| Library / Tipiṭaka / តិបិដក • Tipiṭaka / អបទាន-អដ្ឋកថា • Apadāna-aṭṭhakathā |
៩. បទុមត្ថេរអបទានវណ្ណនា
9. Padumattheraapadānavaṇṇanā
ចតុសច្ចំ បកាសេន្តោតិអាទិកំ អាយស្មតោ បទុមត្ថេរស្ស អបទានំ។ អយម្បិ បុរិមពុទ្ធេសុ កតកុសលសម្ភារោ បទុមុត្តរមុនិនា ធម្មបជ្ជោតេ ជោតមានេ ឯកស្មិំ កុលគេហេ និព្ពត្តោ ឃរាវាសំ សណ្ឋបេត្វា ភោគសម្បន្នោតិ បាកដោ។ សោ សត្ថរិ បសីទិត្វា មហាជនេន សទ្ធិំ ធម្មំ សុណន្តោ ធជេន សហ បទុមកលាបំ គហេត្វា អដ្ឋាសិ, សធជំ តំ បទុមកលាបំ អាកាសមុក្ខិបិំ, តំ អច្ឆរិយំ ទិស្វា អតិវិយ សោមនស្សជាតោ អហោសិ។ សោ យាវជីវំ កុសលំ កត្វា ជីវិតបរិយោសានេ សគ្គេ និព្ពត្តោ ធជមិវ ឆកាមាវចរេ បាកដោ បូជិតោ ច ទិព្ពសម្បត្តិមនុភវិត្វា មនុស្សេសុ ច ចក្កវត្តិសម្បត្តិមនុភវិត្វា ឥមស្មិំ ពុទ្ធុប្បាទេ វិភវសម្បន្នេ សទ្ធាសម្បន្នេ ឯកស្មិំ កុលគេហេ និព្ពត្តោ វុទ្ធិមន្វាយ សទ្ធាជាតោ បញ្ចវស្សិកោវ បព្ពជិត្វា នចិរស្សេវ អរហា ហុត្វា កតបុញ្ញនាមេន បទុមត្ថេរោតិ បាកដោ។
Catusaccaṃ pakāsentotiādikaṃ āyasmato padumattherassa apadānaṃ. Ayampi purimabuddhesu katakusalasambhāro padumuttaramuninā dhammapajjote jotamāne ekasmiṃ kulagehe nibbatto gharāvāsaṃ saṇṭhapetvā bhogasampannoti pākaṭo. So satthari pasīditvā mahājanena saddhiṃ dhammaṃ suṇanto dhajena saha padumakalāpaṃ gahetvā aṭṭhāsi, sadhajaṃ taṃ padumakalāpaṃ ākāsamukkhipiṃ, taṃ acchariyaṃ disvā ativiya somanassajāto ahosi. So yāvajīvaṃ kusalaṃ katvā jīvitapariyosāne sagge nibbatto dhajamiva chakāmāvacare pākaṭo pūjito ca dibbasampattimanubhavitvā manussesu ca cakkavattisampattimanubhavitvā imasmiṃ buddhuppāde vibhavasampanne saddhāsampanne ekasmiṃ kulagehe nibbatto vuddhimanvāya saddhājāto pañcavassikova pabbajitvā nacirasseva arahā hutvā katapuññanāmena padumattheroti pākaṭo.
៦៧. អត្តនោ បុព្ពកម្មំ សរិត្វា សោមនស្សជាតោ បុព្ពចរិតាបទានំ បកាសេន្តោ ចតុសច្ចំ បកាសេន្តោតិអាទិមាហ។ តត្ថ សច្ចន្តិ តថំ អវិតថំ អវិបរីតំ សច្ចំ, ទុក្ខសមុទយនិរោធមគ្គវសេន ចត្តារិ សច្ចានិ សមាហដានីតិ ចតុសច្ចំ, តំ ចតុសច្ចំ បកាសេន្តោ លោកេ បាកដំ ករោន្តោតិ អត្ថោ។ វរធម្មប្បវត្តកោតិ ឧត្តមធម្មប្បវត្តកោ បកាសកោតិ អត្ថោ។ អមតំ វុដ្ឋិន្តិ អមតមហានិព្ពានវុដ្ឋិធារំ បវស្សន្តោ បគ្ឃរន្តោ សទេវកំ លោកំ តេមេន្តោ សព្ពកិលេសបរិឡាហំ និព្ពាបេន្តោ ធម្មវស្សំ វស្សតីតិ អត្ថោ។
67. Attano pubbakammaṃ saritvā somanassajāto pubbacaritāpadānaṃ pakāsento catusaccaṃ pakāsentotiādimāha. Tattha saccanti tathaṃ avitathaṃ aviparītaṃ saccaṃ, dukkhasamudayanirodhamaggavasena cattāri saccāni samāhaṭānīti catusaccaṃ, taṃ catusaccaṃ pakāsento loke pākaṭaṃ karontoti attho. Varadhammappavattakoti uttamadhammappavattako pakāsakoti attho. Amataṃ vuṭṭhinti amatamahānibbānavuṭṭhidhāraṃ pavassanto paggharanto sadevakaṃ lokaṃ temento sabbakilesapariḷāhaṃ nibbāpento dhammavassaṃ vassatīti attho.
៦៨. សធជំ បទុមំ គយ្ហាតិ ធជេន សហ ឯកតោ កត្វា បទុមំ បទុមកលាបំ គហេត្វាតិ អត្ថោ។ អឌ្ឍកោសេ ឋិតោ អហន្តិ ឧភោ ឧក្ខិបិត្វា ឋិតោ អហន្តិ អត្ថោ។ សេសំ សព្ពត្ថ ឧត្តានត្ថមេវាតិ។
68.Sadhajaṃ padumaṃ gayhāti dhajena saha ekato katvā padumaṃ padumakalāpaṃ gahetvāti attho. Aḍḍhakose ṭhito ahanti ubho ukkhipitvā ṭhito ahanti attho. Sesaṃ sabbattha uttānatthamevāti.
បទុមត្ថេរអបទានវណ្ណនា សមត្តា។
Padumattheraapadānavaṇṇanā samattā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / អបទានបាឡិ • Apadānapāḷi / ៩. បទុមត្ថេរអបទានំ • 9. Padumattheraapadānaṃ
