| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
១១. នារទពុទ្ធវំសោ
11. Nāradabuddhavaṃso
១.
1.
បទុមស្ស អបរេន, សម្ពុទ្ធោ ទ្វិបទុត្តមោ;
Padumassa aparena, sambuddho dvipaduttamo;
នារទោ នាម នាមេន, អសមោ អប្បដិបុគ្គលោ។
Nārado nāma nāmena, asamo appaṭipuggalo.
២.
2.
សោ ពុទ្ធោ ចក្កវត្តិស្ស, ជេដ្ឋោ ទយិតឱរសោ;
So buddho cakkavattissa, jeṭṭho dayitaoraso;
អាមុក្កមាលាភរណោ, ឧយ្យានំ ឧបសង្កមិ។
Āmukkamālābharaṇo, uyyānaṃ upasaṅkami.
៣.
3.
តត្ថាសិ រុក្ខោ យសវិបុលោ, អភិរូបោ ព្រហា សុចិ;
Tatthāsi rukkho yasavipulo, abhirūpo brahā suci;
តមជ្ឈបត្វា ឧបនិសីទិ, មហាសោណស្ស ហេដ្ឋតោ។
Tamajjhapatvā upanisīdi, mahāsoṇassa heṭṭhato.
៤.
4.
តត្ថ ញាណវរុប្បជ្ជិ, អនន្តំ វជិរូបមំ;
Tattha ñāṇavaruppajji, anantaṃ vajirūpamaṃ;
៥.
5.
តត្ថ សព្ពកិលេសានិ, អសេសមភិវាហយិ;
Tattha sabbakilesāni, asesamabhivāhayi;
បាបុណី កេវលំ ពោធិំ, ពុទ្ធញាណេ ច ចុទ្ទស។
Pāpuṇī kevalaṃ bodhiṃ, buddhañāṇe ca cuddasa.
៦.
6.
បាបុណិត្វាន សម្ពោធិំ, ធម្មចក្កំ បវត្តយិ;
Pāpuṇitvāna sambodhiṃ, dhammacakkaṃ pavattayi;
កោដិសតសហស្សានំ, បឋមាភិសមយោ អហុ។
Koṭisatasahassānaṃ, paṭhamābhisamayo ahu.
៧.
7.
មហាទោណំ នាគរាជំ, វិនយន្តោ មហាមុនិ;
Mahādoṇaṃ nāgarājaṃ, vinayanto mahāmuni;
បាដិហេរំ តទាកាសិ, ទស្សយន្តោ សទេវកេ។
Pāṭiheraṃ tadākāsi, dassayanto sadevake.
៨.
8.
តទា ទេវមនុស្សានំ, តម្ហិ ធម្មប្បកាសនេ;
Tadā devamanussānaṃ, tamhi dhammappakāsane;
នវុតិកោដិសហស្សានិ, តរិំសុ សព្ពសំសយំ។
Navutikoṭisahassāni, tariṃsu sabbasaṃsayaṃ.
៩.
9.
យម្ហិ កាលេ មហាវីរោ, ឱវទី សកមត្រជំ;
Yamhi kāle mahāvīro, ovadī sakamatrajaṃ;
អសីតិកោដិសហស្សានំ, តតិយាភិសមយោ អហុ។
Asītikoṭisahassānaṃ, tatiyābhisamayo ahu.
១០.
10.
សន្និបាតា តយោ អាសុំ, នារទស្ស មហេសិនោ;
Sannipātā tayo āsuṃ, nāradassa mahesino;
កោដិសតសហស្សានំ, បឋមោ អាសិ សមាគមោ។
Koṭisatasahassānaṃ, paṭhamo āsi samāgamo.
១១.
11.
យទា ពុទ្ធោ ពុទ្ធគុណំ, សនិទានំ បកាសយិ;
Yadā buddho buddhaguṇaṃ, sanidānaṃ pakāsayi;
នវុតិកោដិសហស្សានិ, សមិំសុ វិមលា តទា។
Navutikoṭisahassāni, samiṃsu vimalā tadā.
១២.
12.
យទា វេរោចនោ នាគោ, ទានំ ទទាតិ សត្ថុនោ;
Yadā verocano nāgo, dānaṃ dadāti satthuno;
តទា សមិំសុ ជិនបុត្តា, អសីតិសតសហស្សិយោ។
Tadā samiṃsu jinaputtā, asītisatasahassiyo.
១៣.
13.
អហំ តេន សមយេន, ជដិលោ ឧគ្គតាបនោ;
Ahaṃ tena samayena, jaṭilo uggatāpano;
អន្តលិក្ខចរោ អាសិំ, បញ្ចាភិញ្ញាសុ បារគូ។
Antalikkhacaro āsiṃ, pañcābhiññāsu pāragū.
១៤.
14.
តទាបាហំ អសមសមំ, សសង្ឃំ សបរិជ្ជនំ;
Tadāpāhaṃ asamasamaṃ, sasaṅghaṃ saparijjanaṃ;
អន្នបានេន តប្បេត្វា, ចន្ទនេនាភិបូជយិំ។
Annapānena tappetvā, candanenābhipūjayiṃ.
១៥.
15.
សោបិ មំ តទា ព្យាកាសិ, នារទោ លោកនាយកោ;
Sopi maṃ tadā byākāsi, nārado lokanāyako;
‘‘អបរិមេយ្យិតោ កប្បេ, អយំ ពុទ្ធោ ភវិស្សតិ។
‘‘Aparimeyyito kappe, ayaṃ buddho bhavissati.
១៦.
16.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៧.
17.
តស្សាបិ វចនំ សុត្វា, ភិយ្យោ ហាសេត្វ មានសំ;
Tassāpi vacanaṃ sutvā, bhiyyo hāsetva mānasaṃ;
អធិដ្ឋហិំ វតំ ឧគ្គំ, ទសបារមិបូរិយា។
Adhiṭṭhahiṃ vataṃ uggaṃ, dasapāramipūriyā.
១៨.
18.
នគរំ ធញ្ញវតី នាម, សុទេវោ នាម ខត្តិយោ;
Nagaraṃ dhaññavatī nāma, sudevo nāma khattiyo;
អនោមា នាម ជនិកា, នារទស្ស មហេសិនោ។
Anomā nāma janikā, nāradassa mahesino.
១៩.
19.
នវវស្សសហស្សានិ , អគារំ អជ្ឈ សោ វសិ;
Navavassasahassāni , agāraṃ ajjha so vasi;
ជិតោ វិជិតាភិរាមោ, តយោ បាសាទមុត្តមា។
Jito vijitābhirāmo, tayo pāsādamuttamā.
២០.
20.
តិចត្តារីសសហស្សានិ, នារិយោ សមលង្កតា;
Ticattārīsasahassāni, nāriyo samalaṅkatā;
វិជិតសេនា នាម នារី, នន្ទុត្តរោ នាម អត្រជោ។
Vijitasenā nāma nārī, nanduttaro nāma atrajo.
២១.
21.
និមិត្តេ ចតុរោ ទិស្វា, បទសា គមនេន និក្ខមិ;
Nimitte caturo disvā, padasā gamanena nikkhami;
២២.
22.
ព្រហ្មុនា យាចិតោ សន្តោ, នារទោ លោកនាយកោ;
Brahmunā yācito santo, nārado lokanāyako;
វត្តិ ចក្កំ មហាវីរោ, ធនញ្ចុយ្យានមុត្តមេ។
Vatti cakkaṃ mahāvīro, dhanañcuyyānamuttame.
២៣.
23.
ភទ្ទសាលោ ជិតមិត្តោ, អហេសុំ អគ្គសាវកា;
Bhaddasālo jitamitto, ahesuṃ aggasāvakā;
វាសេដ្ឋោ នាមុបដ្ឋាកោ, នារទស្ស មហេសិនោ។
Vāseṭṭho nāmupaṭṭhāko, nāradassa mahesino.
២៤.
24.
ឧត្តរា ផគ្គុនី ចេវ, អហេសុំ អគ្គសាវិកា;
Uttarā phaggunī ceva, ahesuṃ aggasāvikā;
ពោធិ តស្ស ភគវតោ, មហាសោណោតិ វុច្ចតិ។
Bodhi tassa bhagavato, mahāsoṇoti vuccati.
២៥.
25.
ឧគ្គរិន្ទោ វសភោ ច, អហេសុំ អគ្គុបដ្ឋកា;
Uggarindo vasabho ca, ahesuṃ aggupaṭṭhakā;
២៦.
26.
អដ្ឋាសីតិរតនានិ , អច្ចុគ្គតោ មហាមុនិ;
Aṭṭhāsītiratanāni , accuggato mahāmuni;
កញ្ចនគ្ឃិយសង្កាសោ, ទសសហស្សី វិរោចតិ។
Kañcanagghiyasaṅkāso, dasasahassī virocati.
២៧.
27.
តស្ស ព្យាមប្បភា កាយា, និទ្ធាវតិ ទិសោទិសំ;
Tassa byāmappabhā kāyā, niddhāvati disodisaṃ;
និរន្តរំ ទិវារត្តិំ, យោជនំ ផរតេ សទា។
Nirantaraṃ divārattiṃ, yojanaṃ pharate sadā.
២៨.
28.
ន កេចិ តេន សមយេន, សមន្តា យោជនេ ជនា;
Na keci tena samayena, samantā yojane janā;
ឧក្កាបទីបេ ឧជ្ជាលេន្តិ, ពុទ្ធរំសីហិ ឱត្ថដា។
Ukkāpadīpe ujjālenti, buddharaṃsīhi otthaṭā.
២៩.
29.
នវុតិវស្សសហស្សានិ, អាយុ វិជ្ជតិ តាវទេ;
Navutivassasahassāni, āyu vijjati tāvade;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
៣០.
30.
យថា ឧឡូហិ គគនំ, វិចិត្តំ ឧបសោភតិ;
Yathā uḷūhi gaganaṃ, vicittaṃ upasobhati;
តថេវ សាសនំ តស្ស, អរហន្តេហិ សោភតិ។
Tatheva sāsanaṃ tassa, arahantehi sobhati.
៣១.
31.
សំសារសោតំ តរណាយ, សេសកេ បដិបន្នកេ;
Saṃsārasotaṃ taraṇāya, sesake paṭipannake;
ធម្មសេតុំ ទឡ្ហំ កត្វា, និព្ពុតោ សោ នរាសភោ។
Dhammasetuṃ daḷhaṃ katvā, nibbuto so narāsabho.
៣២.
32.
សោបិ ពុទ្ធោ អសមសមោ, តេបិ ខីណាសវា អតុលតេជា;
Sopi buddho asamasamo, tepi khīṇāsavā atulatejā;
សព្ពំ តមន្តរហិតំ, ននុ រិត្តា សព្ពសង្ខារា។
Sabbaṃ tamantarahitaṃ, nanu rittā sabbasaṅkhārā.
៣៣.
33.
នារទោ ជិនវសភោ, និព្ពុតោ សុទស្សនេ បុរេ;
Nārado jinavasabho, nibbuto sudassane pure;
តត្ថេវស្ស ថូបវរោ, ចតុយោជនមុគ្គតោតិ។
Tatthevassa thūpavaro, catuyojanamuggatoti.
នារទស្ស ភគវតោ វំសោ នវមោ។
Nāradassa bhagavato vaṃso navamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ១១. នារទពុទ្ធវំសវណ្ណនា • 11. Nāradabuddhavaṃsavaṇṇanā
