| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā |
೧೩-೧೮. ಅನುಲೋಮಪಚ್ಚನೀಯಪಟ್ಠಾನವಣ್ಣನಾ
13-18. Anulomapaccanīyapaṭṭhānavaṇṇanā
೧. ಇದಾನಿ ಕುಸಲಾದೀಸು ಧಮ್ಮೇಸು ಪಚ್ಚಯಧಮ್ಮಂ ಅಪ್ಪಟಿಕ್ಖಿಪಿತ್ವಾ ಪಚ್ಚಯುಪ್ಪನ್ನಸ್ಸ ಕುಸಲಾದಿಭಾವಪಟಿಕ್ಖೇಪವಸೇನ ಧಮ್ಮಾನಂ ಅನುಲೋಮಪಚ್ಚನೀಯತಾಯ ಲದ್ಧನಾಮಂ ಅನುಲೋಮಪಚ್ಚನೀಯಪಟ್ಠಾನಂ ದಸ್ಸೇತುಂ ಕುಸಲಂ ಧಮ್ಮಂ ಪಟಿಚ್ಚ ನ ಕುಸಲೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾತಿಆದಿ ಆರದ್ಧಂ। ತತ್ಥ ಕುಸಲಂ ಧಮ್ಮಂ ಪಟಿಚ್ಚಾತಿ ಕುಸಲಸ್ಸ ಪಚ್ಚಯಭಾವಂ ಅನುಜಾನಾತಿ। ನ ಕುಸಲೋ ಧಮ್ಮೋ ಉಪ್ಪಜ್ಜತೀತಿ ಕುಸಲಸ್ಸೇವ ಉಪ್ಪತ್ತಿಂ ವಾರೇತಿ। ತಸ್ಮಾ ‘‘ಕುಸಲೇ ಖನ್ಧೇ ಪಟಿಚ್ಚ ಚಿತ್ತಸಮುಟ್ಠಾನಂ ರೂಪ’’ನ್ತಿಆದಿನಾ ನಯೇನ ವಿಸ್ಸಜ್ಜನಂ ದಸ್ಸಿತಂ, ತಂ ಸಬ್ಬಂ ಪಾಳಿಂ ಓಲೋಕೇತ್ವಾ ಸಾಧುಕಂ ಸಲ್ಲಕ್ಖೇತಬ್ಬಂ। ಯಮ್ಪಿ ಯೇನ ಸದಿಸಂ, ಯಞ್ಚ ಯತ್ಥ ಲಬ್ಭತಿ, ಯೋ ಚ ಯೇಸಂ ವಿಸ್ಸಜ್ಜನಾನಂ ಯೇಸು ಪಚ್ಚಯೇಸು ಗಣನಪರಿಚ್ಛೇದೋ, ಸೋ ಸಬ್ಬೋ ಪಾಳಿಯಂ ದಸ್ಸಿತೋ, ತಸ್ಮಾ ಪಾಳಿಯೇವ ಏತ್ಥ ಅತ್ಥೋ। ಯಥಾ ಚೇತ್ಥ, ಏವಂ ದುಕಪಟ್ಠಾನಾದೀಸುಪೀತಿ।
1. Idāni kusalādīsu dhammesu paccayadhammaṃ appaṭikkhipitvā paccayuppannassa kusalādibhāvapaṭikkhepavasena dhammānaṃ anulomapaccanīyatāya laddhanāmaṃ anulomapaccanīyapaṭṭhānaṃ dassetuṃ kusalaṃ dhammaṃ paṭicca na kusalo dhammo uppajjati hetupaccayātiādi āraddhaṃ. Tattha kusalaṃ dhammaṃ paṭiccāti kusalassa paccayabhāvaṃ anujānāti. Na kusalo dhammo uppajjatīti kusalasseva uppattiṃ vāreti. Tasmā ‘‘kusale khandhe paṭicca cittasamuṭṭhānaṃ rūpa’’ntiādinā nayena vissajjanaṃ dassitaṃ, taṃ sabbaṃ pāḷiṃ oloketvā sādhukaṃ sallakkhetabbaṃ. Yampi yena sadisaṃ, yañca yattha labbhati, yo ca yesaṃ vissajjanānaṃ yesu paccayesu gaṇanaparicchedo, so sabbo pāḷiyaṃ dassito, tasmā pāḷiyeva ettha attho. Yathā cettha, evaṃ dukapaṭṭhānādīsupīti.
ಏತ್ತಾವತಾ –
Ettāvatā –
ತಿಕಞ್ಚ ಪಟ್ಠಾನವರಂ ದುಕುತ್ತಮಂ,
Tikañca paṭṭhānavaraṃ dukuttamaṃ,
ದುಕಂ ತಿಕಞ್ಚೇವ ತಿಕಂ ದುಕಞ್ಚ।
Dukaṃ tikañceva tikaṃ dukañca;
ತಿಕಂ ತಿಕಞ್ಚೇವ ದುಕಂ ದುಕಞ್ಚ,
Tikaṃ tikañceva dukaṃ dukañca,
ಛ ಅನುಲೋಮಪಚ್ಚನೀಯಮ್ಹಿ ನಯಾ ಸುಗಮ್ಭೀರಾತಿ॥ –
Cha anulomapaccanīyamhi nayā sugambhīrāti. –
ಅಟ್ಠಕಥಾಯಂ ವುತ್ತಗಾಥಾಯ ದೀಪಿತಾ ಧಮ್ಮಾನುಲೋಮಪಚ್ಚನೀಯಪಟ್ಠಾನೇ ಛ ನಯಾ ನಿದ್ದಿಟ್ಠಾ ಹೋನ್ತಿ। ಪಚ್ಚಯವಸೇನ ಪನೇತ್ಥ ಏಕೇಕಸ್ಮಿಂ ಪಟ್ಠಾನೇ ಅನುಲೋಮಾದಯೋ ಚತ್ತಾರೋ ಚತ್ತಾರೋ ನಯಾತಿ ಏಕೇನ ಪರಿಯಾಯೇನ ಚತುವೀಸತಿನಯಪಟಿಮಣ್ಡಿತಂ ಅನುಲೋಮಪಚ್ಚನೀಯಪಟ್ಠಾನಞ್ಞೇವ ವೇದಿತಬ್ಬಂ।
Aṭṭhakathāyaṃ vuttagāthāya dīpitā dhammānulomapaccanīyapaṭṭhāne cha nayā niddiṭṭhā honti. Paccayavasena panettha ekekasmiṃ paṭṭhāne anulomādayo cattāro cattāro nayāti ekena pariyāyena catuvīsatinayapaṭimaṇḍitaṃ anulomapaccanīyapaṭṭhānaññeva veditabbaṃ.
ಅನುಲೋಮಪಚ್ಚನೀಯಪಟ್ಠಾನವಣ್ಣನಾ।
Anulomapaccanīyapaṭṭhānavaṇṇanā.
