| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೭-೧೨. ಪಚ್ಚನೀಯಪಟ್ಠಾನವಣ್ಣನಾ
7-12. Paccanīyapaṭṭhānavaṇṇanā
೧. ಇದಾನಿ ಕುಸಲಾದೀನಂ ಪದಾನಂ ಪಟಿಕ್ಖೇಪವಸೇನ ಧಮ್ಮಾನಂ ಪಚ್ಚನೀಯತಾಯ ಲದ್ಧನಾಮಂ ಪಚ್ಚನೀಯಪಟ್ಠಾನಂ ದಸ್ಸೇತುಂ ನಕುಸಲಂ ಧಮ್ಮಂ ಪಟಿಚ್ಚ ನಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾತಿಆದಿ ಆರದ್ಧಂ। ತತ್ಥ ನಕುಸಲಂ ಧಮ್ಮಂ ಪಟಿಚ್ಚಾತಿ ಕುಸಲಸ್ಸ ಪಚ್ಚಯಭಾವಂ ವಾರೇತಿ। ನಕುಸಲೋ ಧಮ್ಮೋ ಉಪ್ಪಜ್ಜತೀತಿ ಕುಸಲಸ್ಸ ಉಪ್ಪತ್ತಿಂ ವಾರೇತಿ, ತಸ್ಮಾ ‘‘ಅಕುಸಲಾಬ್ಯಾಕತಂ ಏಕಂ ಖನ್ಧಂ ಪಟಿಚ್ಚ ಅಕುಸಲಾಬ್ಯಾಕತಾ ತಯೋ ಖನ್ಧಾ ಚಿತ್ತಸಮುಟ್ಠಾನಞ್ಚ ರೂಪ’’ನ್ತಿ ಏವಮಾದಿನಾ ನಯೇನೇತ್ಥ ಪಞ್ಹಂ ವಿಸ್ಸಜ್ಜಿತಬ್ಬಂ। ತಸ್ಮಿಂ ತಸ್ಮಿಂ ಪಚ್ಚಯೇ ಲದ್ಧಗಣನಾ ಪನ ಪಾಳಿಯಂ ವುತ್ತಾಯೇವ। ಯೇಪಿ ವಾರಾ ಸದಿಸವಿಸ್ಸಜ್ಜನಾ, ತೇಪಿ ತತ್ಥೇವ ದಸ್ಸಿತಾ। ತಸ್ಮಾ ಸಬ್ಬಮೇತ್ಥ ಹೇಟ್ಠಾ ವುತ್ತನಯಾನುಸಾರೇನ ಪಾಳಿಂ ಉಪಪರಿಕ್ಖಿತ್ವಾ ವೇದಿತಬ್ಬಂ। ಯಥಾ ಚೇತ್ಥ, ಏವಂ ದುಕಪಟ್ಠಾನೇ, ದುಕತಿಕಪಟ್ಠಾನೇ, ತಿಕದುಕಪಟ್ಠಾನೇ ತಿಕತಿಕಪಟ್ಠಾನೇ, ದುಕದುಕಪಟ್ಠಾನೇ ಚ।
1. Idāni kusalādīnaṃ padānaṃ paṭikkhepavasena dhammānaṃ paccanīyatāya laddhanāmaṃ paccanīyapaṭṭhānaṃ dassetuṃ nakusalaṃ dhammaṃ paṭicca nakusalo dhammo uppajjati hetupaccayātiādi āraddhaṃ. Tattha nakusalaṃ dhammaṃ paṭiccāti kusalassa paccayabhāvaṃ vāreti. Nakusalo dhammo uppajjatīti kusalassa uppattiṃ vāreti, tasmā ‘‘akusalābyākataṃ ekaṃ khandhaṃ paṭicca akusalābyākatā tayo khandhā cittasamuṭṭhānañca rūpa’’nti evamādinā nayenettha pañhaṃ vissajjitabbaṃ. Tasmiṃ tasmiṃ paccaye laddhagaṇanā pana pāḷiyaṃ vuttāyeva. Yepi vārā sadisavissajjanā, tepi tattheva dassitā. Tasmā sabbamettha heṭṭhā vuttanayānusārena pāḷiṃ upaparikkhitvā veditabbaṃ. Yathā cettha, evaṃ dukapaṭṭhāne, dukatikapaṭṭhāne, tikadukapaṭṭhāne tikatikapaṭṭhāne, dukadukapaṭṭhāne ca.
ಏತ್ತಾವತಾ –
Ettāvatā –
ತಿಕಞ್ಚ ಪಟ್ಠಾನವರಂ ದುಕುತ್ತಮಂ,
Tikañca paṭṭhānavaraṃ dukuttamaṃ,
ದುಕಂ ತಿಕಞ್ಚೇವ ತಿಕಂ ದುಕಞ್ಚ।
Dukaṃ tikañceva tikaṃ dukañca;
ತಿಕಂ ತಿಕಞ್ಚೇವ, ದುಕಂ ದುಕಞ್ಚ,
Tikaṃ tikañceva, dukaṃ dukañca,
ಛ ಪಚ್ಚನೀಯಮ್ಹಿ ನಯಾ ಸುಗಮ್ಭೀರಾತಿ॥ –
Cha paccanīyamhi nayā sugambhīrāti. –
ಅಟ್ಠಕಥಾಯಂ ವುತ್ತಗಾಥಾಯ ದೀಪಿತಾ। ಧಮ್ಮಪಚ್ಚನೀಯಪಟ್ಠಾನೇ ಛ ನಯಾ ನಿದ್ದಿಟ್ಠಾ ಹೋನ್ತಿ। ಪಚ್ಚಯವಸೇನ ಪನೇತ್ಥ ಏಕೇಕಸ್ಮಿಂ ಪಟ್ಠಾನೇ ಅನುಲೋಮಾದಯೋ ಚತ್ತಾರೋ ಚತ್ತಾರೋ ನಯಾತಿ ಏಕೇನ ಪರಿಯಾಯೇನ ಚತುವೀಸತಿನಯಪಟಿಮಣ್ಡಿತಂ ಪಚ್ಚನೀಯಪಟ್ಠಾನಞ್ಞೇವ ವೇದಿತಬ್ಬಂ।
Aṭṭhakathāyaṃ vuttagāthāya dīpitā. Dhammapaccanīyapaṭṭhāne cha nayā niddiṭṭhā honti. Paccayavasena panettha ekekasmiṃ paṭṭhāne anulomādayo cattāro cattāro nayāti ekena pariyāyena catuvīsatinayapaṭimaṇḍitaṃ paccanīyapaṭṭhānaññeva veditabbaṃ.
ಪಚ್ಚನೀಯಪಟ್ಠಾನವಣ್ಣನಾ।
Paccanīyapaṭṭhānavaṇṇanā.
