| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
8. நியாமகங்க³பஞ்ஹோ
8. Niyāmakaṅgapañho
8. ‘‘ப⁴ந்தே நாக³ஸேன, ‘நியாமகஸ்ஸ தீணி அங்கா³னி க³ஹேதப்³பா³னீ’தி யங் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி? ‘‘யதா², மஹாராஜ, நியாமகோ ரத்திந்தி³வங் ஸததங் ஸமிதங் அப்பமத்தோ யத்தப்பயத்தோ நாவங் ஸாரேதி, ஏவமேவ கோ², மஹாராஜ, யோகி³னா யோகா³வசரேன சித்தங் நியாமயமானேன ரத்திந்தி³வங் ஸததங் ஸமிதங் அப்பமத்தேன யத்தப்பயத்தேன யோனிஸோ மனஸிகாரேன சித்தங் நியாமேதப்³ப³ங். இத³ங், மஹாராஜ, நியாமகஸ்ஸ பட²மங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன த⁴ம்மபதே³ –
8. ‘‘Bhante nāgasena, ‘niyāmakassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, niyāmako rattindivaṃ satataṃ samitaṃ appamatto yattappayatto nāvaṃ sāreti, evameva kho, mahārāja, yoginā yogāvacarena cittaṃ niyāmayamānena rattindivaṃ satataṃ samitaṃ appamattena yattappayattena yoniso manasikārena cittaṃ niyāmetabbaṃ. Idaṃ, mahārāja, niyāmakassa paṭhamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena dhammapade –
‘‘‘அப்பமாத³ரதா ஹோத², ஸசித்தமனுரக்க²த²;
‘‘‘Appamādaratā hotha, sacittamanurakkhatha;
து³க்³கா³ உத்³த⁴ரத²த்தானங், பங்கே ஸன்னோவ 1 குஞ்ஜரோ’தி.
Duggā uddharathattānaṃ, paṅke sannova 2 kuñjaro’ti.
‘‘புன சபரங், மஹாராஜ, நியாமகஸ்ஸ யங் கிஞ்சி மஹாஸமுத்³தே³ கல்யாணங் வா பாபகங் வா, ஸப்³ப³ங் தங் விதி³தங் ஹோதி, ஏவமேவ கோ², மஹாராஜ, யோகி³னா யோகா³வசரேன குஸலாகுஸலங் ஸாவஜ்ஜானவஜ்ஜங் ஹீனப்பணீதங் கண்ஹஸுக்கஸப்படிபா⁴க³ங் விஜானிதப்³ப³ங். இத³ங், மஹாராஜ, நியாமகஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, niyāmakassa yaṃ kiñci mahāsamudde kalyāṇaṃ vā pāpakaṃ vā, sabbaṃ taṃ viditaṃ hoti, evameva kho, mahārāja, yoginā yogāvacarena kusalākusalaṃ sāvajjānavajjaṃ hīnappaṇītaṃ kaṇhasukkasappaṭibhāgaṃ vijānitabbaṃ. Idaṃ, mahārāja, niyāmakassa dutiyaṃ aṅgaṃ gahetabbaṃ.
‘‘புன சபரங், மஹாராஜ, நியாமகோ யந்தே முத்³தி³கங் தே³தி ‘மா கோசி யந்தங் ஆமஸித்தா²’தி, ஏவமேவ கோ², மஹாராஜ, யோகி³னா யோகா³வசரேன சித்தே ஸங்வரமுத்³தி³கா தா³தப்³பா³ ‘மா கிஞ்சி பாபகங் அகுஸலவிதக்கங் விதக்கேஸீ’தி, இத³ங், மஹாராஜ, நியாமகஸ்ஸ ததியங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ஸங்யுத்தனிகாயவரே ‘மா, பி⁴க்க²வே, பாபகே அகுஸலே விதக்கே விதக்கெய்யாத², ஸெய்யதீ²த³ங், காமவிதக்கங் ப்³யாபாத³விதக்கங் விஹிங்ஸாவிதக்க’’’ந்தி.
‘‘Puna caparaṃ, mahārāja, niyāmako yante muddikaṃ deti ‘mā koci yantaṃ āmasitthā’ti, evameva kho, mahārāja, yoginā yogāvacarena citte saṃvaramuddikā dātabbā ‘mā kiñci pāpakaṃ akusalavitakkaṃ vitakkesī’ti, idaṃ, mahārāja, niyāmakassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare ‘mā, bhikkhave, pāpake akusale vitakke vitakkeyyātha, seyyathīdaṃ, kāmavitakkaṃ byāpādavitakkaṃ vihiṃsāvitakka’’’nti.
நியாமகங்க³பஞ்ஹோ அட்ட²மோ.
Niyāmakaṅgapañho aṭṭhamo.
Footnotes:
