| Library / Tipiṭaka / তিপিটক • Tipiṭaka / খুদ্দসিক্খা-মূলসিক্খা • Khuddasikkhā-mūlasikkhā |
১২. পাচিত্তিযনিদ্দেসৰণ্ণনা
12. Pācittiyaniddesavaṇṇanā
১২১. মুসা …পে॰… হরণেতি নিমিত্তত্থে ভুম্মৰচনং, তস্স ‘‘পাচিত্তি ৰুত্তা’’তি ইমিনা সম্বন্ধো। এৰং সব্বত্থ। মুসাৰাদেতি নিপাতেন সদ্ধিং তপ্পুরিসো। পুব্বেপি জানিত্ৰা ৰচনক্খণেপি জানন্তস্স মুসাভণননিমিত্তন্তি অত্থো। ভণনঞ্চ নাম ইধ অভূতস্স ৰা ভূততং, ভূতস্স ৰা অভূততং কত্ৰা কাযেন ৰা ৰাচায ৰা ৰিঞ্ঞাপনপ্পযোগো। পারাজিকসঙ্ঘাদিসেসাচারৰিপত্তিযো অমূলিকায চোদেন্তস্স যথাক্কমং সঙ্ঘাদিসেসপাচিত্তিযদুক্কটানি। অনুপধারেত্ৰা সহসা ভণন্তস্স, ‘‘অঞ্ঞং ভণিস্সামী’’তি অঞ্ঞং ভণন্তস্স যস্স ভণতি, সো ন সুণাতি, তস্স চ অনাপত্তি।
121.Musā…pe… haraṇeti nimittatthe bhummavacanaṃ, tassa ‘‘pācitti vuttā’’ti iminā sambandho. Evaṃ sabbattha. Musāvādeti nipātena saddhiṃ tappuriso. Pubbepi jānitvā vacanakkhaṇepi jānantassa musābhaṇananimittanti attho. Bhaṇanañca nāma idha abhūtassa vā bhūtataṃ, bhūtassa vā abhūtataṃ katvā kāyena vā vācāya vā viññāpanappayogo. Pārājikasaṅghādisesācāravipattiyo amūlikāya codentassa yathākkamaṃ saṅghādisesapācittiyadukkaṭāni. Anupadhāretvā sahasā bhaṇantassa, ‘‘aññaṃ bhaṇissāmī’’ti aññaṃ bhaṇantassa yassa bhaṇati, so na suṇāti, tassa ca anāpatti.
ওমসতি অমনাপতায কণ্ণেসু ৰিজ্ঝতি ৰিয এতেন, ওমসতি ৰাতি ওমসো, সো চাযং ৰাদোচ, তস্মিং। দীঘো পন গাথাবন্ধৰসেন। এৰং সব্বত্থ। হীনুক্কট্ঠেসু চ জাতিনামগোত্তৰযকম্মসিপ্পআবাধলিঙ্গকিলেসআপত্তিঅক্কোসসঙ্খাতেসু দসসু ভূতেন ৰা অভূতেন ৰা ‘‘খত্তিযোসি, চণ্ডালোসী’’তিআদিনা কাযেন ৰা ৰাচায ৰা অনঞ্ঞাপদেসেন ভিক্খুনো খুংসেতুকামতায অক্কোসৰচনেতি অত্থো। ‘‘সন্তি ইধেকচ্চে চণ্ডালা’’তিআদিনা অঞ্ঞাপদেসেন ৰা ‘‘চোরোসি, ৰিকারীসি, মাতুঘাতকোসী’’তিআদীহি পাল়িমুত্তপদেহি ৰা ভিক্খুস্স, যথা ৰা তথা ৰা অনুপসম্পন্নং, পরম্মুখা পন সব্বম্পি অক্কোসন্তস্স দুক্কটং। কেৰলং দৰকম্যতায ৰদতো পন সব্বত্থ দুব্ভাসিতং।
Omasati amanāpatāya kaṇṇesu vijjhati viya etena, omasati vāti omaso, so cāyaṃ vādoca, tasmiṃ. Dīgho pana gāthābandhavasena. Evaṃ sabbattha. Hīnukkaṭṭhesu ca jātināmagottavayakammasippaābādhaliṅgakilesaāpattiakkosasaṅkhātesu dasasu bhūtena vā abhūtena vā ‘‘khattiyosi, caṇḍālosī’’tiādinā kāyena vā vācāya vā anaññāpadesena bhikkhuno khuṃsetukāmatāya akkosavacaneti attho. ‘‘Santi idhekacce caṇḍālā’’tiādinā aññāpadesena vā ‘‘corosi, vikārīsi, mātughātakosī’’tiādīhi pāḷimuttapadehi vā bhikkhussa, yathā vā tathā vā anupasampannaṃ, parammukhā pana sabbampi akkosantassa dukkaṭaṃ. Kevalaṃ davakamyatāya vadato pana sabbattha dubbhāsitaṃ.
পেসুঞ্ঞহরণেতি পিসুণস্স ভাৰো পেসুঞ্ঞং। অত্তনো পিযকম্যতায ৰা পরস্স পরেসু ভেদাধিপ্পাযেন ৰা জাতিআদীহি ওমসন্তস্স ভিক্খুনো ৰচনং সুত্ৰা ভিক্খুস্স তস্স পেসুঞ্ঞস্স হরণে। অনুপসম্পন্নস্স হরণে দুক্কটং। পদং পদং পদসো, ৰিচ্ছাযং সো, কোট্ঠাসেন কোট্ঠাসেনাতি অত্থো। সঙ্গীতিত্তযারুল়্হো তিপিটকধম্মো, অনারুল়্হো চ রাজোৰাদাদিকো ধম্মো নাম, তেন সহ পদসোতি নিপাতস্স ততিযাতপ্পুরিসো। পদসোধম্মেতি একক্খরাদিনা কোট্ঠাসেন কোট্ঠাসেন অনুপসম্পন্নেন সদ্ধিং যথাৰুত্তধম্মভণনেতি অত্থো। পদসোধম্মভণনঞ্হি পদসোধম্ম-সদ্দেন উপচারেন ৰুত্তং। অনুপসম্পন্নেন সদ্ধিং একতো উদ্দেসগ্গহণে সজ্ঝাযকরণে, তংসন্তিকে উদ্দেসগ্গহণাদিকে চ তেন সদ্ধিং একতো যেভুয্যেন পগুণং গন্থং ভণন্তস্স ওসারেন্তস্স খলিতট্ঠানে ‘‘এৰং ভণাহী’’তি একতো ভণন্তস্সপি অনাপত্তি।
Pesuññaharaṇeti pisuṇassa bhāvo pesuññaṃ. Attano piyakamyatāya vā parassa paresu bhedādhippāyena vā jātiādīhi omasantassa bhikkhuno vacanaṃ sutvā bhikkhussa tassa pesuññassa haraṇe. Anupasampannassa haraṇe dukkaṭaṃ. Padaṃ padaṃ padaso, vicchāyaṃ so, koṭṭhāsena koṭṭhāsenāti attho. Saṅgītittayāruḷho tipiṭakadhammo, anāruḷho ca rājovādādiko dhammo nāma, tena saha padasoti nipātassa tatiyātappuriso. Padasodhammeti ekakkharādinā koṭṭhāsena koṭṭhāsena anupasampannena saddhiṃ yathāvuttadhammabhaṇaneti attho. Padasodhammabhaṇanañhi padasodhamma-saddena upacārena vuttaṃ. Anupasampannena saddhiṃ ekato uddesaggahaṇe sajjhāyakaraṇe, taṃsantike uddesaggahaṇādike ca tena saddhiṃ ekato yebhuyyena paguṇaṃ ganthaṃ bhaṇantassa osārentassa khalitaṭṭhāne ‘‘evaṃ bhaṇāhī’’ti ekato bhaṇantassapi anāpatti.
অন্তমসো ৰত্থাদিনা যেন কেনচি সব্বচ্ছন্নং ছদনং অনাহচ্চ দিযড্ঢহত্থুব্বেধেনাপি সব্বপরিচ্ছিন্নং যেভুয্যেনছন্নং যেভুয্যেনপরিচ্ছিন্নঞ্চ সেনাসনং অগারন্তি অধিপ্পেতং। তত্রট্ঠো পন ভিক্খুং ঠপেত্ৰা অন্তমসো পারাজিকৰত্থুভূতো তিরচ্ছানগতোপি অন্তমসো তদহুজাতা ইত্থীপি উপচারতো অগার-সদ্দেন ৰুচ্চতি। সহ অগারেনাতি সাগারো, ভিক্খু। উপচারেনেৰ চ পন অনুপসম্পন্নেন, মাতুগামেন চ সহ সেয্যকপ্পনং সাগারভাৰো নামাতি গহেতব্বং। সঙ্ঘসম্মতং সেনাসনপঞ্ঞাপকাদিভেদং উপসম্পন্নং অযসকামা হুত্ৰা ভিক্খূহি যেন চ উজ্ঝাপেন্তি অৰজানাপেন্তি অৰঞ্ঞায ওলোকাপেন্তি, লামকতো ৰা চিন্তাপেন্তি, তং ৰচনং উজ্ঝাপনকং। যেন খীযন্তি সব্বত্থ তস্স অৰণ্ণং পকাসেন্তি, তং খীযনং।
Antamaso vatthādinā yena kenaci sabbacchannaṃ chadanaṃ anāhacca diyaḍḍhahatthubbedhenāpi sabbaparicchinnaṃ yebhuyyenachannaṃ yebhuyyenaparicchinnañca senāsanaṃ agāranti adhippetaṃ. Tatraṭṭho pana bhikkhuṃ ṭhapetvā antamaso pārājikavatthubhūto tiracchānagatopi antamaso tadahujātā itthīpi upacārato agāra-saddena vuccati. Saha agārenāti sāgāro, bhikkhu. Upacāreneva ca pana anupasampannena, mātugāmena ca saha seyyakappanaṃ sāgārabhāvo nāmāti gahetabbaṃ. Saṅghasammataṃ senāsanapaññāpakādibhedaṃ upasampannaṃ ayasakāmā hutvā bhikkhūhi yena ca ujjhāpenti avajānāpenti avaññāya olokāpenti, lāmakato vā cintāpenti, taṃ vacanaṃ ujjhāpanakaṃ. Yena khīyanti sabbattha tassa avaṇṇaṃ pakāsenti, taṃ khīyanaṃ.
১২২. তলন্তি হত্থতলমধিপ্পেতং। তগ্গহণেন পন কাযোৰ তলং। সত্তীতি কাযপ্পটিবদ্ধা সত্তি আৰুধৰিসেসো, উপলক্খণত্তা পন সব্বম্পি কাযপ্পটিবদ্ধং সত্তি। তলঞ্চ সত্তি চ তলসত্তি। ইধ পন কোপেন ভিক্খুস্স তলসত্তিউগ্গিরণং তলসত্তি। সচে পন ৰিরদ্ধো পহারং দেতি, ন পহরিতুকামতায দিন্নত্তা দুক্কটং, পহরিতুকামতায পাচিত্তিযং, অনুপসম্পন্নে দুক্কটং, মোক্খাধিপ্পাযস্স অনাপত্তি।
122.Talanti hatthatalamadhippetaṃ. Taggahaṇena pana kāyova talaṃ. Sattīti kāyappaṭibaddhā satti āvudhaviseso, upalakkhaṇattā pana sabbampi kāyappaṭibaddhaṃ satti. Talañca satti ca talasatti. Idha pana kopena bhikkhussa talasattiuggiraṇaṃ talasatti. Sace pana viraddho pahāraṃ deti, na paharitukāmatāya dinnattā dukkaṭaṃ, paharitukāmatāya pācittiyaṃ, anupasampanne dukkaṭaṃ, mokkhādhippāyassa anāpatti.
পঞ্ঞত্তেন ৰদতো উপসম্পন্নস্স ৰা তেন ৰুচ্চমানধম্মস্স ৰা অনাদরকরণং অনাদরো। অনুপসম্পন্নস্স তেন ৰুচ্চমানস্স ৰা উপসম্পন্নেন, পরেন ৰা অপঞ্ঞত্তেন ৰা ৰুচ্চমানস্স অনাদরে দুক্কটং।
Paññattena vadato upasampannassa vā tena vuccamānadhammassa vā anādarakaraṇaṃ anādaro. Anupasampannassa tena vuccamānassa vā upasampannena, parena vā apaññattena vā vuccamānassa anādare dukkaṭaṃ.
‘‘ঊনৰস্সো ত্ৰং মঞ্ঞে’’তিআদিনা ভিক্খুনো কুক্কুচ্চস্স উপ্পাদনং অনুপসম্পন্নস্স দুক্কটং।
‘‘Ūnavasso tvaṃ maññe’’tiādinā bhikkhuno kukkuccassa uppādanaṃ anupasampannassa dukkaṭaṃ.
অনাপুচ্ছা গামপ্পৰেসনেতি পকতিৰচনেন পুচ্ছিতুমনুরূপং অন্তোউপচারসীমায দস্সনূপচারে ভিক্খুং দিস্ৰা ‘‘ৰিকালে গামপ্পৰেসনং আপুচ্ছামী’’তি অনাপুচ্ছিত্ৰা ৰিকালে গামপ্পৰেসনে। দীঘো পন সন্ধিৰসেন। আপদাসু অনাপত্তি।
Anāpucchā gāmappavesaneti pakativacanena pucchitumanurūpaṃ antoupacārasīmāya dassanūpacāre bhikkhuṃ disvā ‘‘vikāle gāmappavesanaṃ āpucchāmī’’ti anāpucchitvā vikāle gāmappavesane. Dīgho pana sandhivasena. Āpadāsu anāpatti.
পরম্পরভোজনেতি পরো চ পরো চ পরম্পরা ম-কারো সন্ধিৰসেন, তস্মা পরম্পরা উপ্পত্তৰিসযঅপাদানৰচনং, পরতো পরতো লদ্ধা ভুঞ্জনেতি অত্থো। অযমেত্থ অধিপ্পাযো – পঞ্চহি ভোজনেহি নামং গহেত্ৰা নিমন্তিতস্স যেন যেন পঠমং নিমন্তিতো, তস্স তস্স ভোজনতো উপ্পটিপাটিযা, ‘‘ময্হং ভত্তপচ্চাসং তুয্হং দম্মী’’তি ৰা ‘‘ৰিকপ্পেমী’’তি ৰা আদিনা সম্মুখা ৰা পরম্মুখা ৰা অৰিকপ্পেত্ৰা ৰা অঞ্ঞতো অঞ্ঞতো পঞ্চভোজনাদীনি লদ্ধা ভুঞ্জমানেতি। গিলানচীৰরদানচীৰরকারসমযে অনাপত্তি।
Paramparabhojaneti paro ca paro ca paramparā ma-kāro sandhivasena, tasmā paramparā uppattavisayaapādānavacanaṃ, parato parato laddhā bhuñjaneti attho. Ayamettha adhippāyo – pañcahi bhojanehi nāmaṃ gahetvā nimantitassa yena yena paṭhamaṃ nimantito, tassa tassa bhojanato uppaṭipāṭiyā, ‘‘mayhaṃ bhattapaccāsaṃ tuyhaṃ dammī’’ti vā ‘‘vikappemī’’ti vā ādinā sammukhā vā parammukhā vā avikappetvā vā aññato aññato pañcabhojanādīni laddhā bhuñjamāneti. Gilānacīvaradānacīvarakārasamaye anāpatti.
১২৩. সেয্যং সেনাসনানি ৰা অনুদ্ধরিত্ৰা গমনেতি সম্বন্ধো। ৰা-সদ্দো সমুচ্চযে। তত্থ ‘‘ভিসি চিমিলিকা উত্তরত্থরণং ভূমত্থরণং তট্টিকা চম্মক্খণ্ডো নিসীদনং পচ্চত্থরণং তিণসন্থারো পণ্ণসন্থারো’’তি (পাচি॰ ১১৬) ৰুত্তাসু দসসু সেয্যাসু একম্পি অত্তনো ৰস্সগ্গনে গহেত্ৰা সঙ্ঘিকে সব্বপ্পটিচ্ছন্নে গুত্তে সেনাসনে সন্থরিত্ৰা ৰা সন্থরাপেত্ৰা ৰা যথা ঠপিতং উপচিকাদীহি ন খজ্জতি, তথা ঠপনৰসেন অনুদ্ধরিত্ৰা পরিক্খিত্তস্স আরামস্স পরিক্খেপং, অপরিক্খিত্তস্স উপচারং অতিক্কমিত্ৰা গমনে চ, তথা মঞ্চপীঠতিসিকোচ্ছসঙ্খাতানি সেনাসনানি ৰস্সকালে অজ্ঝোকাসে সন্থরিত্ৰা ৰা সন্থরাপেত্ৰা ৰা অনুপসম্পন্নেন অনুদ্ধরিত্ৰা থামমজ্ঝিমস্স পুরিসস্স লেড্ডুপাতং অতিক্কমিত্ৰা গমনে চাতি অত্থো। যথাৰুত্ততো পন অঞ্ঞত্থ দুক্কটং।
123. Seyyaṃ senāsanāni vā anuddharitvā gamaneti sambandho. Vā-saddo samuccaye. Tattha ‘‘bhisi cimilikā uttarattharaṇaṃ bhūmattharaṇaṃ taṭṭikā cammakkhaṇḍo nisīdanaṃ paccattharaṇaṃ tiṇasanthāro paṇṇasanthāro’’ti (pāci. 116) vuttāsu dasasu seyyāsu ekampi attano vassaggane gahetvā saṅghike sabbappaṭicchanne gutte senāsane santharitvā vā santharāpetvā vā yathā ṭhapitaṃ upacikādīhi na khajjati, tathā ṭhapanavasena anuddharitvā parikkhittassa ārāmassa parikkhepaṃ, aparikkhittassa upacāraṃ atikkamitvā gamane ca, tathā mañcapīṭhatisikocchasaṅkhātāni senāsanāni vassakāle ajjhokāse santharitvā vā santharāpetvā vā anupasampannena anuddharitvā thāmamajjhimassa purisassa leḍḍupātaṃ atikkamitvā gamane cāti attho. Yathāvuttato pana aññattha dukkaṭaṃ.
ইত্থিযা অদ্ধানগমনেতি ‘‘গচ্ছাম ভগিনি, গচ্ছাম অয্যা’’তি অঞ্ঞমঞ্ঞং সংৰিদহিত্ৰা ‘‘অজ্জ ৰা স্ৰে ৰা’’তিআদিনা নিযমিতকালৰিসঙ্কেতং অকত্ৰাপি দ্ৰারৰিসঙ্কেতং মগ্গৰিসঙ্কেতং কত্ৰাপি ইত্থিযা সদ্ধিং অদ্ধানমগ্গগমনেতি অত্থো।
Itthiyā addhānagamaneti ‘‘gacchāma bhagini, gacchāma ayyā’’ti aññamaññaṃ saṃvidahitvā ‘‘ajja vā sve vā’’tiādinā niyamitakālavisaṅketaṃ akatvāpi dvāravisaṅketaṃ maggavisaṅketaṃ katvāpi itthiyā saddhiṃ addhānamaggagamaneti attho.
একেকায নিসীদনেতি একেন একাতি একেকা, তস্সা নিসজ্জাযাতি অত্থো। একেন সহ একিস্সা নিসজ্জং ৰিনা একায সহ একস্স নিসজ্জং নাম নত্থীতি একায সহ একস্স নিসজ্জাযং সতি নিসিন্নস্স ভিক্খুনো পাচিত্তিযন্তি অধিপ্পাযো। ‘‘একাযেকনিসীদনে’’তি ৰা পাঠো।
Ekekāya nisīdaneti ekena ekāti ekekā, tassā nisajjāyāti attho. Ekena saha ekissā nisajjaṃ vinā ekāya saha ekassa nisajjaṃ nāma natthīti ekāya saha ekassa nisajjāyaṃ sati nisinnassa bhikkhuno pācittiyanti adhippāyo. ‘‘Ekāyekanisīdane’’ti vā pāṭho.
১২৪. রূপাদীনং উপসংহারেন, ভযানককথাকথনেন ৰা উপসম্পন্নস্স ভিংসাপনে। অনুপসম্পন্নস্স দুক্কটং।
124. Rūpādīnaṃ upasaṃhārena, bhayānakakathākathanena vā upasampannassa bhiṃsāpane. Anupasampannassa dukkaṭaṃ.
আকোটনে উপসম্পন্নস্স অন্তমসো উপ্পলপত্তেনাপি পহারদানে। অনুপসম্পন্নস্স অন্তমসো তিরচ্ছানগতস্সপি দুক্কটং। মোক্খাধিপ্পাযস্স অনাপত্তি।
Ākoṭane upasampannassa antamaso uppalapattenāpi pahāradāne. Anupasampannassa antamaso tiracchānagatassapi dukkaṭaṃ. Mokkhādhippāyassa anāpatti.
সঙ্ঘমজ্ঝে ৰিনযধরেন অনুযুঞ্জিযমানস্স পুচ্ছিততো অঞ্ঞস্স ৰাদো অঞ্ঞেন অঞ্ঞং পটিচরণং অঞ্ঞৰাদো। তথেৰ পুচ্ছিযমানস্স অকথেতুকামতায ৰিহেসনং তুণ্হীভাৰো ৰিহেসা। অঞ্ঞৰাদকস্স ৰিহেসকস্স চ ঞত্তিদুতিযকম্মেন অঞ্ঞৰাদকৰিহেসককম্মে কতে পুন অঞ্ঞৰাদে ৰিহেসায পাচিত্তিযং। অনারোপিতে পন কম্মে দুক্কটং। কিঞ্চি ৰীতিক্কমং দিস্ৰা ‘‘আৰুসো, ইদং নাম তযা কত’’ন্তি ৰুত্তে তং ন কথেতুকামো তুণ্হীভূতো সঙ্ঘং ৰিহেসেতীতি ৰিহেসকো। অনাচারং আচরিত্ৰা সঙ্ঘমজ্ঝে আপত্তিযা, ৰত্থুনা ৰা অনুযুঞ্জিযমানে তং অকথেতুকামো ‘‘কো আপন্নো, কিস্মিং আপন্নো’’তিআদিনা নযেন অঞ্ঞেহি ৰচনেহি তং ৰচনং পটিচ্ছাদেন্তো যো অঞ্ঞং ৰদতি, অযং অঞ্ঞৰাদকো নাম।
Saṅghamajjhe vinayadharena anuyuñjiyamānassa pucchitato aññassa vādo aññena aññaṃ paṭicaraṇaṃ aññavādo. Tatheva pucchiyamānassa akathetukāmatāya vihesanaṃ tuṇhībhāvo vihesā. Aññavādakassa vihesakassa ca ñattidutiyakammena aññavādakavihesakakamme kate puna aññavāde vihesāya pācittiyaṃ. Anāropite pana kamme dukkaṭaṃ. Kiñci vītikkamaṃ disvā ‘‘āvuso, idaṃ nāma tayā kata’’nti vutte taṃ na kathetukāmo tuṇhībhūto saṅghaṃ vihesetīti vihesako. Anācāraṃ ācaritvā saṅghamajjhe āpattiyā, vatthunā vā anuyuñjiyamāne taṃ akathetukāmo ‘‘ko āpanno, kismiṃ āpanno’’tiādinā nayena aññehi vacanehi taṃ vacanaṃ paṭicchādento yo aññaṃ vadati, ayaṃ aññavādako nāma.
দুট্ঠুল্লং নাম পারাজিকসঙ্ঘাদিসেসা, ইধ পন সঙ্ঘাদিসেসোৰ। পকাসো চ ছাদো চ পকাসছাদো, দুট্ঠুল্লস্স পকাসছাদোতি তপ্পুরিসো। অভিণ্হাপত্তিকস্স ভিক্খুনো আযতিং সংৰরত্থায আপত্তিপরিযন্তং কুলপরিযন্তঞ্চ কত্ৰা ৰা অকত্ৰা ৰা তিক্খত্তুং অপলোকেত্ৰা কাতব্বং। ভিক্খুসম্মুতিং ঠপেত্ৰা অনুপসম্পন্নস্স ‘‘অযং অসুচিং মোচেত্ৰা সঙ্ঘাদিসেসং আপন্নো’’তিআদিনা নযেন ৰত্থুনা সদ্ধিং আপত্তিং ঘটেত্ৰা তস্স দুট্ঠুল্লস্স পকাসনে আরোচনে চ, তস্সেৰ যেন কেনচি উপাযেন ঞত্ৰা ছাদনে চ, অদুট্ঠুল্লারোচনে ছাদনে চ, অনুপসম্পন্নস্স পন পুরিমপঞ্চমসিক্খাপদে ইতরা দুট্ঠুল্লেপি দুক্কটং।
Duṭṭhullaṃ nāma pārājikasaṅghādisesā, idha pana saṅghādisesova. Pakāso ca chādo ca pakāsachādo, duṭṭhullassa pakāsachādoti tappuriso. Abhiṇhāpattikassa bhikkhuno āyatiṃ saṃvaratthāya āpattipariyantaṃ kulapariyantañca katvā vā akatvā vā tikkhattuṃ apaloketvā kātabbaṃ. Bhikkhusammutiṃ ṭhapetvā anupasampannassa ‘‘ayaṃ asuciṃ mocetvā saṅghādisesaṃ āpanno’’tiādinā nayena vatthunā saddhiṃ āpattiṃ ghaṭetvā tassa duṭṭhullassa pakāsane ārocane ca, tasseva yena kenaci upāyena ñatvā chādane ca, aduṭṭhullārocane chādane ca, anupasampannassa pana purimapañcamasikkhāpade itarā duṭṭhullepi dukkaṭaṃ.
হাসোদকেতি এত্থ হাসে উদকেতি পদৰিভাগো ৰেদিতব্বো। যেন কেনচি সরীরাৰযৰেন হসাধিপ্পাযস্স উপকচ্ছকাদীসু হাসে ফুসনে। হাসনিমিত্তঞ্হি ফুসনং হাসো। অনুপসম্পন্নে দুক্কটং। উদকে হাসেতি উপরিগোপ্ফকে উদকে হসাধিপ্পাযস্স উম্মুজ্জননিমুজ্জনেন কীল়ায। কীল়া হি ইধ হাসোতি ৰুত্তো। নাৰায কীল়তো, হত্থাদিনা কট্ঠাদিনা ৰা উদকং হনতো অন্তমসো ভাজনগতকঞ্জিকাদীনিপি খিপনকীল়ায কীল়তো দুক্কটং। অহসাধিপ্পাযস্স অনাপত্তি।
Hāsodaketi ettha hāse udaketi padavibhāgo veditabbo. Yena kenaci sarīrāvayavena hasādhippāyassa upakacchakādīsu hāse phusane. Hāsanimittañhi phusanaṃ hāso. Anupasampanne dukkaṭaṃ. Udake hāseti uparigopphake udake hasādhippāyassa ummujjananimujjanena kīḷāya. Kīḷā hi idha hāsoti vutto. Nāvāya kīḷato, hatthādinā kaṭṭhādinā vā udakaṃ hanato antamaso bhājanagatakañjikādīnipi khipanakīḷāya kīḷato dukkaṭaṃ. Ahasādhippāyassa anāpatti.
নিচ্ছুভনে ৰিহারাতি সঙ্ঘিকৰিহারতো ভিক্খুনো নিক্কড্ঢননিক্কড্ঢাপনে। এত্থ চ একপ্পযোগে একা, নানাপযোগে দ্ৰারগণনায আপত্তিযো। পুগ্গলিকনিক্কড্ঢনে, তস্স পরিক্খারনিক্কড্ঢনে, অনুপসম্পন্নস্স পন তস্স পরিক্খারস্স ৰা নিক্কড্ঢনে দুক্কটং। ন সম্মাৰত্তন্তানং অন্তেৰাসিকসদ্ধিৰিহারিকানং ৰা নিক্কড্ঢনে, অত্তনো ৰিস্সাসিকস্স ৰিহারা নিক্কড্ঢনে, ভণ্ডনকারকস্স পন সকলসঙ্ঘারামতো নিক্কড্ঢনে অনাপত্তি।
Nicchubhane vihārāti saṅghikavihārato bhikkhuno nikkaḍḍhananikkaḍḍhāpane. Ettha ca ekappayoge ekā, nānāpayoge dvāragaṇanāya āpattiyo. Puggalikanikkaḍḍhane, tassa parikkhāranikkaḍḍhane, anupasampannassa pana tassa parikkhārassa vā nikkaḍḍhane dukkaṭaṃ. Na sammāvattantānaṃ antevāsikasaddhivihārikānaṃ vā nikkaḍḍhane, attano vissāsikassa vihārā nikkaḍḍhane, bhaṇḍanakārakassa pana sakalasaṅghārāmato nikkaḍḍhane anāpatti.
অনুপখজ্জ সযনেতি ‘‘ৰুড্ঢো, গিলানো, সঙ্ঘেন দিন্নো’’তি জানিত্ৰা মঞ্চপীঠানং ৰা তস্স ভিক্খুনো পৰিসন্তস্স ৰা নিক্খমন্তস্স ৰা উপচারং অনুপখজ্জ অনুপৰিসিত্ৰা সঙ্ঘিকে ৰিহারে ‘‘যস্স সম্বাধো ভৰিস্সতি, সো পক্কমিস্সতী’’তি অধিপ্পাযেন নিসীদননিসজ্জনৰসেন সযনে। পুগ্গলিকে দুক্কটং।
Anupakhajja sayaneti ‘‘vuḍḍho, gilāno, saṅghena dinno’’ti jānitvā mañcapīṭhānaṃ vā tassa bhikkhuno pavisantassa vā nikkhamantassa vā upacāraṃ anupakhajja anupavisitvā saṅghike vihāre ‘‘yassa sambādho bhavissati, so pakkamissatī’’ti adhippāyena nisīdananisajjanavasena sayane. Puggalike dukkaṭaṃ.
এত্থ চ পাচিত্তীতি উদ্দিসিত্ৰা কানিচি পসিদ্ধানি দস্সিতানি। অৰুত্তানি পন তাদিসানি ইমিনাৰ সামঞ্ঞৰচনেন সঙ্গহেত্ৰা ৰেদিতব্বানি। কথং? অচেলকাদিঅঞ্ঞতিত্থিযানং যস্স কস্সচি আমিসস্স সহত্থা দানে চ, সপ্পিনৰনীততেলমধুফাণিতমচ্ছমংসখীরদধিসঙ্খাতানং পণীতভোজনানং অত্তনো অত্থায ৰিঞ্ঞাপেত্ৰা ভুঞ্জনে, রাগপরিযুট্ঠিতইত্থিপুরিসস্স যোগ্গে কুলে অনুপৰিসিত্ৰা নিসজ্জনকপ্পনে, পঞ্চন্নং ভোজনানং অঞ্ঞতরেন নিমন্তিতো তস্মিং ভুত্তে ৰা অভুত্তে ৰা সন্তং ভিক্খুং অনাপুচ্ছিত্ৰা পুরেভত্তং পচ্ছাভত্তং ৰা যস্মিং কুলে নিমন্তিতো, ততো গিলানচীৰরদানকারসমযং ঠপেত্ৰা অঞ্ঞস্মিং অঞ্ঞকুলপ্পৰেসনে, ঠপেত্ৰা একদিৰসং অঞ্ঞস্মিং দিনে আৰসথপিণ্ডস্স অগিলানেন হুত্ৰা ভুঞ্জনে, রত্তিপরিচ্ছেদং ৰা ভেসজ্জপরিচ্ছেদং ৰা কত্ৰা পৰারিততো উত্তরি অঞ্ঞত্র পুন পৰারণায অঞ্ঞত্র নিচ্চপ্পৰারণায ৰিঞ্ঞাপনে, অঞ্ঞত্র তথারূপপচ্চযা গামতো নিক্খন্তসেনাদস্সনায গমনে, পচ্চযেনপি গন্ত্ৰা তিরত্ততো উত্তরি সেনায ৰাসে, তস্স চ ৰসন্তস্স যুদ্ধট্ঠানবলগণট্ঠানসেনানিৰেসঅনীকদস্সনত্থং গমনে, পিট্ঠাদীহি কতমজ্জসঙ্খাতসুরায, পুপ্ফাদীহি কতআসৰসঙ্খাতমেরযস্স চ পানে, পদীপুজ্জলপত্তপচনাদিকারণং ৰিনা ৰিসিব্বিতুকামতায অগিলানস্স অগ্গিনো জালনজালাপনে, কপ্পবিন্দুং অনাদায নৰচীৰরপরিভোগে, সামং চীৰরং ৰিকপ্পেত্ৰা অপচ্চুদ্ধায পরিভোগে, ভিক্খুসন্তকপত্তাদিনো অন্তমসো হসাধিপ্পাযেনপি অপনিধানে অপনিধাপনে, সঞ্চিচ্চ তিরচ্ছানগতস্স জীৰিতৰোরোপনে, সঞ্চিচ্চ যথাধম্মং নিহতাধিকরণস্স পুনকম্মায উক্কোটনে, সঞ্চিচ্চ থেয্যসত্থেন সদ্ধিং সংৰিধায একদ্ধানগমনে, ভিক্খূহি সিক্খাপদেহি ৰুচ্চমানস্স অঞ্ঞং অৰিচারেত্ৰা ‘‘ন তত্থ সিক্খিস্সামী’’তি ভণনে, সিক্খাপদৰিৰণ্ণনে, ইমেসং ‘‘সুত্ৰা ওরমিস্সামী’’তি অধিপ্পাযং ৰিনা ৰিৰাদাপন্নানং উপস্সুতিট্ঠানে, ধম্মিকানং কম্মানং ছন্দং দত্ৰা পচ্ছা খীযনধম্মাপজ্জনে, সঙ্ঘে ৰিনিচ্ছযে ৰত্তমানে ছন্দং অদত্ৰা পক্কমনে, সমগ্গেন সঙ্ঘেন চীৰরং দত্ৰা পচ্ছা খীযনধম্মাপজ্জনে, অঞ্ঞত্র অজ্ঝারামা অজ্ঝাৰসথা ৰা রতনস্স ৰা রতনসম্মতস্স ৰা উগ্গণ্হনউগ্গহাপনে পাচিত্তিযন্তি।
Ettha ca pācittīti uddisitvā kānici pasiddhāni dassitāni. Avuttāni pana tādisāni imināva sāmaññavacanena saṅgahetvā veditabbāni. Kathaṃ? Acelakādiaññatitthiyānaṃ yassa kassaci āmisassa sahatthā dāne ca, sappinavanītatelamadhuphāṇitamacchamaṃsakhīradadhisaṅkhātānaṃ paṇītabhojanānaṃ attano atthāya viññāpetvā bhuñjane, rāgapariyuṭṭhitaitthipurisassa yogge kule anupavisitvā nisajjanakappane, pañcannaṃ bhojanānaṃ aññatarena nimantito tasmiṃ bhutte vā abhutte vā santaṃ bhikkhuṃ anāpucchitvā purebhattaṃ pacchābhattaṃ vā yasmiṃ kule nimantito, tato gilānacīvaradānakārasamayaṃ ṭhapetvā aññasmiṃ aññakulappavesane, ṭhapetvā ekadivasaṃ aññasmiṃ dine āvasathapiṇḍassa agilānena hutvā bhuñjane, rattiparicchedaṃ vā bhesajjaparicchedaṃ vā katvā pavāritato uttari aññatra puna pavāraṇāya aññatra niccappavāraṇāya viññāpane, aññatra tathārūpapaccayā gāmato nikkhantasenādassanāya gamane, paccayenapi gantvā tirattato uttari senāya vāse, tassa ca vasantassa yuddhaṭṭhānabalagaṇaṭṭhānasenānivesaanīkadassanatthaṃ gamane, piṭṭhādīhi katamajjasaṅkhātasurāya, pupphādīhi kataāsavasaṅkhātamerayassa ca pāne, padīpujjalapattapacanādikāraṇaṃ vinā visibbitukāmatāya agilānassa aggino jālanajālāpane, kappabinduṃ anādāya navacīvaraparibhoge, sāmaṃ cīvaraṃ vikappetvā apaccuddhāya paribhoge, bhikkhusantakapattādino antamaso hasādhippāyenapi apanidhāne apanidhāpane, sañcicca tiracchānagatassa jīvitavoropane, sañcicca yathādhammaṃ nihatādhikaraṇassa punakammāya ukkoṭane, sañcicca theyyasatthena saddhiṃ saṃvidhāya ekaddhānagamane, bhikkhūhi sikkhāpadehi vuccamānassa aññaṃ avicāretvā ‘‘na tattha sikkhissāmī’’ti bhaṇane, sikkhāpadavivaṇṇane, imesaṃ ‘‘sutvā oramissāmī’’ti adhippāyaṃ vinā vivādāpannānaṃ upassutiṭṭhāne, dhammikānaṃ kammānaṃ chandaṃ datvā pacchā khīyanadhammāpajjane, saṅghe vinicchaye vattamāne chandaṃ adatvā pakkamane, samaggena saṅghena cīvaraṃ datvā pacchā khīyanadhammāpajjane, aññatra ajjhārāmā ajjhāvasathā vā ratanassa vā ratanasammatassa vā uggaṇhanauggahāpane pācittiyanti.
পাচিত্তিযনিদ্দেসৰণ্ণনা নিট্ঠিতা।
Pācittiyaniddesavaṇṇanā niṭṭhitā.
