ហត្ថិនីយេវាតិ ភទ្ទវតិកា នាម ហត្ថិនីយេវ។ វីសយោជនសតន្តិ វីសាធិកំ យោជនសតំ។
334.Vicchikassa jātoti vicchikassa kāraṇā jāto, vicchikaṃ paṭicca jātoti attho. Sabbi ca bhesajjaṃ vicchikānaṃ paṭikūlaṃ hotīti yojanā. Paññāsayojanikāti ettha ṇikapaccayassa gantuṃ samatthatthe pavattabhāvaṃ dassento āha ‘‘gantuṃ samattho hotī’’ti. Assa raññoti candapajjotanāmakassa assa rañño. Hatthinīyevāti bhaddavatikā nāma hatthinīyeva. Vīsayojanasatanti vīsādhikaṃ yojanasataṃ.
ភុញ្ជិតុំ និសិន្នស្ស ឯកស្ស កុលបុត្តស្ស ទ្វារេតិ យោជនា។ តស្សាតិ កុលបុត្តស្ស, អារោចេសីតិ សម្ពន្ធោ។ សោតិ កុលបុត្តោ, ‘‘អាហរា’’តិ អាណាបេសីតិ សម្ពន្ធោ។ ឥតរោតិ បុរិសោ។ តន្តិ បត្តំ។ យត្ថ យត្ថាតិ យស្មិំ យស្មិំ ភវេ។ តត្ថ តត្ថ វាហនសម្បន្នោ ហោមីតិ យោជនា។ សោតិ បុរិសោ។ បជ្ជោតោ នាម អយំ រាជា ជាតោតិ យោជនា។
Bhuñjituṃ nisinnassa ekassa kulaputtassa dvāreti yojanā. Tassāti kulaputtassa, ārocesīti sambandho. Soti kulaputto, ‘‘āharā’’ti āṇāpesīti sambandho. Itaroti puriso. Tanti pattaṃ. Yattha yatthāti yasmiṃ yasmiṃ bhave. Tattha tattha vāhanasampanno homīti yojanā. Soti puriso. Pajjoto nāma ayaṃ rājā jātoti yojanā.
សព្ពិំ បាយេត្វាតិ ឥទំ ឧបលក្ខណមត្តន្តិ ទស្សេន្តោ អាហ ‘‘សព្ពិញ្ច បាយេត្វា’’តិអាទិ។ សព្ពិញ្ច បាយេត្វា, បរិចារកានំ អាហារាចារេ វិធិញ្ច អាចិក្ខិត្វាតិ អត្ថោ។ ឱលុម្បេត្វាតិ លុបិធាតុ ឱទហនត្ថោតិ អាហ ‘‘ឱទហិត្វា’’តិ។ វិរេចេសីតិ ឧទ្ធញ្ច អធោ ច វិរេចេសិ។
Sabbiṃ pāyetvāti idaṃ upalakkhaṇamattanti dassento āha ‘‘sabbiñca pāyetvā’’tiādi. Sabbiñca pāyetvā, paricārakānaṃ āhārācāre vidhiñca ācikkhitvāti attho. Olumpetvāti lupidhātu odahanatthoti āha ‘‘odahitvā’’ti. Virecesīti uddhañca adho ca virecesi.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ២០៧. បជ្ជោតរាជវត្ថុ • 207. Pajjotarājavatthu
អដ្ឋកថា • Aṭṭhakathā / វិនយបិដក (អដ្ឋកថា) • Vinayapiṭaka (aṭṭhakathā) / មហាវគ្គ-អដ្ឋកថា • Mahāvagga-aṭṭhakathā / បជ្ជោតរាជវត្ថុកថា • Pajjotarājavatthukathā
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បជ្ជោតរាជវត្ថុកថាទិវណ្ណនា • Pajjotarājavatthukathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បជ្ជោតរាជវត្ថុកថាវណ្ណនា • Pajjotarājavatthukathāvaṇṇanā
