| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৮. নিযামকঙ্গপঞ্হো
8. Niyāmakaṅgapañho
৮. ‘‘ভন্তে নাগসেন, ‘নিযামকস্স তীণি অঙ্গানি গহেতব্বানী’তি যং ৰদেসি, কতমানি তানি তীণি অঙ্গানি গহেতব্বানী’’তি? ‘‘যথা, মহারাজ, নিযামকো রত্তিন্দিৰং সততং সমিতং অপ্পমত্তো যত্তপ্পযত্তো নাৰং সারেতি, এৰমেৰ খো, মহারাজ, যোগিনা যোগাৰচরেন চিত্তং নিযামযমানেন রত্তিন্দিৰং সততং সমিতং অপ্পমত্তেন যত্তপ্পযত্তেন যোনিসো মনসিকারেন চিত্তং নিযামেতব্বং। ইদং, মহারাজ, নিযামকস্স পঠমং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন ধম্মপদে –
8. ‘‘Bhante nāgasena, ‘niyāmakassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, niyāmako rattindivaṃ satataṃ samitaṃ appamatto yattappayatto nāvaṃ sāreti, evameva kho, mahārāja, yoginā yogāvacarena cittaṃ niyāmayamānena rattindivaṃ satataṃ samitaṃ appamattena yattappayattena yoniso manasikārena cittaṃ niyāmetabbaṃ. Idaṃ, mahārāja, niyāmakassa paṭhamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena dhammapade –
‘‘‘অপ্পমাদরতা হোথ, সচিত্তমনুরক্খথ।
‘‘‘Appamādaratā hotha, sacittamanurakkhatha;
‘‘পুন চপরং, মহারাজ, নিযামকস্স যং কিঞ্চি মহাসমুদ্দে কল্যাণং ৰা পাপকং ৰা, সব্বং তং ৰিদিতং হোতি, এৰমেৰ খো, মহারাজ, যোগিনা যোগাৰচরেন কুসলাকুসলং সাৰজ্জানৰজ্জং হীনপ্পণীতং কণ্হসুক্কসপ্পটিভাগং ৰিজানিতব্বং। ইদং, মহারাজ, নিযামকস্স দুতিযং অঙ্গং গহেতব্বং।
‘‘Puna caparaṃ, mahārāja, niyāmakassa yaṃ kiñci mahāsamudde kalyāṇaṃ vā pāpakaṃ vā, sabbaṃ taṃ viditaṃ hoti, evameva kho, mahārāja, yoginā yogāvacarena kusalākusalaṃ sāvajjānavajjaṃ hīnappaṇītaṃ kaṇhasukkasappaṭibhāgaṃ vijānitabbaṃ. Idaṃ, mahārāja, niyāmakassa dutiyaṃ aṅgaṃ gahetabbaṃ.
‘‘পুন চপরং, মহারাজ, নিযামকো যন্তে মুদ্দিকং দেতি ‘মা কোচি যন্তং আমসিত্থা’তি, এৰমেৰ খো, মহারাজ, যোগিনা যোগাৰচরেন চিত্তে সংৰরমুদ্দিকা দাতব্বা ‘মা কিঞ্চি পাপকং অকুসলৰিতক্কং ৰিতক্কেসী’তি, ইদং, মহারাজ, নিযামকস্স ততিযং অঙ্গং গহেতব্বং। ভাসিতম্পেতং, মহারাজ, ভগৰতা দেৰাতিদেৰেন সংযুত্তনিকাযৰরে ‘মা, ভিক্খৰে, পাপকে অকুসলে ৰিতক্কে ৰিতক্কেয্যাথ, সেয্যথীদং, কামৰিতক্কং ব্যাপাদৰিতক্কং ৰিহিংসাৰিতক্ক’’’ন্তি।
‘‘Puna caparaṃ, mahārāja, niyāmako yante muddikaṃ deti ‘mā koci yantaṃ āmasitthā’ti, evameva kho, mahārāja, yoginā yogāvacarena citte saṃvaramuddikā dātabbā ‘mā kiñci pāpakaṃ akusalavitakkaṃ vitakkesī’ti, idaṃ, mahārāja, niyāmakassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘mā, bhikkhave, pāpake akusale vitakke vitakkeyyātha, seyyathīdaṃ, kāmavitakkaṃ byāpādavitakkaṃ vihiṃsāvitakka’’’nti.
নিযামকঙ্গপঞ্হো অট্ঠমো।
Niyāmakaṅgapañho aṭṭhamo.
Footnotes:
