| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. နိဝေသကသုတ္တဝဏ္ဏနာ
5. Nivesakasuttavaṇṇanā
၇၆. ပဉ္စမေ အမစ္စာတိ သုဟဇ္ဇာ။ ဉာတီတိ သသ္သုသသုရပက္ခိကာ။ သာလောဟိတာတိ သမာနလောဟိတာ ဘာတိဘဂိနိအာဒယော။ အဝေစ္စပ္ပသာဒေတိ ဂုဏေ အဝေစ္စ ဇာနိတ္ဝာ ဥပ္ပန္နေ အစလပ္ပသာဒေ။ အညထတ္တန္တိ ဘာဝညထတ္တံ ။ ပထဝီဓာတုယာတိအာဒီသု ဝီသတိယာ ကောဋ္ဌာသေသု ထဒ္ဓာကာရဘူတာယ ပထဝီဓာတုယာ, ဒ္ဝာဒသသု ကောဋ္ဌာသေသု ယူသဂတာယ အာဗန္ဓနဘူတာယ အာပောဓာတုယာ, စတူသု ကောဋ္ဌာသေသု ပရိပာစနဘူတာယ တေဇောဓာတုယာ, ဆသု ကောဋ္ဌာသေသု ဝိတ္ထမ္ဘနဘူတာယ ဝာယောဓာတုယာ သိယာ အညထတ္တံ။ န တ္ဝေဝာတိ ဣမေသံ ဟိ စတုန္နံ မဟာဘူတာနံ အညမညဘာဝူပဂမနေန သိယာ အညထတ္တံ, အရိယသာဝကသ္သ ပန န တ္ဝေဝ သိယာတိ ဒသ္သေတိ။ ဧတ္ထ စ အညထတ္တန္တိ ပသာဒညထတ္တဉ္စ ဂတိအညထတ္တဉ္စ။ တဉ္ဟိ တသ္သ န ဟောတိ, ဘာဝညထတ္တံ ပန ဟောတိ။ အရိယသာဝကော ဟိ မနုသ္သော ဟုတ္ဝာ ဒေဝောပိ ဟောတိ ဗ္ရဟ္မာပိ။ ပသာဒော ပနသ္သ ဘဝန္တရေပိ န ဝိဂစ္ဆတိ, န စ အပာယဂတိသင္ခာတံ ဂတိအညထတ္တံ ပာပုဏာတိ။ သတ္ထာပိ တဒေဝ ဒသ္သေန္တော တတ္ရိဒံ အညထတ္တန္တိအာဒိမာဟ။ သေသမေတ္ထ ဥတ္တာနတ္ထမေဝာတိ။
76. Pañcame amaccāti suhajjā. Ñātīti sassusasurapakkhikā. Sālohitāti samānalohitā bhātibhaginiādayo. Aveccappasādeti guṇe avecca jānitvā uppanne acalappasāde. Aññathattanti bhāvaññathattaṃ . Pathavīdhātuyātiādīsu vīsatiyā koṭṭhāsesu thaddhākārabhūtāya pathavīdhātuyā, dvādasasu koṭṭhāsesu yūsagatāya ābandhanabhūtāya āpodhātuyā, catūsu koṭṭhāsesu paripācanabhūtāya tejodhātuyā, chasu koṭṭhāsesu vitthambhanabhūtāya vāyodhātuyā siyā aññathattaṃ. Na tvevāti imesaṃ hi catunnaṃ mahābhūtānaṃ aññamaññabhāvūpagamanena siyā aññathattaṃ, ariyasāvakassa pana na tveva siyāti dasseti. Ettha ca aññathattanti pasādaññathattañca gatiaññathattañca. Tañhi tassa na hoti, bhāvaññathattaṃ pana hoti. Ariyasāvako hi manusso hutvā devopi hoti brahmāpi. Pasādo panassa bhavantarepi na vigacchati, na ca apāyagatisaṅkhātaṃ gatiaññathattaṃ pāpuṇāti. Satthāpi tadeva dassento tatridaṃ aññathattantiādimāha. Sesamettha uttānatthamevāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၅. နိဝေသကသုတ္တံ • 5. Nivesakasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၅. နိဝေသကသုတ္တဝဏ္ဏနာ • 5. Nivesakasuttavaṇṇanā
