| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৯. কম্মকারঙ্গপঞ্হো
9. Kammakāraṅgapañho
৯. ‘‘ভন্তে নাগসেন, ‘কম্মকারস্স একং অঙ্গং গহেতব্ব’ন্তি যং ৰদেসি, কতমং তং একং অঙ্গং গহেতব্ব’’ন্তি? ‘‘যথা, মহারাজ, কম্মকারো এৰং চিন্তযতি ‘ভতকো অহং ইমায নাৰায কম্মং করোমি, ইমাযাহং নাৰায ৰাহসা ভত্তৰেতনং লভামি, ন মে পমাদো করণীযো, অপ্পমাদেন মে অযং নাৰা ৰাহেতব্বা’তি, এৰমেৰ খো, মহারাজ, যোগিনা যোগাৰচরেন এৰং চিন্তযিতব্বং ‘ইমং খো অহং চাতুমহাভূতিকং কাযং সম্মসন্তো সততং সমিতং অপ্পমত্তো উপট্ঠিতস্সতি সতো সম্পজানো সমাহিতো একগ্গচিত্তো জাতিজরাব্যাধিমরণসোকপরিদেৰদুক্খদোমনস্সুপাযাসেহি পরিমুচ্চিস্সামীতি অপ্পমাদো মে করণীযো’তি, ইদং, মহারাজ, কম্মকারস্স একং অঙ্গং গহেতব্বং। ভাসিতম্পেতং, মহারাজ, থেরেন সারিপুত্তেন ধম্মসেনাপতিনা –
9. ‘‘Bhante nāgasena, ‘kammakārassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kammakāro evaṃ cintayati ‘bhatako ahaṃ imāya nāvāya kammaṃ karomi, imāyāhaṃ nāvāya vāhasā bhattavetanaṃ labhāmi, na me pamādo karaṇīyo, appamādena me ayaṃ nāvā vāhetabbā’ti, evameva kho, mahārāja, yoginā yogāvacarena evaṃ cintayitabbaṃ ‘imaṃ kho ahaṃ cātumahābhūtikaṃ kāyaṃ sammasanto satataṃ samitaṃ appamatto upaṭṭhitassati sato sampajāno samāhito ekaggacitto jātijarābyādhimaraṇasokaparidevadukkhadomanassupāyāsehi parimuccissāmīti appamādo me karaṇīyo’ti, idaṃ, mahārāja, kammakārassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘কাযং ইমং সম্মসথ, পরিজানাথ পুনপ্পুনং।
‘‘‘Kāyaṃ imaṃ sammasatha, parijānātha punappunaṃ;
কাযে সভাৰং দিস্ৰান, দুক্খস্সন্তং করিস্সথা’তি॥
Kāye sabhāvaṃ disvāna, dukkhassantaṃ karissathā’ti.
কম্মকারঙ্গপঞ্হো নৰমো।
Kammakāraṅgapañho navamo.
