| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
១០. បទុមពុទ្ធវំសោ
10. Padumabuddhavaṃso
១.
1.
អនោមទស្សិស្ស អបរេន, សម្ពុទ្ធោ ទ្វិបទុត្តមោ;
Anomadassissa aparena, sambuddho dvipaduttamo;
បទុមោ នាម នាមេន, អសមោ អប្បដិបុគ្គលោ។
Padumo nāma nāmena, asamo appaṭipuggalo.
២.
2.
តស្សាបិ អសមំ សីលំ, សមាធិបិ អនន្តកោ;
Tassāpi asamaṃ sīlaṃ, samādhipi anantako;
អសង្ខេយ្យំ ញាណវរំ, វិមុត្តិបិ អនូបមា។
Asaṅkheyyaṃ ñāṇavaraṃ, vimuttipi anūpamā.
៣.
3.
តស្សាបិ អតុលតេជស្ស, ធម្មចក្កប្បវត្តនេ;
Tassāpi atulatejassa, dhammacakkappavattane;
អភិសមយា តយោ អាសុំ, មហាតមបវាហនា។
Abhisamayā tayo āsuṃ, mahātamapavāhanā.
៤.
4.
បឋមាភិសមយេ ពុទ្ធោ, កោដិសតមពោធយិ;
Paṭhamābhisamaye buddho, koṭisatamabodhayi;
ទុតិយាភិសមយេ ធីរោ, នវុតិកោដិមពោធយិ។
Dutiyābhisamaye dhīro, navutikoṭimabodhayi.
៥.
5.
យទា ច បទុមោ ពុទ្ធោ, ឱវទី សកមត្រជំ;
Yadā ca padumo buddho, ovadī sakamatrajaṃ;
តទា អសីតិកោដីនំ, តតិយាភិសមយោ អហុ។
Tadā asītikoṭīnaṃ, tatiyābhisamayo ahu.
៦.
6.
សន្និបាតា តយោ អាសុំ, បទុមស្ស មហេសិនោ;
Sannipātā tayo āsuṃ, padumassa mahesino;
កោដិសតសហស្សានំ, បឋមោ អាសិ សមាគមោ។
Koṭisatasahassānaṃ, paṭhamo āsi samāgamo.
៧.
7.
កថិនត្ថារសមយេ , ឧប្បន្នេ កថិនចីវរេ;
Kathinatthārasamaye , uppanne kathinacīvare;
៨.
8.
តទា តេ វិមលា ភិក្ខូ, ឆឡភិញ្ញា មហិទ្ធិកា;
Tadā te vimalā bhikkhū, chaḷabhiññā mahiddhikā;
តីណិ សតសហស្សានិ, សមិំសុ អបរាជិតា។
Tīṇi satasahassāni, samiṃsu aparājitā.
៩.
9.
តទា សមាគមោ អាសិ, ទ្វិន្នំ សតសហស្សិនំ។
Tadā samāgamo āsi, dvinnaṃ satasahassinaṃ.
១០.
10.
អហំ តេន សមយេន, សីហោ អាសិំ មិគាធិភូ;
Ahaṃ tena samayena, sīho āsiṃ migādhibhū;
វិវេកមនុព្រូហន្តំ , បវនេ អទ្ទសំ ជិនំ។
Vivekamanubrūhantaṃ , pavane addasaṃ jinaṃ.
១១.
11.
វន្ទិត្វា សិរសា បាទេ, កត្វាន តំ បទក្ខិណំ;
Vanditvā sirasā pāde, katvāna taṃ padakkhiṇaṃ;
តិក្ខត្តុំ អភិនាទិត្វា, សត្តាហំ ជិនមុបដ្ឋហំ។
Tikkhattuṃ abhināditvā, sattāhaṃ jinamupaṭṭhahaṃ.
១២.
12.
សត្តាហំ វរសមាបត្តិយា, វុដ្ឋហិត្វា តថាគតោ;
Sattāhaṃ varasamāpattiyā, vuṭṭhahitvā tathāgato;
មនសា ចិន្តយិត្វាន, កោដិភិក្ខូ សមានយិ។
Manasā cintayitvāna, koṭibhikkhū samānayi.
១៣.
13.
តទាបិ សោ មហាវីរោ, តេសំ មជ្ឈេ វិយាករិ;
Tadāpi so mahāvīro, tesaṃ majjhe viyākari;
‘‘អបរិមេយ្យិតោ កប្បេ, អយំ ពុទ្ធោ ភវិស្សតិ។
‘‘Aparimeyyito kappe, ayaṃ buddho bhavissati.
១៤.
14.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៥.
15.
តស្សាបិ វចនំ សុត្វា, ភិយ្យោ ចិត្តំ បសាទយិំ;
Tassāpi vacanaṃ sutvā, bhiyyo cittaṃ pasādayiṃ;
ឧត្តរិំ វតមធិដ្ឋាសិំ, ទសបារមិបូរិយា។
Uttariṃ vatamadhiṭṭhāsiṃ, dasapāramipūriyā.
១៦.
16.
ចម្បកំ នាម នគរំ, អសមោ នាម ខត្តិយោ;
Campakaṃ nāma nagaraṃ, asamo nāma khattiyo;
អសមា នាម ជនិកា, បទុមស្ស មហេសិនោ។
Asamā nāma janikā, padumassa mahesino.
១៧.
17.
ទសវស្សសហស្សានិ , អគារំ អជ្ឈ សោ វសិ;
Dasavassasahassāni , agāraṃ ajjha so vasi;
នន្ទាវសុយសុត្តរា , តយោ បាសាទមុត្តមា។
Nandāvasuyasuttarā , tayo pāsādamuttamā.
១៨.
18.
តេត្តិំស ច សហស្សានិ, នារិយោ សមលង្កតា;
Tettiṃsa ca sahassāni, nāriyo samalaṅkatā;
ឧត្តរា នាម សា នារី, រម្មោ នាមាសិ អត្រជោ។
Uttarā nāma sā nārī, rammo nāmāsi atrajo.
១៩.
19.
និមិត្តេ ចតុរោ ទិស្វា, រថយានេន និក្ខមិ;
Nimitte caturo disvā, rathayānena nikkhami;
អនូនអដ្ឋមាសានិ, បធានំ បទហី ជិនោ។
Anūnaaṭṭhamāsāni, padhānaṃ padahī jino.
២០.
20.
ព្រហ្មុនា យាចិតោ សន្តោ, បទុមោ លោកនាយកោ;
Brahmunā yācito santo, padumo lokanāyako;
វត្តិ ចក្កំ មហាវីរោ, ធនញ្ចុយ្យានមុត្តមេ។
Vatti cakkaṃ mahāvīro, dhanañcuyyānamuttame.
២១.
21.
សាលោ ច ឧបសាលោ ច, អហេសុំ អគ្គសាវកា;
Sālo ca upasālo ca, ahesuṃ aggasāvakā;
វរុណោ នាមុបដ្ឋាកោ, បទុមស្ស មហេសិនោ។
Varuṇo nāmupaṭṭhāko, padumassa mahesino.
២២.
22.
រាធា ចេវ សុរាធា ច, អហេសុំ អគ្គសាវិកា;
Rādhā ceva surādhā ca, ahesuṃ aggasāvikā;
ពោធិ តស្ស ភគវតោ, មហាសោណោតិ វុច្ចតិ។
Bodhi tassa bhagavato, mahāsoṇoti vuccati.
២៣.
23.
ភិយ្យោ ចេវ អសមោ ច, អហេសុំ អគ្គុបដ្ឋកា;
Bhiyyo ceva asamo ca, ahesuṃ aggupaṭṭhakā;
រុចី ច នន្ទរាមា ច, អហេសុំ អគ្គុបដ្ឋិកា។
Rucī ca nandarāmā ca, ahesuṃ aggupaṭṭhikā.
២៤.
24.
អដ្ឋបណ្ណាសរតនំ, អច្ចុគ្គតោ មហាមុនិ;
Aṭṭhapaṇṇāsaratanaṃ, accuggato mahāmuni;
បភា និទ្ធាវតី តស្ស, អសមា សព្ពសោ ទិសា។
Pabhā niddhāvatī tassa, asamā sabbaso disā.
២៥.
25.
ចន្ទប្បភា សូរិយប្បភា, រតនគ្គិមណិប្បភា;
Candappabhā sūriyappabhā, ratanaggimaṇippabhā;
សព្ពាបិ តា ហតា ហោន្តិ, បត្វា ជិនបភុត្តមំ។
Sabbāpi tā hatā honti, patvā jinapabhuttamaṃ.
២៦.
26.
វស្សសតសហស្សានិ, អាយុ វិជ្ជតិ តាវទេ;
Vassasatasahassāni, āyu vijjati tāvade;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
២៧.
27.
បរិបក្កមានសេ សត្តេ, ពោធយិត្វា អសេសតោ;
Paripakkamānase satte, bodhayitvā asesato;
សេសកេ អនុសាសិត្វា, និព្ពុតោ សោ សសាវកោ។
Sesake anusāsitvā, nibbuto so sasāvako.
២៨.
28.
ឧរគោវ តចំ ជិណ្ណំ, វទ្ធបត្តំវ បាទបោ;
Uragova tacaṃ jiṇṇaṃ, vaddhapattaṃva pādapo;
ជហិត្វា សព្ពសង្ខារេ, និព្ពុតោ សោ យថា សិខី។
Jahitvā sabbasaṅkhāre, nibbuto so yathā sikhī.
២៩.
29.
បទុមោ ជិនវរោ សត្ថា, ធម្មារាមម្ហិ និព្ពុតោ;
Padumo jinavaro satthā, dhammārāmamhi nibbuto;
ធាតុវិត្ថារិកំ អាសិ, តេសុ តេសុ បទេសតោតិ។
Dhātuvitthārikaṃ āsi, tesu tesu padesatoti.
បទុមស្ស ភគវតោ វំសោ អដ្ឋមោ។
Padumassa bhagavato vaṃso aṭṭhamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ១០. បទុមពុទ្ធវំសវណ្ណនា • 10. Padumabuddhavaṃsavaṇṇanā
