5. Opavayhattheraapadānaṃ

33.

‘‘Padumuttarabuddhassa , ājānīyamadāsahaṃ;

Niyyādetvāna sambuddhe ², agamāsiṃ sakaṃ gharaṃ.

34.

‘‘Devalo nāma nāmena, satthuno aggasāvako;

Varadhammassa dāyādo, āgacchi mama santikaṃ.

35.

‘‘Sapattabhāro bhagavā, ājāneyyo na kappati;

Tava saṅkappamaññāya, adhivāsesi cakkhumā.

36.

‘‘Agghāpetvā vātajavaṃ, sindhavaṃ sīghavāhanaṃ;

Padumuttarabuddhassa, khamanīyamadāsahaṃ.

37.

‘‘Yaṃ yaṃ yonupapajjāmi, devattaṃ atha mānusaṃ ⁴;

Khamanīyaṃ vātajavaṃ, cittaṃ nibbattate ⁶ mama.

38.

‘‘Lābhaṃ tesaṃ suladdhaṃva, ye labhantupasampadaṃ;

Punapi payirupāseyyaṃ, buddho loke sace bhave.

39.

‘‘Aṭṭhavīsatikkhattuṃhaṃ, rājā āsiṃ mahabbalo;

Cāturanto vijitāvī, jambusaṇḍassa ⁸ jambuissaro.

40.

‘‘Idaṃ pacchimakaṃ mayhaṃ, carimo vattate bhavo;

Pattosmi acalaṃ ṭhānaṃ, hitvā jayaparājayaṃ.

41.

‘‘Catutiṃsasahassamhi, mahātejosi khattiyo;

Sataratanasampanno, cakkavattī mahabbalo.

42.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā opavayho thero imā gāthāyo abhāsitthāti.

Opavayhattherassāpadānaṃ pañcamaṃ.