| Library / Tipiṭaka / តិបិដក • Tipiṭaka / ពុទ្ធវំសបាឡិ • Buddhavaṃsapāḷi |
១២. បទុមុត្តរពុទ្ធវំសោ
12. Padumuttarabuddhavaṃso
១.
1.
នារទស្ស អបរេន, សម្ពុទ្ធោ ទ្វិបទុត្តមោ;
Nāradassa aparena, sambuddho dvipaduttamo;
បទុមុត្តរោ នាម ជិនោ, អក្ខោភោ សាគរូបមោ។
Padumuttaro nāma jino, akkhobho sāgarūpamo.
២.
2.
មណ្ឌកប្បោវ សោ អាសិ, យម្ហិ ពុទ្ធោ អជាយថ;
Maṇḍakappova so āsi, yamhi buddho ajāyatha;
ឧស្សន្នកុសលា ជនតា, តម្ហិ កប្បេ អជាយថ។
Ussannakusalā janatā, tamhi kappe ajāyatha.
៣.
3.
បទុមុត្តរស្ស ភគវតោ, បឋមេ ធម្មទេសនេ;
Padumuttarassa bhagavato, paṭhame dhammadesane;
កោដិសតសហស្សានំ, ធម្មាភិសមយោ អហុ។
Koṭisatasahassānaṃ, dhammābhisamayo ahu.
៤.
4.
តតោ បរម្បិ វស្សន្តេ, តប្បយន្តេ ច បាណិនេ;
Tato parampi vassante, tappayante ca pāṇine;
សត្តតិំសសតសហស្សានំ, ទុតិយាភិសមយោ អហុ។
Sattatiṃsasatasahassānaṃ, dutiyābhisamayo ahu.
៥.
5.
យម្ហិ កាលេ មហាវីរោ, អានន្ទំ ឧបសង្កមិ;
Yamhi kāle mahāvīro, ānandaṃ upasaṅkami;
បិតុសន្តិកំ ឧបគន្ត្វា, អាហនី អមតទុន្ទុភិំ។
Pitusantikaṃ upagantvā, āhanī amatadundubhiṃ.
៦.
6.
អាហតេ អមតភេរិម្ហិ, វស្សន្តេ ធម្មវុដ្ឋិយា;
Āhate amatabherimhi, vassante dhammavuṭṭhiyā;
បញ្ញាសសតសហស្សានំ, តតិយាភិសមយោ អហុ។
Paññāsasatasahassānaṃ, tatiyābhisamayo ahu.
៧.
7.
ឱវាទកោ វិញ្ញាបកោ, តារកោ សព្ពបាណិនំ;
Ovādako viññāpako, tārako sabbapāṇinaṃ;
ទេសនាកុសលោ ពុទ្ធោ, តារេសិ ជនតំ ពហុំ។
Desanākusalo buddho, tāresi janataṃ bahuṃ.
៨.
8.
សន្និបាតា តយោ អាសុំ, បទុមុត្តរស្ស សត្ថុនោ;
Sannipātā tayo āsuṃ, padumuttarassa satthuno;
កោដិសតសហស្សានំ, បឋមោ អាសិ សមាគមោ។
Koṭisatasahassānaṃ, paṭhamo āsi samāgamo.
៩.
9.
យទា ពុទ្ធោ អសមសមោ, វសិ វេភារបព្ពតេ;
Yadā buddho asamasamo, vasi vebhārapabbate;
នវុតិកោដិសហស្សានំ, ទុតិយោ អាសិ សមាគមោ។
Navutikoṭisahassānaṃ, dutiyo āsi samāgamo.
១០.
10.
បុន ចារិកំ បក្កន្តេ, គាមនិគមរដ្ឋតោ;
Puna cārikaṃ pakkante, gāmanigamaraṭṭhato;
អសីតិកោដិសហស្សានំ, តតិយោ អាសិ សមាគមោ។
Asītikoṭisahassānaṃ, tatiyo āsi samāgamo.
១១.
11.
អហំ តេន សមយេន, ជដិលោ នាម រដ្ឋិកោ;
Ahaṃ tena samayena, jaṭilo nāma raṭṭhiko;
សម្ពុទ្ធប្បមុខំ សង្ឃំ, សភត្តំ ទុស្សមទាសហំ។
Sambuddhappamukhaṃ saṅghaṃ, sabhattaṃ dussamadāsahaṃ.
១២.
12.
សោបិ មំ ពុទ្ធោ ព្យាកាសិ, សង្ឃមជ្ឈេ និសីទិយ;
Sopi maṃ buddho byākāsi, saṅghamajjhe nisīdiya;
‘‘សតសហស្សិតោ កប្បេ, អយំ ពុទ្ធោ ភវិស្សតិ។
‘‘Satasahassito kappe, ayaṃ buddho bhavissati.
១៣.
13.
‘‘បធានំ បទហិត្វាន…បេ.… ហេស្សាម សម្មុខា ឥមំ’’។
‘‘Padhānaṃ padahitvāna…pe… hessāma sammukhā imaṃ’’.
១៤.
14.
តស្សាបិ វចនំ សុត្វា, ឧត្តរិំ វតមធិដ្ឋហិំ;
Tassāpi vacanaṃ sutvā, uttariṃ vatamadhiṭṭhahiṃ;
អកាសិំ ឧគ្គទឡ្ហំ ធិតិំ, ទសបារមិបូរិយា។
Akāsiṃ uggadaḷhaṃ dhitiṃ, dasapāramipūriyā.
១៥.
15.
ព្យាហតា តិត្ថិយា សព្ពេ, វិមនា ទុម្មនា តទា;
Byāhatā titthiyā sabbe, vimanā dummanā tadā;
ន តេសំ កេចិ បរិចរន្តិ, រដ្ឋតោ និច្ឆុភន្តិ តេ។
Na tesaṃ keci paricaranti, raṭṭhato nicchubhanti te.
១៦.
16.
សព្ពេ តត្ថ សមាគន្ត្វា, ឧបគច្ឆុំ ពុទ្ធសន្តិកេ;
Sabbe tattha samāgantvā, upagacchuṃ buddhasantike;
តុវំ នាថោ មហាវីរ, សរណំ ហោហិ ចក្ខុម។
Tuvaṃ nātho mahāvīra, saraṇaṃ hohi cakkhuma.
១៧.
17.
អនុកម្បកោ ការុណិកោ, ហិតេសី សព្ពបាណិនំ;
Anukampako kāruṇiko, hitesī sabbapāṇinaṃ;
សម្បត្តេ តិត្ថិយេ សព្ពេ, បញ្ចសីលេ បតិដ្ឋបិ។
Sampatte titthiye sabbe, pañcasīle patiṭṭhapi.
១៨.
18.
ឯវំ និរាកុលំ អាសិ, សុញ្ញតំ តិត្ថិយេហិ តំ;
Evaṃ nirākulaṃ āsi, suññataṃ titthiyehi taṃ;
វិចិត្តំ អរហន្តេហិ, វសីភូតេហិ តាទិហិ។
Vicittaṃ arahantehi, vasībhūtehi tādihi.
១៩.
19.
នគរំ ហំសវតី នាម, អានន្ទោ នាម ខត្តិយោ;
Nagaraṃ haṃsavatī nāma, ānando nāma khattiyo;
សុជាតា នាម ជនិកា, បទុមុត្តរស្ស សត្ថុនោ។
Sujātā nāma janikā, padumuttarassa satthuno.
២០.
20.
ទសវស្សសហស្សានិ, អគារំ អជ្ឈ សោ វសិ;
Dasavassasahassāni, agāraṃ ajjha so vasi;
២១.
21.
តិចត្តារីសសហស្សានិ, នារិយោ សមលង្កតា;
Ticattārīsasahassāni, nāriyo samalaṅkatā;
វសុទត្តា នាម នារី, ឧត្តមោ នាម អត្រជោ។
Vasudattā nāma nārī, uttamo nāma atrajo.
២២.
22.
និមិត្តេ ចតុរោ ទិស្វា, បាសាទេនាភិនិក្ខមិ;
Nimitte caturo disvā, pāsādenābhinikkhami;
សត្តាហំ បធានចារំ, អចរី បុរិសុត្តមោ។
Sattāhaṃ padhānacāraṃ, acarī purisuttamo.
២៣.
23.
ព្រហ្មុនា យាចិតោ សន្តោ, បទុមុត្តរោ វិនាយកោ;
Brahmunā yācito santo, padumuttaro vināyako;
វត្តិ ចក្កំ មហាវីរោ, មិថិលុយ្យានមុត្តមេ។
Vatti cakkaṃ mahāvīro, mithiluyyānamuttame.
២៤.
24.
ទេវលោ ច សុជាតោ ច, អហេសុំ អគ្គសាវកា;
Devalo ca sujāto ca, ahesuṃ aggasāvakā;
សុមនោ នាមុបដ្ឋាកោ, បទុមុត្តរស្ស មហេសិនោ។
Sumano nāmupaṭṭhāko, padumuttarassa mahesino.
២៥.
25.
អមិតា ច អសមា ច, អហេសុំ អគ្គសាវិកា;
Amitā ca asamā ca, ahesuṃ aggasāvikā;
ពោធិ តស្ស ភគវតោ, សលលោតិ បវុច្ចតិ។
Bodhi tassa bhagavato, salaloti pavuccati.
២៦.
26.
ហដ្ឋា ចេវ វិចិត្តា ច, អហេសុំ អគ្គុបដ្ឋិកា។
Haṭṭhā ceva vicittā ca, ahesuṃ aggupaṭṭhikā.
២៧.
27.
អដ្ឋបណ្ណាសរតនំ, អច្ចុគ្គតោ មហាមុនិ;
Aṭṭhapaṇṇāsaratanaṃ, accuggato mahāmuni;
កញ្ចនគ្ឃិយសង្កាសោ, ទ្វត្តិំសវរលក្ខណោ។
Kañcanagghiyasaṅkāso, dvattiṃsavaralakkhaṇo.
២៨.
28.
កុដ្ដា កវាដា ភិត្តី ច, រុក្ខា នគសិលុច្ចយា;
Kuṭṭā kavāṭā bhittī ca, rukkhā nagasiluccayā;
ន តស្សាវរណំ អត្ថិ, សមន្តា ទ្វាទសយោជនេ។
Na tassāvaraṇaṃ atthi, samantā dvādasayojane.
២៩.
29.
វស្សសតសហស្សានិ, អាយុ វិជ្ជតិ តាវទេ;
Vassasatasahassāni, āyu vijjati tāvade;
តាវតា តិដ្ឋមានោ សោ, តារេសិ ជនតំ ពហុំ។
Tāvatā tiṭṭhamāno so, tāresi janataṃ bahuṃ.
៣០.
30.
សន្តារេត្វា ពហុជនំ, ឆិន្ទិត្វា សព្ពសំសយំ;
Santāretvā bahujanaṃ, chinditvā sabbasaṃsayaṃ;
ជលិត្វា អគ្គិក្ខន្ធោវ និព្ពុតោ សោ សសាវកោ។
Jalitvā aggikkhandhova nibbuto so sasāvako.
៣១.
31.
បទុមុត្តរោ ជិនោ ពុទ្ធោ, នន្ទារាមម្ហិ និព្ពុតោ;
Padumuttaro jino buddho, nandārāmamhi nibbuto;
តត្ថេវស្ស ថូបវរោ, ទ្វាទសុព្ពេធយោជនោតិ។
Tatthevassa thūpavaro, dvādasubbedhayojanoti.
បទុមុត្តរស្ស ភគវតោ វំសោ ទសមោ។
Padumuttarassa bhagavato vaṃso dasamo.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ពុទ្ធវំស-អដ្ឋកថា • Buddhavaṃsa-aṭṭhakathā / ១២. បទុមុត្តរពុទ្ធវំសវណ្ណនា • 12. Padumuttarabuddhavaṃsavaṇṇanā
