| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
១៦. សោឡសមវគ្គោ
16. Soḷasamavaggo
(១៥៧) ២. បគ្គហកថា
(157) 2. Paggahakathā
៧៤៥. បរោ បរស្ស ចិត្តំ បគ្គណ្ហាតីតិ? អាមន្តា។ បរោ បរស្ស ចិត្តំ ‘‘មា រជ្ជិ,’’‘‘មា ទុស្សិ,’’‘‘មា មុយ្ហិ,’’‘‘មា កិលិស្សី’’តិ បគ្គណ្ហាតីតិ? ន ហេវំ វត្តព្ពេ…បេ.… បរោ បរស្ស ចិត្តំ បគ្គណ្ហាតីតិ? អាមន្តា។ បរោ បរស្ស អលោភំ កុសលមូលំ ជនេតិ… អទោសំ កុសលមូលំ ជនេតិ… អមោហំ កុសលមូលំ ជនេតិ… សទ្ធំ ជនេតិ… វីរិយំ ជនេតិ… សតិំ ជនេតិ… សមាធិំ ជនេតិ… បញ្ញំ ជនេតីតិ? ន ហេវំ វត្តព្ពេ…បេ.… បរោ បរស្ស ចិត្តំ បគ្គណ្ហាតីតិ? អាមន្តា។ បរោ បរស្ស ឧប្បន្នោ ផស្សោ ‘‘មា និរុជ្ឈី’’តិ បគ្គណ្ហាតីតិ? ន ហេវំ វត្តព្ពេ…បេ.… បរោ បរស្ស ឧប្បន្នា វេទនា…បេ.… ឧប្បន្នា បញ្ញា ‘‘មា និរុជ្ឈី’’តិ បគ្គណ្ហាតីតិ? ន ហេវំ វត្តព្ពេ…បេ.…។
745. Paro parassa cittaṃ paggaṇhātīti? Āmantā. Paro parassa cittaṃ ‘‘mā rajji,’’‘‘mā dussi,’’‘‘mā muyhi,’’‘‘mā kilissī’’ti paggaṇhātīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa alobhaṃ kusalamūlaṃ janeti… adosaṃ kusalamūlaṃ janeti… amohaṃ kusalamūlaṃ janeti… saddhaṃ janeti… vīriyaṃ janeti… satiṃ janeti… samādhiṃ janeti… paññaṃ janetīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa uppanno phasso ‘‘mā nirujjhī’’ti paggaṇhātīti? Na hevaṃ vattabbe…pe… paro parassa uppannā vedanā…pe… uppannā paññā ‘‘mā nirujjhī’’ti paggaṇhātīti? Na hevaṃ vattabbe…pe….
បរោ បរស្ស ចិត្តំ បគ្គណ្ហាតីតិ? អាមន្តា។ បរោ បរស្ស អត្ថាយ រាគំ បជហតិ… ទោសំ បជហតិ… មោហំ បជហតិ…បេ.… អនោត្តប្បំ បជហតីតិ? ន ហេវំ វត្តព្ពេ…បេ.…។
Paro parassa cittaṃ paggaṇhātīti? Āmantā. Paro parassa atthāya rāgaṃ pajahati… dosaṃ pajahati… mohaṃ pajahati…pe… anottappaṃ pajahatīti? Na hevaṃ vattabbe…pe….
បរោ បរស្ស ចិត្តំ បគ្គណ្ហាតីតិ? អាមន្តា។ បរោ បរស្ស អត្ថាយ មគ្គំ ភាវេតិ… សតិបដ្ឋានំ ភាវេតិ…បេ.… ពោជ្ឈង្គំ ភាវេតីតិ? ន ហេវំ វត្តព្ពេ…បេ.…។
Paro parassa cittaṃ paggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti? Na hevaṃ vattabbe…pe….
បរោ បរស្ស ចិត្តំ បគ្គណ្ហាតីតិ? អាមន្តា។ បរោ បរស្ស អត្ថាយ ទុក្ខំ បរិជានាតិ…បេ.… មគ្គំ ភាវេតីតិ? ន ហេវំ វត្តព្ពេ…បេ.…។
Paro parassa cittaṃ paggaṇhātīti? Āmantā. Paro parassa atthāya dukkhaṃ parijānāti…pe… maggaṃ bhāvetīti? Na hevaṃ vattabbe…pe….
បរោ បរស្ស ចិត្តំ បគ្គណ្ហាតីតិ? អាមន្តា។ អញ្ញោ អញ្ញស្ស ការកោ, បរង្កតំ សុខំ ទុក្ខំ អញ្ញោ ករោតិ អញ្ញោ បដិសំវេទេតីតិ? ន ហេវំ វត្តព្ពេ…បេ.…។
Paro parassa cittaṃ paggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
បរោ បរស្ស ចិត្តំ បគ្គណ្ហាតីតិ? អាមន្តា។ ននុ វុត្តំ ភគវតា – ‘‘អត្តនាវ កតំ បាបំ…បេ.… នាញ្ញោ អញ្ញំ វិសោធយេ’’តិ។ អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘បរោ បរស្ស ចិត្តំ បគ្គណ្ហាតី’’តិ។
Paro parassa cittaṃ paggaṇhātīti? Āmantā. Nanu vuttaṃ bhagavatā – ‘‘attanāva kataṃ pāpaṃ…pe… nāñño aññaṃ visodhaye’’ti. Attheva suttantoti? Āmantā. Tena hi na vattabbaṃ – ‘‘paro parassa cittaṃ paggaṇhātī’’ti.
៧៤៦. ន វត្តព្ពំ – ‘‘បរោ បរស្ស ចិត្តំ បគ្គណ្ហាតី’’តិ? អាមន្តា។ ននុ អត្ថិ ពលប្បត្តា, អត្ថិ វសីភូតាតិ? អាមន្តា។ ហញ្ចិ អត្ថិ ពលប្បត្តា, អត្ថិ វសីភូតា, តេន វត រេ វត្តព្ពេ – ‘‘បរោ បរស្ស ចិត្តំ បគ្គណ្ហាតី’’តិ។
746. Na vattabbaṃ – ‘‘paro parassa cittaṃ paggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ paggaṇhātī’’ti.
បគ្គហកថា និដ្ឋិតា។
Paggahakathā niṭṭhitā.
