| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
9. கம்மகாரங்க³பஞ்ஹோ
9. Kammakāraṅgapañho
9. ‘‘ப⁴ந்தே நாக³ஸேன, ‘கம்மகாரஸ்ஸ ஏகங் அங்க³ங் க³ஹேதப்³ப³’ந்தி யங் வதே³ஸி, கதமங் தங் ஏகங் அங்க³ங் க³ஹேதப்³ப³’’ந்தி? ‘‘யதா², மஹாராஜ, கம்மகாரோ ஏவங் சிந்தயதி ‘ப⁴தகோ அஹங் இமாய நாவாய கம்மங் கரோமி, இமாயாஹங் நாவாய வாஹஸா ப⁴த்தவேதனங் லபா⁴மி, ந மே பமாதோ³ கரணீயோ, அப்பமாதே³ன மே அயங் நாவா வாஹேதப்³பா³’தி, ஏவமேவ கோ², மஹாராஜ, யோகி³னா யோகா³வசரேன ஏவங் சிந்தயிதப்³ப³ங் ‘இமங் கோ² அஹங் சாதுமஹாபூ⁴திகங் காயங் ஸம்மஸந்தோ ஸததங் ஸமிதங் அப்பமத்தோ உபட்டி²தஸ்ஸதி ஸதோ ஸம்பஜானோ ஸமாஹிதோ ஏகக்³க³சித்தோ ஜாதிஜராப்³யாதி⁴மரணஸோகபரிதே³வது³க்க²தோ³மனஸ்ஸுபாயாஸேஹி பரிமுச்சிஸ்ஸாமீதி அப்பமாதோ³ மே கரணீயோ’தி, இத³ங், மஹாராஜ, கம்மகாரஸ்ஸ ஏகங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, தே²ரேன ஸாரிபுத்தேன த⁴ம்மஸேனாபதினா –
9. ‘‘Bhante nāgasena, ‘kammakārassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kammakāro evaṃ cintayati ‘bhatako ahaṃ imāya nāvāya kammaṃ karomi, imāyāhaṃ nāvāya vāhasā bhattavetanaṃ labhāmi, na me pamādo karaṇīyo, appamādena me ayaṃ nāvā vāhetabbā’ti, evameva kho, mahārāja, yoginā yogāvacarena evaṃ cintayitabbaṃ ‘imaṃ kho ahaṃ cātumahābhūtikaṃ kāyaṃ sammasanto satataṃ samitaṃ appamatto upaṭṭhitassati sato sampajāno samāhito ekaggacitto jātijarābyādhimaraṇasokaparidevadukkhadomanassupāyāsehi parimuccissāmīti appamādo me karaṇīyo’ti, idaṃ, mahārāja, kammakārassa ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘காயங் இமங் ஸம்மஸத², பரிஜானாத² புனப்புனங்;
‘‘‘Kāyaṃ imaṃ sammasatha, parijānātha punappunaṃ;
காயே ஸபா⁴வங் தி³ஸ்வான, து³க்க²ஸ்ஸந்தங் கரிஸ்ஸதா²’தி.
Kāye sabhāvaṃ disvāna, dukkhassantaṃ karissathā’ti.
கம்மகாரங்க³பஞ்ஹோ நவமோ.
Kammakāraṅgapañho navamo.
