| Library / Tipiṭaka / តិបិដក • Tipiṭaka / មហាវគ្គ-អដ្ឋកថា • Mahāvagga-aṭṭhakathā |
បជ្ជោតរាជវត្ថុកថា
Pajjotarājavatthukathā
៣៣៤. ជេគុច្ឆំ មេ សប្បីតិ អយំ កិរ រាជា វិច្ឆិកស្ស ជាតោ, វិច្ឆិកវិសបដិឃាតាយ ច សប្បិ ភេសជ្ជំ ហោតិ វិច្ឆិកានំ បដិកូលំ, តស្មា ឯវមាហ។ ឧទ្ទេកំ ទស្សតីតិ ឧគ្គារំ ទស្សតិ។ បញ្ញាស យោជនិកា ហោតីតិ បញ្ញាស យោជនានិ គន្តុំ សមត្ថា ហោតិ។ ន កេវលញ្ចស្ស រញ្ញោ ហត្ថិនីយេវ, នាឡាគិរិ នាម ហត្ថី យោជនសតំ គច្ឆតិ, ចេលកណ្ណោ ច មុញ្ចកេសោ ចាតិ ទ្វេ អស្សា វីសយោជនសតំ គច្ឆន្តិ, កាកោ ទាសោ សដ្ឋិយោជនានិ គច្ឆតិ។
334.Jegucchaṃ me sappīti ayaṃ kira rājā vicchikassa jāto, vicchikavisapaṭighātāya ca sappi bhesajjaṃ hoti vicchikānaṃ paṭikūlaṃ, tasmā evamāha. Uddekaṃ dassatīti uggāraṃ dassati. Paññāsa yojanikā hotīti paññāsa yojanāni gantuṃ samatthā hoti. Na kevalañcassa rañño hatthinīyeva, nāḷāgiri nāma hatthī yojanasataṃ gacchati, celakaṇṇo ca muñcakeso cāti dve assā vīsayojanasataṃ gacchanti, kāko dāso saṭṭhiyojanāni gacchati.
ឯកស្ស កិរ កុលបុត្តស្ស អនុប្បន្នេ ពុទ្ធេ ឯកទិវសំ ភុញ្ជិតុំ និសិន្នស្ស បច្ចេកពុទ្ធោ ទ្វារេ ឋត្វា អគមាសិ, តស្សេកោ បុរិសោ ‘‘បច្ចេកពុទ្ធោ អាគន្ត្វា គតោ’’តិ អារោចេសិ។ សោ សុត្វា ‘‘គច្ឆ, វេគេន បត្តំ អាហរា’’តិ អាហរាបេត្វា អត្តនោ សជ្ជិតំ ភត្តំ សព្ពំ ទត្វា បេសេសិ។ ឥតរោ តំ អាហរិត្វា បច្ចេកពុទ្ធស្ស ហត្ថេ ឋបេត្វា ‘‘អហំ ភន្តេ តុម្ហាកំ កតេន ឥមិនា កាយវេយ្យាវតិកេន យត្ថ យត្ថ និព្ពត្តោបិ វាហនសម្បន្នោ ហោមី’’តិ បត្ថនំ អកាសិ។ សោ អយំ ឯតរហិ បជ្ជោតោ នាម រាជា ជាតោ, តាយ បត្ថនាយ អយំ វាហនសម្បត្តិ។
Ekassa kira kulaputtassa anuppanne buddhe ekadivasaṃ bhuñjituṃ nisinnassa paccekabuddho dvāre ṭhatvā agamāsi, tasseko puriso ‘‘paccekabuddho āgantvā gato’’ti ārocesi. So sutvā ‘‘gaccha, vegena pattaṃ āharā’’ti āharāpetvā attano sajjitaṃ bhattaṃ sabbaṃ datvā pesesi. Itaro taṃ āharitvā paccekabuddhassa hatthe ṭhapetvā ‘‘ahaṃ bhante tumhākaṃ katena iminā kāyaveyyāvatikena yattha yattha nibbattopi vāhanasampanno homī’’ti patthanaṃ akāsi. So ayaṃ etarahi pajjoto nāma rājā jāto, tāya patthanāya ayaṃ vāhanasampatti.
សប្បិំ បាយេត្វាតិ សប្បិញ្ច បាយេត្វា; បរិចារិកានញ្ច អាហារាចារេ វិធិំ អាចិក្ខិត្វា។ នខេន ភេសជ្ជំ ឱលុម្បេត្វាតិ នខេន ភេសជ្ជំ ឱទហិត្វា; បក្ខិបិត្វាតិ អត្ថោ។ និច្ឆារេសីតិ វិរេចេសិ។
Sappiṃ pāyetvāti sappiñca pāyetvā; paricārikānañca āhārācāre vidhiṃ ācikkhitvā. Nakhena bhesajjaṃ olumpetvāti nakhena bhesajjaṃ odahitvā; pakkhipitvāti attho. Nicchāresīti virecesi.
Related texts:
តិបិដក (មូល) • Tipiṭaka (Mūla) / វិនយបិដក • Vinayapiṭaka / មហាវគ្គបាឡិ • Mahāvaggapāḷi / ២០៧. បជ្ជោតរាជវត្ថុ • 207. Pajjotarājavatthu
ដីកា • Tīkā / វិនយបិដក (ដីកា) • Vinayapiṭaka (ṭīkā) / សារត្ថទីបនី-ដីកា • Sāratthadīpanī-ṭīkā / បជ្ជោតរាជវត្ថុកថាទិវណ្ណនា • Pajjotarājavatthukathādivaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / វជិរពុទ្ធិ-ដីកា • Vajirabuddhi-ṭīkā / បជ្ជោតរាជវត្ថុកថាវណ្ណនា • Pajjotarājavatthukathāvaṇṇanā
ដីកា • Tīkā / វិនយបិដក (ដីកា) • Vinayapiṭaka (ṭīkā) / បាចិត្យាទិយោជនាបាឡិ • Pācityādiyojanāpāḷi / ២០៧. បជ្ជោតរាជវត្ថុកថា • 207. Pajjotarājavatthukathā
