| Library / Tipiṭaka / ติปิฎก • Tipiṭaka / พุทฺธวํสปาฬิ • Buddhavaṃsapāḷi |
๑๐. ปทุมพุทฺธวํโส
10. Padumabuddhavaṃso
๑.
1.
อโนมทสฺสิสฺส อปเรน, สมฺพุโทฺธ ทฺวิปทุตฺตโม;
Anomadassissa aparena, sambuddho dvipaduttamo;
ปทุโม นาม นาเมน, อสโม อปฺปฎิปุคฺคโลฯ
Padumo nāma nāmena, asamo appaṭipuggalo.
๒.
2.
ตสฺสาปิ อสมํ สีลํ, สมาธิปิ อนนฺตโก;
Tassāpi asamaṃ sīlaṃ, samādhipi anantako;
อสเงฺขยฺยํ ญาณวรํ, วิมุตฺติปิ อนูปมาฯ
Asaṅkheyyaṃ ñāṇavaraṃ, vimuttipi anūpamā.
๓.
3.
ตสฺสาปิ อตุลเตชสฺส, ธมฺมจกฺกปฺปวตฺตเน;
Tassāpi atulatejassa, dhammacakkappavattane;
อภิสมยา ตโย อาสุํ, มหาตมปวาหนาฯ
Abhisamayā tayo āsuṃ, mahātamapavāhanā.
๔.
4.
ปฐมาภิสมเย พุโทฺธ, โกฎิสตมโพธยิ;
Paṭhamābhisamaye buddho, koṭisatamabodhayi;
ทุติยาภิสมเย ธีโร, นวุติโกฎิมโพธยิฯ
Dutiyābhisamaye dhīro, navutikoṭimabodhayi.
๕.
5.
ยทา จ ปทุโม พุโทฺธ, โอวที สกมตฺรชํ;
Yadā ca padumo buddho, ovadī sakamatrajaṃ;
ตทา อสีติโกฎีนํ, ตติยาภิสมโย อหุฯ
Tadā asītikoṭīnaṃ, tatiyābhisamayo ahu.
๖.
6.
สนฺนิปาตา ตโย อาสุํ, ปทุมสฺส มเหสิโน;
Sannipātā tayo āsuṃ, padumassa mahesino;
โกฎิสตสหสฺสานํ, ปฐโม อาสิ สมาคโมฯ
Koṭisatasahassānaṃ, paṭhamo āsi samāgamo.
๗.
7.
กถินตฺถารสมเย , อุปฺปเนฺน กถินจีวเร;
Kathinatthārasamaye , uppanne kathinacīvare;
๘.
8.
ตทา เต วิมลา ภิกฺขู, ฉฬภิญฺญา มหิทฺธิกา;
Tadā te vimalā bhikkhū, chaḷabhiññā mahiddhikā;
ตีณิ สตสหสฺสานิ, สมิํสุ อปราชิตาฯ
Tīṇi satasahassāni, samiṃsu aparājitā.
๙.
9.
ตทา สมาคโม อาสิ, ทฺวินฺนํ สตสหสฺสินํฯ
Tadā samāgamo āsi, dvinnaṃ satasahassinaṃ.
๑๐.
10.
อหํ เตน สมเยน, สีโห อาสิํ มิคาธิภู;
Ahaṃ tena samayena, sīho āsiṃ migādhibhū;
วิเวกมนุพฺรูหนฺตํ , ปวเน อทฺทสํ ชินํฯ
Vivekamanubrūhantaṃ , pavane addasaṃ jinaṃ.
๑๑.
11.
วนฺทิตฺวา สิรสา ปาเท, กตฺวาน ตํ ปทกฺขิณํ;
Vanditvā sirasā pāde, katvāna taṃ padakkhiṇaṃ;
ติกฺขตฺตุํ อภินาทิตฺวา, สตฺตาหํ ชินมุปฎฺฐหํฯ
Tikkhattuṃ abhināditvā, sattāhaṃ jinamupaṭṭhahaṃ.
๑๒.
12.
สตฺตาหํ วรสมาปตฺติยา, วุฎฺฐหิตฺวา ตถาคโต;
Sattāhaṃ varasamāpattiyā, vuṭṭhahitvā tathāgato;
มนสา จินฺตยิตฺวาน, โกฎิภิกฺขู สมานยิฯ
Manasā cintayitvāna, koṭibhikkhū samānayi.
๑๓.
13.
ตทาปิ โส มหาวีโร, เตสํ มเชฺฌ วิยากริ;
Tadāpi so mahāvīro, tesaṃ majjhe viyākari;
‘‘อปริเมยฺยิโต กเปฺป, อยํ พุโทฺธ ภวิสฺสติฯ
‘‘Aparimeyyito kappe, ayaṃ buddho bhavissati.
๑๔.
14.
‘‘ปธานํ ปทหิตฺวาน…เป.… เหสฺสาม สมฺมุขา อิมํ’’ฯ
‘‘Padhānaṃ padahitvāna…pe… hessāma sammukhā imaṃ’’.
๑๕.
15.
ตสฺสาปิ วจนํ สุตฺวา, ภิโยฺย จิตฺตํ ปสาทยิํ;
Tassāpi vacanaṃ sutvā, bhiyyo cittaṃ pasādayiṃ;
อุตฺตริํ วตมธิฎฺฐาสิํ, ทสปารมิปูริยาฯ
Uttariṃ vatamadhiṭṭhāsiṃ, dasapāramipūriyā.
๑๖.
16.
จมฺปกํ นาม นครํ, อสโม นาม ขตฺติโย;
Campakaṃ nāma nagaraṃ, asamo nāma khattiyo;
อสมา นาม ชนิกา, ปทุมสฺส มเหสิโนฯ
Asamā nāma janikā, padumassa mahesino.
๑๗.
17.
ทสวสฺสสหสฺสานิ , อคารํ อชฺฌ โส วสิ;
Dasavassasahassāni , agāraṃ ajjha so vasi;
นนฺทาวสุยสุตฺตรา , ตโย ปาสาทมุตฺตมาฯ
Nandāvasuyasuttarā , tayo pāsādamuttamā.
๑๘.
18.
เตตฺติํส จ สหสฺสานิ, นาริโย สมลงฺกตา;
Tettiṃsa ca sahassāni, nāriyo samalaṅkatā;
อุตฺตรา นาม สา นารี, รโมฺม นามาสิ อตฺรโชฯ
Uttarā nāma sā nārī, rammo nāmāsi atrajo.
๑๙.
19.
นิมิเตฺต จตุโร ทิสฺวา, รถยาเนน นิกฺขมิ;
Nimitte caturo disvā, rathayānena nikkhami;
อนูนอฎฺฐมาสานิ, ปธานํ ปทหี ชิโนฯ
Anūnaaṭṭhamāsāni, padhānaṃ padahī jino.
๒๐.
20.
พฺรหฺมุนา ยาจิโต สโนฺต, ปทุโม โลกนายโก;
Brahmunā yācito santo, padumo lokanāyako;
วตฺติ จกฺกํ มหาวีโร, ธนญฺจุยฺยานมุตฺตเมฯ
Vatti cakkaṃ mahāvīro, dhanañcuyyānamuttame.
๒๑.
21.
สาโล จ อุปสาโล จ, อเหสุํ อคฺคสาวกา;
Sālo ca upasālo ca, ahesuṃ aggasāvakā;
วรุโณ นามุปฎฺฐาโก, ปทุมสฺส มเหสิโนฯ
Varuṇo nāmupaṭṭhāko, padumassa mahesino.
๒๒.
22.
ราธา เจว สุราธา จ, อเหสุํ อคฺคสาวิกา;
Rādhā ceva surādhā ca, ahesuṃ aggasāvikā;
โพธิ ตสฺส ภควโต, มหาโสโณติ วุจฺจติฯ
Bodhi tassa bhagavato, mahāsoṇoti vuccati.
๒๓.
23.
ภิโยฺย เจว อสโม จ, อเหสุํ อคฺคุปฎฺฐกา;
Bhiyyo ceva asamo ca, ahesuṃ aggupaṭṭhakā;
รุจี จ นนฺทรามา จ, อเหสุํ อคฺคุปฎฺฐิกาฯ
Rucī ca nandarāmā ca, ahesuṃ aggupaṭṭhikā.
๒๔.
24.
อฎฺฐปณฺณาสรตนํ, อจฺจุคฺคโต มหามุนิ;
Aṭṭhapaṇṇāsaratanaṃ, accuggato mahāmuni;
ปภา นิทฺธาวตี ตสฺส, อสมา สพฺพโส ทิสาฯ
Pabhā niddhāvatī tassa, asamā sabbaso disā.
๒๕.
25.
จนฺทปฺปภา สูริยปฺปภา, รตนคฺคิมณิปฺปภา;
Candappabhā sūriyappabhā, ratanaggimaṇippabhā;
สพฺพาปิ ตา หตา โหนฺติ, ปตฺวา ชินปภุตฺตมํฯ
Sabbāpi tā hatā honti, patvā jinapabhuttamaṃ.
๒๖.
26.
วสฺสสตสหสฺสานิ, อายุ วิชฺชติ ตาวเท;
Vassasatasahassāni, āyu vijjati tāvade;
ตาวตา ติฎฺฐมาโน โส, ตาเรสิ ชนตํ พหุํฯ
Tāvatā tiṭṭhamāno so, tāresi janataṃ bahuṃ.
๒๗.
27.
ปริปกฺกมานเส สเตฺต, โพธยิตฺวา อเสสโต;
Paripakkamānase satte, bodhayitvā asesato;
เสสเก อนุสาสิตฺวา, นิพฺพุโต โส สสาวโกฯ
Sesake anusāsitvā, nibbuto so sasāvako.
๒๘.
28.
อุรโคว ตจํ ชิณฺณํ, วทฺธปตฺตํว ปาทโป;
Uragova tacaṃ jiṇṇaṃ, vaddhapattaṃva pādapo;
ชหิตฺวา สพฺพสงฺขาเร, นิพฺพุโต โส ยถา สิขีฯ
Jahitvā sabbasaṅkhāre, nibbuto so yathā sikhī.
๒๙.
29.
ปทุโม ชินวโร สตฺถา, ธมฺมารามมฺหิ นิพฺพุโต;
Padumo jinavaro satthā, dhammārāmamhi nibbuto;
ธาตุวิตฺถาริกํ อาสิ, เตสุ เตสุ ปเทสโตติฯ
Dhātuvitthārikaṃ āsi, tesu tesu padesatoti.
ปทุมสฺส ภควโต วํโส อฎฺฐโมฯ
Padumassa bhagavato vaṃso aṭṭhamo.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / พุทฺธวํส-อฎฺฐกถา • Buddhavaṃsa-aṭṭhakathā / ๑๐. ปทุมพุทฺธวํสวณฺณนา • 10. Padumabuddhavaṃsavaṇṇanā
