| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৩. নিস্সরণিযসুত্তং
3. Nissaraṇiyasuttaṃ
৭২. ৰুত্তঞ্হেতং ভগৰতা, ৰুত্তমরহতাতি মে সুতং –
72. Vuttañhetaṃ bhagavatā, vuttamarahatāti me sutaṃ –
‘‘তিস্সো ইমা, ভিক্খৰে, নিস্সরণিযা 1 ধাতুযো। কতমা তিস্সো? কামানমেতং নিস্সরণং যদিদং নেক্খম্মং, রূপানমেতং নিস্সরণং যদিদং আরুপ্পং, যং খো পন কিঞ্চি ভূতং সঙ্খতং পটিচ্চসমুপ্পন্নং নিরোধো তস্স নিস্সরণং – ইমা খো, ভিক্খৰে, তিস্সো নিস্সরণিযা ধাতুযো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tisso imā, bhikkhave, nissaraṇiyā 2 dhātuyo. Katamā tisso? Kāmānametaṃ nissaraṇaṃ yadidaṃ nekkhammaṃ, rūpānametaṃ nissaraṇaṃ yadidaṃ āruppaṃ, yaṃ kho pana kiñci bhūtaṃ saṅkhataṃ paṭiccasamuppannaṃ nirodho tassa nissaraṇaṃ – imā kho, bhikkhave, tisso nissaraṇiyā dhātuyo’’ti. Etamatthaṃ bhagavā avoca. Tatthetaṃ iti vuccati –
‘‘কামনিস্সরণং ঞত্ৰা, রূপানঞ্চ অতিক্কমং।
‘‘Kāmanissaraṇaṃ ñatvā, rūpānañca atikkamaṃ;
সব্বসঙ্খারসমথং, ফুসং আতাপি সব্বদা॥
Sabbasaṅkhārasamathaṃ, phusaṃ ātāpi sabbadā.
‘‘স ৰে সম্মদ্দসো ভিক্খু, যতো তত্থ ৰিমুচ্চতি।
‘‘Sa ve sammaddaso bhikkhu, yato tattha vimuccati;
অভিঞ্ঞাৰোসিতো সন্তো, স ৰে যোগাতিগো মুনী’’তি॥
Abhiññāvosito santo, sa ve yogātigo munī’’ti.
অযম্পি অত্থো ৰুত্তো ভগৰতা, ইতি মে সুতন্তি। ততিযং।
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৩. নিস্সরণিযসুত্তৰণ্ণনা • 3. Nissaraṇiyasuttavaṇṇanā
